1Tujtzun toxin q'ij ok tq'o'n Ester t-xb'alun aju in ajb'en kyu'n qe kyxu'jil rey, ex okxtzun twitz tja rey aju tokx tujxi, ex axtzun kub' ten twitz tja rey jatum q'uql tokx rey tuj tq'uqb'il te kawb'il, aju tkub'sa'n tumlal ttzi ja.
2Tejtzun ttil rey lu Ester aju t-xu'jil wa'ltoq ttzi ja, jawtzun tzalaj ti'j ex xi tnuqpi'n tbastón q'an pwaq aju tzyu'n tu'n. Atzunte Ester xi laq'e' ex ok tmako'n twi bastón,
3ex atzunte rey xi tqanin te:
—¿Ti ma b'aj ti'ja nxu'jile Ester? ¿Titzun taja? Qa ma tzaj tqanina mij nkawb'ile jaku txi nq'o'ne teya.
4Atzunte Ester xi ttzaq'we'n:
—In chin kub'sane teya Tat Rey, qa b'a'n tuj twitza, tu'n t-xi'ya wa'l wuk'ile ja'lo tuj jun nintz wa'n ma b'ant wu'ne te nimb'il teya, ex tuk'ix Amán tu'n t-xi tuk'ina.
5Xitzun tma'n rey kye qe ajb'el te:
—Jurat naj kytxkontze Amán, ik tza'nx tajb'il Ester.
Kyja'tzun tten xi' rey tuk'ix Amán tuj nintz wa'n otoq b'aj tb'incha'n Ester.
6Tej matoq in che wa'n ex in che k'an vin, xi tma'n rey te Ester:
—¿Alkye tqanb'etza? Jaku txi nq'o'ne teya. Ex ¿alkye taja? Qanintza ex jaku txi nq'o'ne. Maske tzaj tqanina mij nkawb'ile jaku txi nq'o'ne teya.
7Atzunte Ester xi ttzaq'we'n:
—Kxel nqanine teya aju wajb'ile ex atzun jlu:
8Qa ax tok at-xix tk'ujlalila wi'je, Tat Rey, ex qa b'a'n tuj twitza tu'n ttzaj tq'o'na aju wajb'ile ex tu'n ttzaj tq'o'na aju kxel nqanine teya, b'ix tzula nchi'j tuj juntl nintz wa'n kb'antel wu'ne te nimb'il teya, ex tuk'ix Amán tu'n ttzaj tuk'ina. Jakutzun txi nma'ne teya alkye wajb'ile, Tat Rey, chi Ester.
B'aj tb'incha'n Amán jun tze' tu'n tjaw yob'it Mardoqueo ti'j9Nimxix in tzalaj Amán tej tetz tuj nintz wa'n, ex tzaj nim tq'oj tej tke'yinte lu Mardoqueo q'uqltoq ttzi tja rey, minti' jaw we' ex minti' jaw yukch tej tik' Amán twitz,
10ex minti' xi tyek'un tq'oj Amán. Tejtzun tpon tja, e tzajtzun ttxko'n qe tamiw; tuk'ix Zeres aju t-xu'jil tzaj ttxko'n,
11ex ok ten yolil kyuk'il kyi'j qe tq'inumab'l nimxix, kyi'j nimku tk'wa'l at, ti'j tza'n tten otoq jaw nimsa'n tu'n rey ex ti'j ju toklen ok q'o'n mas nim kywitz qe xjal ma' kyoklen ttxlaj rey ex qe ajb'el te.
12Ex xi tma'ntl:
—Ax ikx o'kxku a qine ẍin txkonjtze tu'n Ester aju t-xu'jil rey, tu'n nxi'ye tuj nintz wa'n aju ma txi tq'o'n te rey; ax ikx ma chin txkonjtze juntl maj tu'n, tu'n nxi'ye tuj juntl nintz wa'n aju kb'el tq'o'n te rey nchi'j.
13Ex tkyaqil jlu minti' tajb'en weye, tu'nju kukx tok nke'yine Mardoqueo aju xjal Judiy q'uql ttzi tja rey.
14Kykyaqiltzun qe tamiw Amán tuk'ix t-xu'jil xi kyma'n te kyja':
—B'inchama jun tze' te 25 var twa'l ex awa'n ku'xa tu'n tjaw yob'it Mardoqueo ti'j, ex prim nchi'j txi'ya qanil te rey tu'n tjaw yob'it Mardoqueo ti'j, kyja'tzun jaku txi'ya tuk'il nim tzalajb'il tuk'il rey tuj nintz wa'n, che chi.
A jlu b'a'n ela tuj twitz Amán ex xi tma'n tu'n tb'aj b'inchet ju tze'.
Who We AreWhat We EelieveWhat We Do
2025 by iamachristian.org,Inc All rights reserved.
