1Ok t-xi nb'i'ne kyq'iq' jb'al in jaw putin wanmiye ex mer ik tza'n ch'ixmi in jatz oq.
2Kyb'inxe tq'ajq'ajel twi Dios nne'tz tuj ttzi'; in jululun ik tza'n q'ankyoq.
3In xi tqoptz'i'n Dios xle'laj kya'j tuj tkyaqil twitz kya'j, in tzaj tuj jun pak' ttxa'n tx'otx' tu'n tpon tuj juntl pak'.
4Jurat in b'injtz tq'ajq'ajel twi Dios, jun tq'ajq'ajel twi' ma'xix toklen; ex ok tb'injtz tq'ajq'ajel q'ankyoq, kukx in che tzaj qoptz'aj tqan q'ankyoq.
5Ok tq'ajt tq'ajq'ajel twi Dios, nimku tb'inchb'en ma'xix kyxilen in che b'ant tu'n, ex in tb'incha'n tb'inchb'en ma'xix t-xilen mlay tz'el qnik' ti'j.
6In tma'n Dios tu'n tkub' ttxa che'w tib'aj tx'otx' ex tu'nxte in tzaj nintz jb'al.
7Ex tu'n jb'al in che kyaj ten xjal tuj kyja, tu'ntzun tel kynik' ti'j qa tu'n Dios jlu.
8Qe txkup in che okx tuj kyjul ex atzun in xi kyewan kyib'.
9Tuj tnayaj q'ij in tzaj kyq'iq' jb'al ex tuj tb'anq'ab' q'ij in tzaj ta'w che'w.
10Tu'nju t-xew Dios in tzaj t-xupin, nno'k a' tu'n, te ttxa che'w ex qe a' ma'xix in che tuxix tu'n.
11Tu'n Dios at a' tuj muj ex nne'tz tqan q'ankyoq tuj muj tu'n.
12Tuj tkyaqil twitz tx'otx' in lemtz'aj tqan q'ankyoq twitz kya'j, tu'n tjapun tu'n alkyeju in tma'n Dios.
13Tkyaqil jlu in ajb'en tu'n Dios tu'n ttzaj kycastiw xjal ex qa tu'n t-xi tyek'un t-xtalb'il kye.
14Chin tb'intza Job, ximana ti'j tkyaqil aju ma' t-xilen in b'ant tu'n Dios.
15¿B'a'npe tu'na tza'n tten in kawin Dios ti'j tkyaqil jlu, ex tza'n tten in qoptz'aj tqan q'ankyoq tuj muj?
16¿B'a'npe tu'na tza'n tten iqan muj tu'n kyq'iq'? A jlu jun techal ti'j tnab'l Dios tz'aqlxix.
17¿B'a'npe tu'na tza'n tten in meq't t-ximlala tuj t-xb'aluna ok in xupin kyq'iq' aju in tzaj tuj tnayaj q'ij?
18¿Jakupe b'ant tu'n tonina ti'j Dios tu'n t-xi kylik'pu'na kya'j, ex tu'n tkyaj ten minti' in yukch ik tza'n jun espej k'uxb'il?
19Qo t-xnaq'tzantza alkye b'a'n t-xi qma'ne te Dios, porke tuj qlolj ato'ye ex minti' b'a'n qu'ne.
20Weye mlay nnimari wib'e tu'n nyoline tuk'il Dios, porke a jlu jaku tz'ajb'en te xitb'il weye.
21Mlay qil t-spik'umal q'ij ok nno'k qlolj twitz tu'n muj, qatzun ma tz'el xupin muj tu'n kyq'iq', atzunte kya'j in kyaj q'ancha'l.
22Mer ik tza'n t-spik'umal q'an pwaq in yek'unjtz tuj tb'anq'ab' q'ij ok tb'aj txolin ti'j Dios tu'nju nimxix tajwalil.
23Mlay qo kanun ti'j alkye t-ximb'etz Dios aju at tipumal tu'n tb'ant tkyaqil tu'n, porke ate kyuwxix ex tuj tjiqumal ti'j in b'ant tu'n noq alkye taj. Tz'aqlxix te Dios ex minti' in che b'aj tyajla'n qe xjal noq kukx.
24Kyja'tzun in che xob' xjal twitz Dios; minti' kyxilen qe xjal at kynab'l tuj twitz.
Who We AreWhat We EelieveWhat We Do
2025 by iamachristian.org,Inc All rights reserved.