Esdras 8 - Mam Huehuetenango New Ortography

Aju kyb'i qe xjal e je'tz tuj Babilonia

1Atzun kyb'i qe nejenel kye junjun k'loj xjal at kyxilen kyxolx, ik tza'nx in knet tuj libro jatum tz'ib'an kyb'i kyxe'chel, aqeju e je'tz tuj Babilonia junx wuk'ile, tu'n kyul tuj Jerusalén tuj tq'ijlalil tej in kawintoq rey Artajerjes:

2-3Gersón aju nejenel kye tiyjil Finees; Daniel aju nejenel kye tiyjil Itamar; Hatús aju tky'ajal Secanías, nejenel kye tiyjil David; Zacarías aju nejenel kye tiyjil Paros, ex uk'in jun syent tuk' 50 xinaq tu'n, tz'ib'antoq kyb'i tuj list;

4Elioenai aju tky'ajal Seraías, nejenel kye tiyjil Pahat-moab, uk'in kab' syent xinaq tu'n;

5Secanías aju tky'ajal Jahaziel, nejenel kye tiyjil Zatu, uk'in ox syent xinaq tu'n;

6Ebed aju tky'ajal Jonatán, nejenel kye tiyjil Adín, uk'in 50 xinaq tu'n;

7Jesaías aju tky'ajal Atalías, nejenel kye tiyjil Elam, uk'in 70 xinaq tu'n;

8Zebadías aju tky'ajal Micael, nejenel kye tiyjil Sefatías, uk'in 80 xinaq tu'n;

9Obadías aju tky'ajal Jehiel, nejenel kye tiyjil Joab, uk'in kab'e syent tuk' wajxaqlaj xinaq tu'n;

10Selomit aju tky'ajal Josifías, nejenel kye tiyjil Bani, uk'in jun syent tuk' 60 xinaq tu'n;

11Zacarías aju tky'ajal Bebai, nejenel kye tiyjil Bebai, uk'in 28 xinaq tu'n;

12Johanán aju tky'ajal Hacatán, nejenel kye tiyjil Azgad, uk'in jun syent tuk' laj xinaq tu'n;

13Elifelet, Jeiel ex Semaías, nejenel kye tiyjil Adonicam, uk'in 60 xinaq kyu'n, aqe jlu yajxi e je'tz tuj Babilonia.

14Utai ex Zabud, nejenel kye tiyjil Bigvai, ex uk'in 70 xinaq kyu'n.

Qe ajb'el tuj tja Dios

15Aqine Esdras e ok nchmo'ne kykyaqil xjal lu ttzi' tb'e a' in pon tuj nima Ahava, ex ox q'ij o tene ma chixin. Tejtzun tjaw list wu'ne kyi'j qe xjal ex kyi'j qe pal, minti' jun aj Leví knet wu'ne kyxol.

16Tu'ntzun jlu e je'x nsama'ne junjun xjal ma' kyoklen ex atzun qe jlu: Eliezer, Ariel, Semaías, Elnatán, Jarib, Elnatán, Natán, Zacarías ex Mesulam, tuk'ix Joiarib ex Elnatán, aqeju q'ol xnaq'tzb'il,

17e je'x nsama'ne tu'n kyxi' yolil tuk'il Iddo aju nejenel te lugar Casifia, ex xi nma'ne kye alkye yol tu'n t-xi kyma'n te Iddo ex kye qe tuk'il, aqeju ajb'el tuj tja Dios otoq che pon tuj Casifia, tu'n ttzaj kyi'n junjun xjal tu'n kyajb'en junx quk'ile tuj tja Dios.

18Ex chjonte Dios ul kyi'n jun xinaq at nimxix tnab'l, Serebías tb'i, kyuk'ix qe tk'wa'l ex qe terman, wajxaqlaj kyb'et tu'n kykyaqil; a jlu tiyjil jun aj Leví Mahli tb'i.

19Ax ikx ul kyi'n Hasabías ex Jesaías kyuk'ix qe kyk'wa'l ex qe kyerman, tu'n kykyaqil japun winqin kyb'aj, ex aqe jlu tiyjil Merari qe.

20Kyxol kyiyjil qe xjal e ajb'en tuj tja Dios, aqeju e ok tq'o'n David ex kyu'n qe nejenel tu'n kyonin kyi'j qe aj Leví, attoq kab'e syent tuk' winqin kyb'et, ex kykyaqiltzun qe jlu ku'x tz'ib'et kyb'i.

21Te tib'ajxi xi nma'ne tu'n tkub' qyo'ne we'yaj ttzi nima Ahava, tu'ntzun ttzaj qna'ne aju qpaltile twitz Dios ex tu'n t-xi qqanine te tu'n qok kwentine tu'n tuj b'e, kyuk'ix qe qk'wa'le ex tkyaqilju at qeye.

22Tzaj nch'ixwiye tu'n t-xi nqanine te rey tu'n kytzaj tq'o'n qe soldad kyjax kyib'aj chej te kwentil qeye kywitz qe aj q'oj tuj b'e, tu'nju otoq txi nma'ne te rey qa ate Dios kwentil kye qeju q'uql kyk'u'j ti'j, ax ikx in tzaj nim tq'oj ex ttx'u'jil kyi'j qe xjal nne'l kypa'n kyib' ti'j.

23Kyja'tzun, kub' qyo'ne we'yaj ex o kub'sane twitz Dios ti'j tkyaqil jlu, ex tzaj tb'i'n Dios qqanb'etze.

24Ex jaw nsk'o'ne kab'laj nejenel kye pal, kyuk'ix Serebías, Hasabías ex lajtl kyuk'il,

25b'aj nmalo'ne saq pwaq, q'an pwaq ex qe makb'il otoq che tzaj q'o'n tu'n rey ex kyu'n qe xjal onil te rey tuj tkawb'il, ex kyu'n qe xjal ma' kyoklen ttxlaj, ex kyu'n kykyaqil aj Israel aqeju otoq tz'ok kychmon kyib'. Kykyaqil qe oyaj lu tuj tja Dios tu'n kyajb'en.

26E kub' nmalo'ne qe oyaj lu ex xi nq'o'ne jwe' syent quintal saq pwaq kye, kyuk'ix jun syent makb'il saq pwaq kytx'otx'il, 75 quintal kyalil, 75 quintal q'an pwaq;

27tuk'ix winqin laq q'an pwaq kytx'otx'il te b'elajlaj libr kyalil, ex kab'e makb'il q'an k'uxb'il kytx'otx'il in che qoptz'aj wen, mas tb'anil che ke'yin kywitz qe mastl ex wi'yilxix qe, mer ik tza'n q'an pwaq.

28Ex xitzun nma'ne kye: Aqeye ma che el pa'ne tu'n kyajb'ene o'kx te Qman, ax ikx qe makb'il. Aju saq pwaq ex q'an pwaq jun oyaj te Qman qe, aju Kydios qtzan qxe'chel.

29Kykwentin oke ex kyk'u'nxe maxi okxi tb'aj kymalo'ne kywitz qe nejenel kye pal, kywitz aj Leví ex kywitz qe nejenel kye xjal aj Israel, kyuj qe cuart ate' tuj tja Qman tuj Jerusalén, nchiye kye.

30Atzun kye pal kyuk'ix aj Leví xi kyk'mo'n aju saq pwaq, q'an pwaq ex qe makb'il, aqeju otoq che b'aj malo'n tu'n t-xi kyi'n tuj Jerusalén, tu'n kyokx q'ot tuj tja Qman.

31Tuj tkab'lajin q'ij te tnejel xjaw tzyet b'e qu'ne ttzi nima Ahava tu'n qpone tuj Jerusalén; a Dios onin qeye, o qo klete tu'n tuj qb'eye tuj kyq'ab' qe aj q'oj qi'je ex tuj kyq'ab' xjal eleq'.

32Tejtzun qpone tuj Jerusalén, o ojlane ox q'ij.

33Tuj tkyajin q'ij qponlene, b'aj qmalo'ne saq pwaq twitz tja Dios, tuk'ix q'an pwaq ex qe makb'il, ex xitzun qq'o'ne tkyaqil te pal Meremot aju tky'ajal Urías. Atoq Eleazar tuk'il, aju tky'ajal Finees, kyuk'ix qe aj Leví, ex atzun qe jlu: Jozabad aju tky'ajal Jesúa ex Noadías aju tky'ajal Binúi.

34Ax q'ij lu b'aj malet ex b'aj ajlet tkyaqil ex kyaj tz'ib'et tkyaqil tajlal iqtz.

35Te tib'ajxi, aqeju e etz tuj Babilonia ex otoq che ul tuj Jerusalén xi kyq'o'n qe oyaj patun in che kub' te Dios aju Kydios aj Israel, ex xi kyq'o'n kab'laj tal tor te jun oyaj te aq'b'il chjonte kyu'n kykyaqil aj Israel; ax ikx xi kyq'o'n 96 tman ẍne'l, 77 tal tman ẍne'l ex kab'laj chip te chojb'il il. Tkyaqil jlu patun kub' te nimb'il te Qman.

36Ex xitzun kyq'o'n aju u'j jatum tz'ib'an orden tu'n rey kye qe kawil ex gobernador tuj tx'otx' tkub'sa'n tuj tumlal telex q'ij te nima Éufrates; ex atzun qe jlu e onin kyuk'il tnam xjal tu'n tjaw b'inchet tja Dios.