1Max tuj tnam Sela tuj lugar tzqij tx'otx', kysamanxe qe ẍne'l tuk'il ju kawil tuj tx'otx' Judá, tu'n kypon max twi witz Sión.
2Ok kyik'x qe xu'j aj Moab tuj xajb'il a' tuj nima Arnón, ik kyten ik tza'n qe chyu'j otoq che etz sek'pu'n ex in che el oq ti'j kyq'u'.
3In xi kyma'n kye aj Sión kyja': Kyb'inchame qi'je tu'n qklete, kyq'ontze kyxlekumale te chilkuq'ij tu'n tok ik tza'n qonik'an, tu'ntzun mi'n qilwaje; kyq'ontze amb'il tu'n tokx qklon qib'e kyxole, mi'n qo'x kyq'o'ne tuj kyq'ab' aj q'oj qi'je, tu'nju ma qo ul oqe kyxole.
4Ma qo etz oqe tuj Moab, kyq'ontze amb'il qeye tu'n qklonte qib'e kyxole. Kyoke te kolol qi'je kywitz qeju in che kub' b'yonte qeye, che chi.
Kb'ajel aju yajb'il tuk'ix ju xitb'il, che ajel meltz'aj qe xjal otoq che ok tzoqpaj ti'j tx'otx' lu.
5Jun tiyjil David k'okel te kawil; kkyuwsetel tkawb'il ex kkawil tuk'il xtalb'il. K'okel te jwes in japunxix tu'n, kb'el tq'o'n jun ley tuj tumelxix ex jurat naj kxel tb'incha'n kyi'j xjal.
6B'i'n qu'ne aju kynimb'il kyib' aj Moab ma'xix wen, nno'k kyq'on kyib' te ma'xix kyoklen ex jawni qe, ex noqx gan in b'aj kyyolin kyib'.
7Kyja'tzun, kykyaqil xjal najl tuj Moab che jawil oq' ti'j kytanmi; nimxix che b'isul, ktzajel ta'w tuj kyanmi kyi'j kylo' twitz uva tzqijsamaj at tuj tnam Kir-hareset.
8Ma che tzqij qe kojb'il tuj tnam Hesbón kyuk'ix qe tqan uva tuj tnam Sibma, ma che b'aj naj kyu'n qe nejenel kye txqantl nasyon. Qe kyq'ab' tqan uva, ponin qe nej max tuj tnam Jazer, xi'ynix tuj tzqij tx'otx' ex ponin b'aj ti'jxi mar.
9Kyja'tzun, in chin oq'e kyi'j qe tqan uva tuj tnam Sibma, ikx tza'n in che oq' aj Jazer, ex nne'tz ta'l nwitze kyi'je aqeye aj Hesbón, ax ikx kyi'je aqeye aj Eleale, porke qe chmol twitz awal ya minti'tl in che tzalaj. Ma jaw sich' te q'oj ti'j twitz kyawale kyu'n aj q'oj.
10Aju tzalajb'il kb'ajel tuk'ix tq'ajq'ajel kywi xjal in jaw tuj kojb'il; mlay che sch'intl xjal tu'n tzalajb'il ex mlay che b'itzantl kyxol qe tqan uva, mlay tz'el kyyatz'o'ntl ta'l twitz uva tu'n tb'antl vin ti'j. Minti'tl in che sch'in qe xjal yatz'ol ta'l twitz uva.
11Nim in b'isun wanmiye, mer ik tza'n tq'ajq'ajel twi' jun chnab' b'isb'ajilxix, in b'isun kyi'j aj Moab ex ti'j tnam Kir-hareset.
12Maske che'x aj Moab kywi' qe tal witz ex maske che sikt ok kyok ten kub'sal kywitz ma chixin, ex maske che'x tuj tja kydios tu'n kykub'san kywitz, pero noqx gan tkyaqil jlu.
13Atzun qe yol lu tma Qman kyi'j aj Moab atxix ojtxi.
14Atzun ja'lo in tma'n Qman kyja':
Tuj ox ab'q'i ja'lo, mlay tzik' tib'aj, knajel aju toklen Moab ma'xix, kyuk'ix kykyaqil xjal ate' tuj nim kyajlal; noq nik'xi che kyjel anq'in ex minti' kyipun.
Who We AreWhat We EelieveWhat We Do
2025 by iamachristian.org,Inc All rights reserved.
