1Aqeye nxjalil, kyb'intze aju nxnaq'tzb'ile; q'ontzxix kywi'ye ti'j aju kxel nma'ne kyeye.
2Ok chin yolile tuj techal; kxel nchik'b'a'ne aju ewan atxix tuj tq'ijlalil ojtxi,
3aju o qb'i ex b'a'n qu'n ex o tzaj q'ma'n qe kyu'n qe qtzan qman.
4Mlay kub' qewan jlu kywitz qe qk'wa'l. Kxel qtx'olb'a'n kye qe qiyjil che ul itz'j te tib'ajxi qe tb'inchb'en Qman tb'anilxix, ex aju tipumal nimxix ex qe tb'inchb'en ma'xix kyxilen.
5Tzaj tq'o'n Dios jun ley tu'n tajb'en kye tiyjil, ex xi tq'o'n xnaq'tzb'il tu'n kyok lpe' aj Israel ti'j, ex xi tma'n kye qe qxe'chel tu'n t-xi kyxnaq'tza'n kye qe kyiyjil,
6tu'ntzun kyojtzqinte qe kyiyjil che ul itz'j te tib'ajxi, ex qe k'wa'l lu tu'n t-xi kyxnaq'tzan kye qe kyk'wa'l che ul itz'j te tib'ajxi,
7tu'ntzun tok qe' kyk'u'j ti'j Dios, ex tu'n mi'n tik' tna'l kyu'n aju tb'incha Dios; noq o'kx tu'n t-xi kyniman qe tmandamyent,
8ex tu'n mi'n kyok ik tza'n qe kyxe'chel mib'an che niman, ex kyuw kywi', mya q'uql kyk'u'j ti'j Dios, noq in jawje' kyk'u'j.
9Qe tiyjil Efraín b'anin kyten tuk'il xob'l plech e je'l oq tuj q'ij tej tok q'oj;
10minti' xi kyniman aju yol otoq b'ant ti'j kyu'n tuk'il Dios, ex minti'x xi kyniman qe t-xnaq'tzb'il.
11Ik' tna'l kyu'n aju otoq tb'incha Dios, aqeju tb'inchb'en ma'xix kyxilen otoq tzaj tyek'un kye.
12Tb'incha Dios qe b'inchb'en ma'xix kyxilen kywitz qe kyman tuj lugar Zoán, aju at tuj Egipto:
13Kab'e ela mar tu'n, ex e ik'tz ti'n qe tuj, kub' ttzyu'n a' ex ik ok ik tza'n jun muro.
14Q'ijtl e je'x t-ẍaqlu'n qe tu'n jun muj, atzun te qonik'an tu'n t-spik'umal tqan q'aq'.
15Kub' tpa'n qe pik tuj tzqij tx'otx', ex xi tq'o'n nimxix kyk'a a'.
16Etz tilj nintz a' tuj pik tu'n Dios, ex ok ik tza'n jun nima matijxix.
17Atzun kye kukx e b'inchan il twitz Dios aju Ma'xix Toklen, ex jaw kyi'n kyib' ti'j tuj tzqij tx'otx'.
18Ok kyq'o'n Dios tuj malb'il, xi kyqanin kywa ik tza'nx kyajb'il.
19E yolin mya b'a'n ti'j ex in kyma'ntoq: ¿Jakupe tzaj tq'o'n Dios qwa tzalu tuj tzqij tx'otx'?
20Ax tok o pax pik tu'n Dios ex o tz'etz tilj a' tuj ik tza'n jun nima, ex, ¿jakupetzun tzaj tq'o'n qwa? ¿Jakupetzun tzaj tq'o'n qchi', aqo' tnam etzan tu'n? Che chi, kyma.
21Tejtzun tb'inte Qman jlu, tzaj tq'oj kyi'j qe tiyjil Jacob, aqeju aj Israel kyb'i; jaw k'ant ttx'u'jil ik tza'n q'aq',
22tu'nju minti' xi kyniman tyol Dios ex minti' ok qe' kyk'u'j ti'j ju kolb'il tu'n.
23Maske ikju, pero xi tq'o'n Dios jun orden te muj ex e jaqet qe tlamel kya'j tu'n;
24max tuj kya'j tzaj tchitun wab'j maná tb'i, xi tq'o'n te kywa, mer ik tza'n triw.
25Qe xjal lu xi kywa'n kywa anjel. Tu'n Dios xi q'o'n nimxix kywa.
26Tu'n tipumal Dios tzaj xupin kyq'iq' tuj tjawitz q'ij, ax ikx ju kyq'iq' tuj tnayaj q'ij,
27tzaj t-sama'n Dios qe chyu'j te kychi' qe xjal etzan tu'n; aqeju chyu'j tzaj t-sama'n ik kyajlal ik tza'n ttxa tz'a'n ttzi mar.
28E tzaj t-sama'n Dios jatum kykub'sa'n qe xjal ex kyi'jele qe ja xb'alun.
29Ex e wa'n tejxi tnoj kyk'u'j, kyja'tzun xi tq'o'n Dios aju kyajb'il.
30Ex na'nxtoq tnoj kyk'u'j ex atxtoq kychi' tuj kytzi',
31tej ttzaj ttx'u'jil Dios kyi'j, e kub' tb'yo'n qe xinaq mas nim kyipun. E kub' tb'yo'n qe xinaq mas tb'anil kyxol aj Israel.
32Maske b'ant tkyaqil jlu, pero e ok ten b'inchal il juntl maj; minti' xi kyniman qe tb'inchb'en Dios ma'xix kyxilen.
33Kyja'tzun kub' tq'o'n Dios kycastiw tu'n kykyim te jurat naj, ex tzaj tq'o'n nim xob'ajil kyib'aj.
34Ok in che kyim txqan tu'n Dios, atzun qeju in che kyaj anq'in in che ok ten kub'sal twitz Dios; in che aj meltz'aj tuk'il tu'n tkyaqil kyk'u'j,
35in pontzun Dios ti'j kyk'u'j, aju Dios Ma'xix Toklen, aju in kolin kyi'j ex in che klet tu'n.
36Ex noq tu'n kytzi' in xi kyma'n nimku yol puro b'a'n tb'inx, ex puro nik'aj yol jlu,
37minti'x e yolin axix tok, ex minti' japun kyu'n aju yol kyaj b'ant ti'j tu'n Dios kyuk'il.
38Ex nimku maj tzaj q'aq'an tk'u'j Dios kyi'j, kub' tnajsa'n kyb'inchb'en mya b'a'n ex minti' e naj tu'n, nimku maj minti' tzaj tq'oj kyi'j, ex minti' xi tq'o'n amb'il tu'n ttzaj ttx'u'jil.
39Tzaj tna'n Dios qa noq elaj xjal qe, ex ik kyten ik tza'n kyq'iq' in xi' ex ya minti'tl in ajtz meltz'aj.
40Nimku maj minti' xi kyniman tyol Dios tuj tzqij tx'otx'; tu'n jlu tzaj tb'is Dios kyi'j.
41Ex kukx ok kyq'o'n Dios tuj malb'il; tzaj tb'is Dios kyu'n, aju Dios xjan kye aj Israel.
42Minti' tzaj kyna'n aju tipumal Dios ex aju q'ij tej kyklet kywitz qe aj q'oj kyi'j.
43Tej tb'inchante qe b'inchb'en ma'xix ex xob'ajilxix tuj lugar Zoán at tuj Egipto,
44e ok qe nima te chik' tu'n, tu'ntzun mi'n kyk'an aj Egipto ti'j.
45Tzaj t-sama'n qe xkatz ex ẍal kyi'j, tkyaqil b'aj naj kyu'n;
46xi tq'o'n twitz kyawal kye qe ẍplon, aju twitz kyawal otoq che aq'nan ti'j.
47Tu'n saqb'aqun ex tq'ab' che'w e b'aj naj qe tqan higo ex tqan uva kye aj Egipto.
48E kyim qe kywakẍ ex qe kyẍne'l tu'n saqb'aqun ex tu'n tqan q'ankyoq.
49Tzaj nimxix ttx'u'jil Dios kyi'j; tzajxix tq'oj ex tzaj t-sama'n yajb'il kyi'j. Tzaj t-sama'n jun k'loj anjel kyi'j tu'n kynaj.
50Tzaj nimxix ttx'u'jil kyi'j, minti' xi tq'o'n amb'il tu'n kyanq'in, noq o'kx tzaj tq'o'n tx'u'j yab'il kyi'j tu'n kykyim;
51E kub' tb'yo'n kykyaqil qe nej kyk'wa'l xjal aj Egipto.
52E je'tz ti'n qe aj Israel ik tza'n jun pe'n ẍne'l; e je'x tuk'in tuj tzqij tx'otx'.
53Cheb'a e je'x tuk'in qe tu'ntzun mi'n kyxob', atzun qe aj q'oj kyi'j e kyaj mulq'aj tjaq' mar.
54E tzaj ti'n Dios qe xjal etzan tu'n e pon ti'n tuj jun tx'otx' xjan, tuj tiwitz tx'otx' aju tu'nx el ti'n.
55Kywitzx aj Israel e ex tlajo'n Dios qe nasyon najl tuj tx'otx' lu; tuj piẍin xi t-sipan tx'otx' kyxol kykyaqil k'loj aj Israel, ex atzun xi tq'o'n kye tu'n kynajan tuj.
56Atzun kye ok kyq'o'n Dios tuj malb'il, aju Dios Ma'xix Toklen, jaw kyi'n kyib' ti'j ex minti' xi kyniman qe tmandamyent.
57Ax o kyb'incha ik tza'nx o kyb'incha qe qtzan kyman, el kypa'n kyib' ti'j Dios ex minti' japun tyol kyu'n, e ok ik tza'n jun xob'l plech ẍo'k ti'j.
58Tzaj tq'oj Dios kyu'n, tu'n tlaj jaw kyb'incha'n qe altar kywi witz; okx kyik'len tu'n tlaj e k'ulun kywitz qe tilb'ilal.
59Tzaj tq'oj Dios kyi'j tej ttil jlu, ex b'i'x e jel tik'un qe aj Israel,
60ex kyaj tkolin aju ja xb'alun te nab'l te at tuj Silo, aju tja at kyxol xjal.
61Xi tq'o'n amb'il kye aj q'oj tu'n t-xi kyi'n aju kax k'ub'l tley Dios, aju techal ti'j tajwalil ex ti'j tipumal.
62Nimxix ttx'u'jil tzaj kyi'j qe xjal etzan tu'n, kyja'tzun e je'x tq'o'n tuj kyq'ab' aj q'oj kyi'j tu'n kykub' kyu'n.
63Tu'n q'aq' e kyim qe ku'xun at kyxol. Tu'n jlu minti' e moje' qe q'apoj.
64Tu'n spad e kyim qe pal, ex minti' xi q'o'n amb'il tu'n kyjaw oq' qe kyxu'jil kyi'j.
65Atzunte Qman tzaj tna'n tib' ik tza'n jun xjal nne'l twatl, ex ik tza'n jun soldad otoq tz'el q'e'n tuj twi',
66ex kub' kyi'j aj q'oj ti'j tu'n ex e je'l oq qe; tzaj kych'ixwi tu'n te jumajx.
67El tik'un qe tk'wa'l José, ex minti' jaw t-sk'o'n aju tiyjil Efraín;
68noq o'kx jaw t-sk'o'n aju tiyjil Judá ex tuk'ix aju witz Sión aju k'ujla'n tu'n.
69Jaw tb'incha'n jun lugar xjan ma'xix twa'l ik tza'n qe witz, ex kub' tkyuwsa'n te jumajx ik tza'nx tten tx'otx'.
70Jaw t-sk'o'n David tu'n tok te tmajen, aju tok te pastor ẍne'l nej;
71el ti'n tu'n mi'n tpastorintl kyi'j qe ẍne'l, tu'ntzun tok ten kwentil kye qe xjal etzan tu'n, tu'ntzun tok te pastor kye aj Israel.
72Ex atzunte David e ok tkwentin qe xjal etzan tu'n Dios; e ok tkwentin ex e je'x tuk'in qe tuk'il nab'l ex tuk'il tanmi axix tok.
Who We AreWhat We EelieveWhat We Do
2025 by iamachristian.org,Inc All rights reserved.
