Salmos 109 - Mam Huehuetenango New Ortography

Jun yol twitz Jwes ma'xix toklenB'itz tu'n David

1Nman Dios, mi'n noq tzaj tb'i'na nna'j Diose,

2porke qe xjal nik'al yol ex qe xjal mya b'a'n in che yolin mya b'a'n wi'je, ex mya ax tok aju in kyma'n.

3Txolin wi'je kyu'n qe xjal in che yolin yol te ik'b'il; in che ok tzoqpaj wi'je ex minti' wile.

4At nk'ujlalile kyi'j, atzun kye in che ok tzoqpaj wi'je; ex weye in chin na'ne Dios.

5Mya b'a'n chojb'il weye tzaj kyq'o'n te t-xel aju b'a'n nb'inchaye kye, ex te t-xel nk'ujlalile ma chin el ik'une kyu'n.

6Q'on oka jun jwes mya b'a'n tu'n tok xjal lu tuj xjel tu'n, ex tu'n tkub' t-sentens ax tu'nju xjal tok te yolil ti'j.

7Ok tok tuj xjel tz'okwit at til; tu'nxwit tyol te kolb'il tib' kub' t-sentens.

8Nik'xwit q'ij tz'anq'in ex juntlxwit txi k'monte toklen.

9E kykyaj ten qe tk'wa'l minti' kyman ex aju t-xu'jil e tok te meb'a xu'j.

10E kyok tky'ajal te mo'l ex tu'n kyel lab't qe noq jachaq. E kyex lajet tuj ttx'aqan kyja.

11Txi'wt ti'n q'ol ch'ex tkyaqilju at te. Awt xjal mi ojtzqi'n tu'n txi q'inte twitz taq'unb'en.

12Minti'wt jun xjal tzaj tz'e'y tk'u'j ti'j ex mi kyi'j qe tk'wa'l ok kykyaj ten minti' kyman.

13B'i'xwit che kub' b'aj qe tiyjil, e tnaj kyb'i te jumajx.

14Tzajxwit tna'n Qman aju mya b'a'n tb'incha tman xjal lu ex mi'nxwit kub' najsa'n til ttxu';

15kukxwit tzaj tna'n Qman aju kyil ex mi'nwt tzaj na'ntl kyb'i xjal lu tzalu twitz tx'otx'.

16Minti'x kub' t-ximan tu'n ttzaj tz'e'y tk'u'j kyi'j xjal; noq o'kx e b'aj tyajla'n qe meb'a ex qeju minti' kyipun ex qeju in che b'isun, ex e kub' tb'yo'n.

17Tu'nju mas o tajb'e tu'n t-xi tqanin jun mya b'a'n tib'aj juntl, ikxwittzun te e ttzaj mya b'a'n tib'aj. Minti' o tajb'e tu'n tkub' tky'iwla'n juntl, ex mi'nxwittzun kub' ky'iwla'n te.

18O'kx o qanin tu'n ttzaj mya b'a'n kyib'aj xjal; ik tten mya b'a'n te te ik tza'n t-xb'alun tok, okx tuj tk'u'j ik tza'n a' ex okx tuj tb'aqil ik tza'n aseyt;

19e tok txayin ti'j ik tza'n tu'n jun xb'alun ex e tok jatz'o'n tk'u'j mer ik tza'n tu'n jun sinch.

20Ikwit tten kub' kycastiw qe aj q'oj wi'je tu'n Qman ex qeju in che yolin mya b'a'n wi'je.

21Atzun teya Nman, chin t-xtalin kub'a tu'n tjaw nimsa'n tb'iya. Chin tkloma tu'nju t-xtalb'ila ex tk'ujlalila.

22Jumajx meb'a qine ex in chin b'isune, ma tzaj ta'w tuj wanmiye.

23Nib'an nkub' naje ik tza'n jun xlekun, in chinx jawo'ne tu'n kyq'iq' mer ik tza'n jun ẍplon.

24Tu'nju minti' in chin wa'ne, in che jaw lu'lun qe nqane ex ma tz'ok wi'je.

25Ma chin oke te kytzeb'l xjal. Ok tkyil qine, in xi kyyukun kywi' tu'n kyxmayin wi'je.

26Chin tonintza Nman Dios, chin tkloma tu'n tk'ujlalila,

27tu'ntzun tel kynik' xjal ti'j qa tu'na o che b'ant qe jlu tu'n tq'ab'a.

28Ma b'ant-x qa ma tzaj kyqanin mya b'a'n wib'aje, atzun teya chin b'el tky'iwla'na. Tzajxwit kych'ixwi, atzun weye chin tzalajele, aqine tmajena.

29Tzajxwit kych'ixwi qe aj q'oj wi'je. Ex e tok txayin kyi'j tu'nju ch'ixb'il ik tza'n tu'n jun xb'alun.

30Tu'n ntzi'ye kukx kxel nq'o'ne nim chjonte te Qman; kjawil nnimsa'ne kyxol nimku xjal.

31Porke ate in kolin kyi'j qe meb'a ex in che klet tu'n tuj kyq'ab' qeju in che kub' q'onte kysentens.