1Xitzun ttzaq'we'n Bildad aju aj Súa, ex tma:
2¿Jtoj b'a'n t-xi tkolin xjal lu tu'n tyolin? Noqwit at tumel tyol jakulo qo yolin tuk'il.
3¿Tiqu'n in qo ok tq'o'n ik tza'n jun txkup ex in qo ok tq'o'n minti' qnab'l?
4¿Chipetzuna qa tu'nju in b'aj tk'ixb'isan tib'a tu'n ttx'u'jila, kyjel ten twitz tx'otx' minti' xjal tuj ex qa che ik'el qe pik tuj kylugar?
5Kb'el yupj spik'un at tuk'il xjal mya b'a'n ex kb'el yupj q'aq' at tuj tja,
6aju tkandil kb'el yupj; minti'tl spik'un ktel tuj tja.
7Maske at tipun tu'n tb'et ex kb'el numj, ex aju mya b'a'n in kub' t-ximan ti'j juntl, te tex k'ajb'el.
8Kb'el ten jun k'ob'il tuj tb'e, ex kb'el tz'aq tuj k'ob'il lu.
9Kb'el ten jun saqb'aq jatum kb'el tqan, ok tik'x ax k'okel tb'alq'i'n tib' saqb'aq ti'j tqul tqan.
10Minti' q'ancha'l k'ob'il tkub' tuj b'e tu'ntzun ttzyet tuj ok tik' b'et.
11Tuj tkyaqil part in tzaj t-xob'il ti'j; ok in b'et mer ik tza'n at jun lajolte tna'n.
12In b'aj tipun tu'n we'yaj; aju mya b'a'n b'anin tten tu'n ttzaj ti'j.
13In b'aj wa'n ttz'umal tu'n yab'il, ex cheb'a in xi chyo'n t-ximlal tu'n yab'il kyuwxix.
14K'eletz q'i'n tuj tja jatum ta'toq tuj txub'txaj, ex kxel jawo'n tu'n tpon twitz tajwil kamik.
15K'okel q'o'n tq'aq'al tja ex kxel chitun azufre tib'aj tetzb'il tu'n tnaj.
16Ik tten ik tza'n jun tze' tzqij tlok' ex tzqij qe tq'ab'.
17K'ik'el tna'njtz kyu'n xjal, ex mlay tzaj na'n tb'i juntl maj.
18K'elex q'i'n tuj spik'un tu'n tpon tuj qlolj; ex k'elex lajo'n tzalu twitz tx'otx'.
19Minti' jun tk'wa'l ex mi tiyjil kyjel ten tuj ttanmi; minti' jun kye qeju ate' tuj tja che kyjel anq'in.
20Oktzun tb'injtz tuj tkyaqil lugar aju otoq b'aj ti'j, ok che sek'pajtel xjal ex ktzajel t-xob'il kyi'j.
21Atzun kb'ajel ti'j xjal mya b'a'n ex minti' ojtzqi'n Dios tu'n, chi Bildad.
Who We AreWhat We EelieveWhat We Do
2025 by iamachristian.org,Inc All rights reserved.
