Salmos 147 - Mam Huehuetenango New Ortography

Aq'b'il chjonte te Dios tu'nju t-xtalb'il tb'incha kye aj Israel

1Nimanxwit tb'i Qman.

B'a'n tu'n qb'itzan b'itz te nimb'il te Qdios. B'a'n tu'n t-xi q'ot nimb'il tb'anilxix te.

2In jaw tb'incha'n Qman juntl maj aju tnam Jerusalén ex in che ok tchmo'n qe aj Israel ma che el sputj.

3Nne'l ti'n b'is tuj kyanmi qeju nim in che b'isun, ex nno'k tq'anan aju k'ixb'len kyi'j.

4In b'aj tajla'n jte' kyb'aj qe che'w, ex tok tb'i teyle junjun tu'n.

5Ma'xix te Qman Dios, ex ma'xix tipumal ex minti' b'ajsb'il te tojtzqib'l.

6In jaw tnimsa'n Qman qe xjal mans, atzun qe xjal mya b'a'n b'i'x nne'l ti'n kyoklen.

7Che b'itzane te Qman Dios tuk'il aq'b'il chjonte; che b'itzane b'itz te nimb'il te tuk'il tq'ajq'ajel twi chnab' arpa.

8Tu'n nno'k muj twitz kya'j, tu'n in tzaj jb'al twitz tx'otx', tu'n in tzaj ch'iy ch'im kywi witz,

9tu'n in xi tq'o'n kywa qe alumaj ex kywa kyal qe joj ok in che jaw oq'.

10Minti' tajb'en te Qman qe chej nim kyipun ex minti' in tzalaj ti'j xjal kyuw qelan tuj q'oj;

11o'kx in jaw tzalaj kyi'j qeju in che niman te, ex kyi'j qeju q'uql kyk'u'j ti'j tk'ujlalil.

12Aqeye najl tuj tnam Jerusalén, kynimsa'n jawe tb'i Qman; aqeye najl tuj tnam Sión, kynimsa'n jawe tb'i Kydiose.

13Porke ma tz'ok tkyuwsa'n qe trank kyoksa'n kywitz qe tlamel tnam, ex ma che kub' tky'iwla'n qe xjal ate' tuj tnam.

14Tu'n ma we' q'oj tuj kytanmiye ex ma che ten xjal tuj tzalajb'il ex ma che noje tu'nju tb'anil triw tu'n.

15Tu'n in tzaj tma'n alkye tu'n tb'ant tzalu twitz tx'otx', ex aju in tzaj tma'n jurat in b'ant.

16In tzaj tq'o'n tq'ab' che'w ex nno'k tu'n mer ik tza'n lan, ex tu'n in b'aj t-sputun ttxa che'w mer ik tza'n tza'j.

17In tzaj t-sama'n saqb'aqun mer ik tza'n tal ab'j qe; tu'nju che'w in tzaj t-sama'n in jaw ttuxin tib' a'.

18Pero in tzaj jun tyol, ex tu'n in nne'l ulj a' otoq kub' ttuxin tib'; in tzaj t-sama'n kyq'iq' tu'n tkub' ulj, ex tu'n jlu nnik' b'et a'.

19Xi tchik'b'a'n tyol kye tiyjil Jacob, aqeju aj Israel, kyuk'ix qe tley ex qe t-xnaq'tzb'il.

20Minti' tb'incha ikju kyi'j txqantl nasyon, minti' xi tchik'b'a'n t-xnaq'tzb'il kye.

Nimanxwit tb'i Qman.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help