1 Crónicas 4 - Mam Huehuetenango New Ortography

Qe tiyjil Judá

1Qe tky'ajal Judá, atzun qe jlu: Fares, Hezrón, Carmi, Hur ex Sobal.

2Ate Sobal tman Reaía, atzunte Reaía tman Jahat ex atzunte Jahat tman Ahumai tuk'ix Lahad. Atzun qe jlu kyiyjil qe aj Zoratitas.

3Qe tky'ajal Etam, atzun qe jlu: Jezreel, Isma, ex Idbas, ex attoq jun kyanb' qe jlu, Haze-lelponi tb'i.

4Ate Penuel kyxe'chel aj Gedor, ex atzunte Ezer kyxe'chel aj Husa. Atzun qe jlu tiyjil Hur aju nej tal Efrata, aju kyxe'chel qe aj Belén.

5Ate Asur aju tman Tecoa o ten kab'e t-xu'jil, Hela tb'i jun, ex Naara tb'i juntl.

6Ate Naara kytxu' Ahuzam, Hefer, Temeni ex Ahastari. Atzun qe jlu tal Naara.

7Qe tal Hela, atzun qe jlu: Zeret, Jezoar ex Etnán.

8Ate Cos tman Anub ex Zobeba ex ax kyxe'chel qe tiyjil Aharhel, aju tky'ajal Harum.

9Ate Jabes mas ma' toklen kywitz qe txqantl terman. Jabes tb'i ok tq'o'n ttxu' ex tma: Ax tok tuk'il nim k'ixk'oj ma tzul itz'j.

10Ok ten Jabes na'l Dios, aju Kydios aj Israel, ex tma: In chin kub'sane twitza, Nman, tu'n ttzaj tq'o'na tky'iwb'ila wib'aje ex jun ntx'otx'e ma'xix; chin tonintza ex chin tkloma teju mya b'a'n, tu'ntzun mi'n nk'isb'isanjtze, chi Jabes. Ex tzaj tq'o'n Dios tkyaqil aju otoq txi tqanin.

11Ate Quelub aju terman Súa tman Mehir; atzunte Mehir tman Estón;

12atzunte Estón kyman Bet-rafa, Paseah ex Tehina, aju kub' q'onte ju tnam Nahas. Atzun qe jlu najlqe tuj tnam Reca.

13Qe tky'ajal Cenaz, atzun qe jlu: Otoniel ex Seraías. Qe tky'ajal Otoniel, atzun qe jlu: Hatat

14ex Meonotai aju tman Ofra. Ate Seraías tman Joab aju kyxe'chel qe xjal najlqe tuj chq'ajlaj Carisim; atzun tb'i chq'ajlaj ok kyq'o'n tu'nju at kynab'l tu'n kyb'inchante tkyaqil txkaj aq'untl tb'anilxix.

15Qe tky'ajal Caleb aju tky'ajal Jefone, atzun qe jlu: Iru, Ela ex Naam. Ate Ela tman Cenaz.

16Qe tky'ajal Jahalel, atzun qe jlu: Zif, Zifa, Tirías ex Asareel.

17-18Qe tky'ajal Esdras, atzun qe jlu: Jeter, Mered, Efer ex Jalón. Ate Mered o moje' tuk'il Bitia aju tme'jel Rey Faraón, ex atzun qe kyk'wa'l jlu: María, Samai ex Isba. Ate Isba tman Estemoa. Ax ikx knet juntl t-xu'jil Mered kyxol qe tiyjil Judá, ex atzun ttxu' Jared aju tman Gedor, ex ax ttxu' Heber aju tman Soco ex ax ttxu' Jecutiel aju tman Zanoa.

19Qe tal t-xu'jil Hodías aju tanb' Naham, aju tman Keila, atzun qe jlu: Dalia aju aj Garmit, ex Estemoa aju aj Maacateo.

20Qe tky'ajal Simón, atzun qe jlu: Amnón, Rina, Ben-hanán ex Tilón.

Qe tky'ajal Isi, atzun qe jlu: Zohet ex Ben-zohet.

21Qe tiyjil Sela aju tky'ajal Judá, atzun qe jlu: Er tb'i jun, aju tman Leca, ex Laada tb'i juntl, aju tman Maresa, kyuk'ix junjuntl k'loj tiyjil in che aq'nan ti'j xb'alun lino tuj Bet-asbea,

22Joacim tb'i juntl ex aqeju najlqetoq tuj Cozebá; Joás tb'i juntl ex Saraf tb'i juntl, aqeju e jaw moje' kyuk'il qe xu'j aj Moab ex e pon meltz'aj juntl maj tuj Belén, ik tza'n in tma'n tuj ojtxi tx'olb'ab'en ti'j.

23Atzun qe jlu b'inchal xar qe; najlqetoq tuj Netaim ex tuj Gedera, ex in che ajb'entoq te rey.

Qe tiyjil Simeón

24Qe tky'ajal Simeón atzun qe jlu: Nemuel, Jamín, Jarib, Zera ex Saúl.

25Ate Saúl tman Salum; atzunte Salum tman Mibsam, ex atzunte Mibsam tman Misma.

26Ate Misma tman Hamuel, atzunte Hamuel tman Zacur, ex atzunte Zacur tman Simei.

27Ate Simei o tzaj qaqlaj tky'ajal ex qaq tme'jel, atzun qe txqantl terman mya nim kyk'wa'l o tzaj, kyja'tzun qe tiyjil Simeón minti' e chmet-xix ik tza'n qe tiyjil Judá.

28Atzun najlqetoq kyuj qe tnam Beerseba, Molada, Hazar-sual,

29Bilha, Ezem, Tolad,

30Betuel, Horma, Siclag,

31Bet-marcabot, Hazar-susim, Bet-birai ex Saaraim. Atzun qe tnam lu etzanx kyu'n tej ttzyet tkawin David.

32Ex attoq jwe'tl tnam tzyu'n kyu'n, atzun qe jlu: Etam, Aín, Rimón, Toquén ex Asán,

33kyuk'ix qe aldey ate' kyi'jele, ex ponin b'aj max tuj tnam Baalat. Atzun qe lugar lu jatum e najan ex atzun kyb'i qe kyxe'chel.

34Atzun kyb'i junjun nejenel jlu: Mesobab, Jamlec, Josías aju tky'ajal Amasías,

35tuk'ix Joel ex Jehú aju tky'ajal Josibías, (ate Josibías tky'ajal Seraías, ex atzunte Seraías tky'ajal Asiel;)

36tuk'ix Elioenai, Jaacoba, Jesohaía, Asaías, Adiel, Jesimiel, Benaía,

37ex Ziza. (Ate Ziza tky'ajal Sifi, atzunte Sifi tky'ajal Alón, atzunte Alón tky'ajal Jedaías, atzunte Jedaías, tky'ajal Simri, atzunte Simri tky'ajal Semaías.)

38Aqeju ma jaw kyb'i lu, atzun qe nejenel kye junjun k'loj kyiyjil. Tu'nju o chmet nimxix kyiyjil,

39kyja'tzun e pon jyolte kywa kyẍne'l max ttxa'n tnam Gedor, tuj tumlal tjawitz q'ij te chq'ajlaj,

40ex atzun knet tb'anil k'ul kyu'n ma chixin, puro cha'x ex at nim, ex matij twitz tx'otx', segur ta', ex puro b'a'n tten. Ex atzun e najan qe tiyjil Cam ojtxi ma chixin.

41Ex tuj tq'ijlalil tej tten Ezequías te rey tuj Judá, e ul qeju ma jaw kyb'i ex kub' kyb'yo'n qe tiyjil Cam ex kub' kyxitun qe kyja, ex atzun qe e kyaj ten najal tuj kylugar, porke attoq kywa qe kyẍne'l tuj.

42Ax ikx attoq jwe' syentl xinaq ax tiyjil Simeón qe, e je'x tuj tiwitz tx'otx' Seir, ex atzun qe nejenel kye jlu: Pelatías, Nearías, Refaías ex Uziel, tky'ajal Isi qe,

43ex kub' kyb'yo'n qe tiyjil Amalec, aqeju otoq che kyaj anq'in. Atxixtzun kyponlen najal ma chixin ex ax ate'x ja'lo.