1Nimku maj o yolin Dios ojtxi kye qxe'chel ex tuj nimku tumel tzaj tq'o'n tyol kye t-sanjel tu'n ttzaj kyma'n.
2Te mankb'ilxitzun tuj tq'ijlalil ja'lo ma tzaj tma'n Dios tyol te Tk'wa'l tu'n ttzaj tma'n qe, ex ma tz'ok tq'o'n Dios Tk'wa'l tu'n tok te etzal te tkyaqil. Ax ikx tkyaqilju at, tb'incha Tk'wa'l Dios, ax Dios q'mante tu'n tb'ant.
3In tqoptz'a'n K'wa'lb'aj t-spik'umal Dios, ax tilb'ilal K'wa'lb'aj ik tza'n tilb'ilal Dios, ex tzyu'n tkyaqil tu'n K'wa'lb'aj tu'n tyol at tipumal. Tej tel tx'jet qil tu'n, kub'tzun qe' tuj b'anq'ab'aj ttxlaj Dios tuj kya'j, aju Dios ma'xix toklen.
Mas at toklen Tk'wa'l Dios kywitz qe anjel4Kyja'tzun ma tz'ok Tk'wa'l Dios mas at toklen kywitz qe anjel, porke ma tz'ok jun tb'i mas at toklen twitz kyb'i anjel.
5Porke mya te jun anjel xi tma'n Dios ju yol lu:
Aya Nky'ajal, ma chin oke te tmana ja'lo. Ex mya ti'j jun anjel o tma ju yol lu: Aqine chin okel te tman, atzun te k'okel te nk'wa'le, chi Dios.
6Pero tej ttzaj tq'o'n Dios nej Tk'wa'l kyxol xjal, o tma:
Kykyaqil qe t-anjel Dios che k'ulun twitz, chi Dios.
7Ex atzunju yol lu in tma'n Dios kyi'j anjel:
In che ok tq'o'n qe t-anjel ik tza'n kyq'iq', ex qe ajb'el te in che ok tq'o'n ik tza'n tqan q'aq', chi tuj Tu'jil.
8Atzun ti'j K'wa'lb'aj in tma'n kyja':
Aya Dios, aju tkawb'ila kukx kyjel ten te jumajx tuj tkyaqil tab'q'iyil; ex tuj tumelxix in kawina.
9Ma tzalaja ti'j ju tz'aqlxix ex ma tz'el tik'una aju mya b'a'n. Kyja'tzun ma jaw sk'o'na tu'n Dios, aju Tdiosa, ex mas ma tzalaja tu'n kywitz qe txqantl tuk'ila.
10Ax ikx in tma'n:
Aya Qman, t-xe tnejel kub' tq'uqb'a'na tx'otx', ex tu'nxa o b'ant kya'j.
11Ok che najel jlu, atzun teya kukx ktela te jumajx. Kykyaqil jlu ok che b'ajel ik tza'n jun xb'alun;
12ex kb'el tb'alq'i'na ik tza'n jun xb'alun, ex che ch'expetel ik tza'n jun xjal in b'aj tch'expu'n t-xb'alun. Atzun teya, kukx ttena te jumajx, ex minti' b'ajsb'il te tab'q'iyila, chi tuj Tu'jil.
13Ex mi jun maj tma Dios te jun anjel kyja':
Qekuya ntxlaje tuj nb'anq'ab'e akutzun in kub' kyi'j aj q'oj ti'ja wu'ne, chi Dios.
14Kykyaqil anjel xewb'aj qe ex in che ajb'en te Dios, in che tzaj sama'n tu'n kyonin kye qeju in che klet.
Who We AreWhat We EelieveWhat We Do
2025 by iamachristian.org,Inc All rights reserved.
