Números 19 - Mam Huehuetenango New Ortography

Tu'n kysaqix qe otoq b'aj kytz'ilsan kyib'

1Tzaj yolin Qman tuk'il Moisés ex tuk'il Aarón ex tma:

2Aqine Kymane in xi nma'ne jlu: Kymanxe kye aj Israel tu'n ttzaj kyi'n tuk'ila jun vac kyaq ke'yin ttzmal, minti' tpaltil ex b'ajx tz'okx tjaq' yuw.

3Kxe'ltzun kyq'o'ne te pal Eleazar, atzun te k'elex q'inte ti'jxi campament ex kxel tma'n tu'n tkub' b'yo'n twitz.

4Ktzajel ti'n pal Eleazar ch'in chik' tu'n jun tal twi tq'ab', ex kxel ttx'ito'n wuq maj tumlal ja xb'alun te mojb'ab'l tib'il.

5Kb'eltzun patun vac twitz, tuk'ix ttz'umal, tuk'ix tchib'jal, tuk'ix tchk'el ex tuk'ix ttxa'.

6Ktzajeltzun ti'ntl pal jun piẍ tze' wi'ten, tuk'ix jun tq'ab' tal k'ul hisopo, tuk'ix jun piẍ xb'alun kyaq ke'yin, ex che okex tq'o'n tuj q'aq' jatum in tz'e'y vac.

7Te tib'ajxi jlu kb'ajel ttx'jo'n pal t-xb'alun, ax ikx te kb'ajel chin, ex te tib'ajxi jlu b'a'n tu'n tokx tuj campament; max k'okel pal te saq juntl maj okxi tex q'ij.

8Ax ikx aju xjal otoq kub' patunte vac kb'ajel ttx'jo'n t-xb'alun ex kb'ajel chin, ex max k'okel te saq juntl maj okxi tex q'ij.

9K'elex q'i'n ttza'jil vac tu'n jun xjal t-saqsan tib', ex kb'el tq'o'n tuj jun lugar saq ti'jxi campament. Aju tza'j lu kxel kyk'u'n aj Israel tu'n tajb'en tu'n tb'aj b'ant a' te saqsab'l kye, ex tu'n tel kyil tu'n.

10Aju xjal otoq jaw chmonte tza'j lu kb'ajel ttx'jo'n t-xb'alun, ex max k'okel te saq juntl maj okxi tex q'ij. Atzun jun ley lu kukx ktel te jumajx tu'n tajb'en kye aj Israel, ex kye qe stranjer xjal ax najl kyxol.

11Alkye jun ma tz'ok makonte t-ximlal jun kyimni, wuq q'ij ktel tuj ttz'ilil.

12Tuj toxin q'ij ex tuj twuqin q'ij kb'ajel t-saqsan tib' tu'nju a' te saqsab'l, ex ksaqseteltzun. Qatzun mi'n ma b'aj t-saqsan tib' tuj toxin q'ij ex tuj twuqin, mlaytzun saqset.

13Qa at jun ma tz'ok makonte t-ximlal jun kyimni ex minti' in b'aj t-saqsan tib', tu'n tlaj jlu in b'aj ttz'ilsa'n njaye; kyja'tzun b'i'x k'elex lajet kyxol aj Israel. Kukx ktel tuj ttz'ilil tu'nju minti' ma tz'ok chitit ju a' te saqsab'l ti'j.

14Atzun ley lu tu'n tajb'en ok tkyim jun xjal tuj jun ja xb'alun: Kykyaqil qeju ate'kx tuj ja xb'alun ex kykyaqil qeju che okex tuj, che tel wuq q'ij tz'il qe.

15Ex kykyaqil qe xar ex qe k'il mya maqsi'n kytzi', ex qa mya mejor kyten kymaqsil, ax ikx che tel tz'il qe.

16Alkye jun ma tz'ok makonte t-ximlal jun kyimni b'yo'n otoq kub', ex qa tu'n yab'il otoq kyim tuj kojb'il, ex qa ma tz'ok tmako'n kyb'aqil kyimni, ex qa jun pantyón, wuq q'ij ktel tz'il kyu'n jlu.

17Ti'jtzun xjal ttz'ilsan tib', ktzajel q'it ch'in ttza'jil vac otoq kub' patit te chojb'il il, ex kb'elex q'ot tuj jun xar tu'ntzun t-xi qet a' tib'aj, aju a' tzajni q'it ti'j twi a'.

18Ex jun xjal t-saqsan tib' ktzajel ti'n jun tq'ab' tal k'ul hisopo, kb'elex tq'o'n tuj a', ex kxel ttx'ito'n ti'j ja xb'alun, kyi'j qe ti'xti ex kyi'j qe xjal ate'kx tuj ja, ax ikx kxel ttx'ito'n ch'in ti'j xjal otoq tz'ok makonte tb'aqil jun kyimni, ex qa t-ximlal jun xjal b'yo'n otoq kub', ex qa tu'n yab'il otoq kyim, ex qa otoq tz'ok tmako'n jun pantyón.

19Atzunte xjal t-saqsan tib' k'okel ttx'ito'n ch'in a' lu tuj toxin q'ij ex tuj twuqin q'ij ti'j xjal ttz'ilsan tib'. Tuj twuqin q'ij kb'ajel saqset. Aju xjal otoq b'aj ttz'ilsan tib' kb'ajel ttx'jo'n ti'j t-xb'alun ex kb'ajel chin, ex max k'okel te saq juntl maj okxi tex q'ij.

20Qa at jun xjal ttz'ilsan tib' ex minti' in b'aj t-saqsan tib', b'i'x k'elex lajet tu'ntzun mi'n tten kyxol t-xjalil tu'nju otoq b'aj ttz'ilsa'n njaye. Tu'nju minti' otoq tz'ok tx'itet a' te saqsab'l ti'j, kukx ktel tuj ttz'ilil.

21A jlu jun ley kukx ktel te jumajx. Aju xjal k'okel tx'ito'n a' te saqsab'l ti'j juntl, il ti'j tu'n tel ttx'jo'n ti'j t-xb'alun. Alkye jun ma tz'ok makonte a' te saqsab'l ktel tz'il, ex max k'okel te saq juntl maj okxi tex q'ij.

22Tkyaqilju k'okel tmako'n jun xjal ttz'ilsan tib', ktz'ilixtel tu'n; ex alkye jun ma tz'ok makonte jlu, ax ikx ktz'ilixtel; max k'okel te saq juntl maj okxi tex q'ij, chi Qman.