1Tuj toxin ab'q'i ttzyetlen tkawin Ciro aju rey te Persia, at jun tzaj yek'un mer ik tza'n tuj witzik' te Daniel aju ax juntl tb'i Beltsasar. Aju tqanil lu axix tok ex kyuw tu'n tel nik'b'aj ti'j, ex ok ten Daniel ximal ti'j ex el tnik' ti'j t-xilen aju otoq tzaj yek'un te.
2Kyuj qe tq'ijlalil lu, aqine Daniel nimxix o chin b'isune tuj ox seman.
3Minti' xi nchyo'ne jun ti'xti mas tb'anil, minti' xi nchyo'ne chib'j, minti' xi nk'a'ne ta'l twitz uva ex minti' ok nq'o'ne perjum wi'je, tejxi tb'aj ox seman.
4Tuj 24 tajlal tnejel xjaw te ab'q'i, atintoqe ttzi matij nima Tigris.
5Noq minab'en xi nke'yine ex o wile jun xinaq tok t-xb'alun lino ex tok jun k'alb'il tk'u'j puro q'an pwaq tb'anilxix.
6Aju t-ximlal in qoptz'aj ik tza'n tal ab'j topacio, aju twitz in qoptz'aj wen mer ik tza'n xle'laj kya'j, qe tb'aq' twitz ik che ke'yin ik tza'n ttxa'n tzaj in k'ant, qe tq'ab' ex qe tqan in che qoptz'aj ik tza'n q'an k'uxb'il, ex aju tq'ajq'ajel twi' in q'ajt ik tza'n tq'ajq'ajel kywi' nim xjal.
7O'kx aqine o wile jlu ik tza'n tuj witzik'; aqeju xinaq ate'toq wuk'ile minti' o kyil, tu'nju tzaj nimxix kyxob'il ex e je'l oq tu'n t-xi kyewan kyib'.
8Njunalxtoqe atine tej ttzaj yek'un jlu weye ik tza'n tuj witzik', ex puro spelin in oke ex in kyaj tene minti'tl wipune.
9Tejtzun nb'inteye tej tok ten yolil, in kub' mutzq'aje ex in ik' tane.
10At jun q'ab'aj tzaj tzyunte weye ex in jaw wab'ane tu'n, tejxi njaw txake'ye,
11ex tzaj tma'n weye: Aya Daniel aju k'ujla'nxix tu'n Dios, cheb'axix b'intza aju kxel nma'ne teya: We'ktza, porke ma chin tzaj sama'ne tuk'ila, chi weye.
Tej tb'aj tma'n qe yol lu, in jawtzun we'ye in chin lu'lune wen.
12Tzajtzun tma'n weye kyja': Aya Daniel mi'n xob'a, porke atxix tuj tnejel q'ij tej o tajb'eya tu'n tel tnik'a kyi'j qe ti'xti kyuwxix kyxilen ex tej tkub' tmansin tib'a twitz Tdiosa, o tb'i Dios aju tkub'sb'ila ex kyja'tzun ma chin tzaje tuk'ila.
13Aju ju'ẍ nejenel in kawin tib'aj nasyon Persia ok tzoqpaj wi'je tuj 21 q'ij, ex ate Miguel, jun kye qeju anjel ma'xix kyoklen, ul onil weye, ex njunaltoqe otoq chin kyaj tene kytxlaj qe rey te Persia.
14Ma chin tzaje tuk'ila tu'n t-xi nma'ne teya aju kb'ajel kyi'j t-xjalila te tib'ajxi, porke aju o tzaj yek'un teya ik tza'n tuj witzik', atzun in yolin ti'j mankb'il tq'ijlalil.
15Tej in q'mantoq qe yol lu, atzun weye noq kyja' kub' nke'yine twitz tx'otx' ex minti' jun yol xi nma'ne.
16Ex at jun ik ke'yin ik tza'n jun xinaq ok makonte ntzi'ye. Xitzun nma'ne teju wa'l tkub' nwitze: Tat, ma tzaj nimxix nb'ise tu'n tlaj ju ma wile ex ma chin kyaj tene minti' wipune tu'n.
17¿Tza'n tten tu'n nyoline tuk'ila, aqine tmajena? Jumajx ma tz'el b'aj wipune ex minti'tl in jawil nxewe.
18Ex aju iktoq ke'yin ik tza'n jun xinaq in ok tmako'n juntl maj, tzaj tq'o'n ak'aj wipune,
19ex tzaj tma'n weye: Mi'n xob'a ex mi'n b'isuna. K'ujla'nxixa tu'n Dios, kyuwx tk'u'ja ex tenx tipuna.
Akux in yolin wuk'ile, o nna'ye kyja'toq tok wipune ex xi nma'ne: Tat, chux yolina wuk'ile porke ma tzaj tq'o'na juntl maj wipune.
20Tzajtzun tma'n weye kyja': ¿B'a'npe tu'na tiqu'n ma chin ule tuk'ila? Porke ja'lo chin ajel meltz'aje juntl maj q'ojlel tuk'il ju ju'ẍ nejenel in kawin tib'aj nasyon Persia. Ex oktzun nb'aj q'ojine tuk'il, ktzajel aju ju'ẍ nejenel in kawin tib'aj nasyon Grecia.
21Ja'lo kxel nma'ne teya aju tz'ib'an tuj ju libro axix tok. Tuj q'oj nno'k wu'ne kyuk'il, o'kxku a Miguel in onin wi'je, aju anjel in kolin kyi'j aj Israel.
Who We AreWhat We EelieveWhat We Do
2025 by iamachristian.org,Inc All rights reserved.
