1Nman Dios b'intza nna'j Diose, in chin qanine onb'il teya, chin tb'intza.
2Mi'n txi tewan tib'a nwitze ok in tzaj yajb'il wi'je; b'ix chin tzaj tb'i'na, b'ix chin tzaj ttzaq'we'n naja ok ntxokone ti'ja.
3Porke jurat in b'aj nchwinqlale ik tza'n sib', in che tzaj julin nb'aqile mer ik tza'n q'aq',
4nib'an tb'aj tipun wanmiye ik tza'n k'ul in tzqij; ex minti'tl nganiye tu'n nwa'ne,
5nib'an tok lak'e' ntz'umile kyi'j nb'aqile tu'n tlaj nimxix in chin ayayane.
6Ik ntene ik tza'n jun ẍin at tuj tzqij tx'otx', ex ik tza'n jun xitx' at kyxol qe ja o che b'aj xitj.
7Minti' in chin tane. Ik ntene ik tza'n jun chyu'j tjunalx tjax twi ja.
8Minti' in xi kykolin aj q'oj tu'n kyyasun wi'je, ex in ajb'en nb'iye kyu'n tu'n t-xi kyqanin mya b'a'n ti'j juntl xjal.
9Te t-xel pan in xi nwa'ne tza'j; ex in b'aj t-smon tib' ta'l nwitze tuj nk'a'ye
10tu'n tlaj tq'oja ex ttx'u'jila. Ma chin jaw ttzyu'na ex te tib'ajxi ma chin ex t-xo'na.
11Aju nchwinqlale ik tten ik tza'n xlekun in kub' naj; in chin ok tzqije ik tza'n k'ul.
12Atzun teya Nman, in kawina te jumajx; kukx ktzajel na'n tb'iya.
13We'ktza, q'aq'antz tk'u'ja ti'j tnam Sión porke ma japun b'aj tq'ijlalil; ma pon or tu'n tkub' tnajsa'na til.
14In che b'isun qe tmajena kyi'j qe ab'j ate' tuj tnam, ex in tzaj ta'w tuj kyanmi kyi'j qe ttx'aqan b'uy kub'.
15Kykyaqil nasyon ex qe rey ate' twitz tx'otx' kjawil kynimsa'n tb'i Qman tb'anilxix
16ok tjaw tb'incha'n juntl maj aju tnam Sión ex ok tyek'unte tib' tuj tajwalil.
17Ktzajel tb'i'n kyna'j Dios qeju otoq che kyaj kolin nej ex ktzajel tb'i'n aju kykub'sb'il.
18E tkyaj tz'ib'et jlu te kye qe xjal che ul itz'j te tib'ajxi, tu'ntzun tjaw kynimsa'n tb'i Qman.
19Max tuj kya'j tzaj tke'yin Qman; twitz tx'otx' tzaj tke'yin max tuj tja xjan,
20tu'n kytzaj tb'i'n qeju ate'kx pres in che oq' ex tu'n kyklet qeju tkub' kysentens tu'n kykyim;
21tu'ntzun tpakb'anjtz tb'i Qman tuj Sión ex tu'n tjaw nimset tb'i tuj tnam Jerusalén,
22ok tok kychmon kyib' qe xjal najl kyuj kykyaqil nasyon kyuk'ix qe rey, tu'n kyk'ulun te.
23Tu'n ma tz'el ti'n wipune tuj b'e; ma tz'ok tlaq'b'a'n tuj nq'ije.
24Xi nma'ne te kyja': Nman Dios, mi'n taq'a amb'il tu'n nkyim naje na'nxtoq tjapun wab'q'iyile. Atzun teya minti' b'ajsb'il te tab'q'iyila.
25Kub' tq'uqb'a'na twitz tx'otx' atxix t-xe tnejel; tu'nxa o b'ant kya'j.
26Tkyaqil jlu knajel, atzun teya kukx ktela te jumajx. Tkyaqil jlu kb'ajel ik tza'n jun xb'alun; tu'na kch'expetel, ex b'i'x kch'expetelx ik tza'n jun xjal in b'aj tch'expu'n t-xb'alun.
27Atzun teya kukx ttena te jumajx, ex minti' b'ajsb'il te tab'q'iyila.
28Qe kyk'wa'l tmajena ok che anq'il tuj segurxix, ex qe kyiyjil che b'el ten twitza te jumajx.
Who We AreWhat We EelieveWhat We Do
2025 by iamachristian.org,Inc All rights reserved.
