1 Corinto 9 - Mam Huehuetenango New Ortography

Aju toklen jun apostol

1¿Myapelo apostol qine? ¿Myapelo tzoqpi'n qine? ¿Na'nxpelo nlonteye Qajaw Jesús? ¿Myapelo tu'n waq'unb'ene ma che okslane ti'j Qajaw?

2Qa mya apostol qine tuj kywitz txqantl, atzun kyeye b'a'n kyu'ne apostol qine, porke aqeye tu'n waq'unb'ene ma che okslane ti'j Qajaw, atzun jun yek'b'il qa ax tok apostol qine.

3Atzun nkolb'il wib'e jlu kye qeju in che yolin wi'je:

4¿Maj minti' qoklene tu'n qwa'ne ex tu'n qk'ane?

5¿Maj minti' qoklene tu'n tknet qxu'jile, ax jun erman xu'j, tu'n t-xi quk'ile tuj qb'eye, ik tza'n in kyb'incha'n qe txqantl apostol, ex qe titz'in Qajaw, ex tuk'ix Pedro?

6¿O'kxpelo aqine tuk'ix Bernabé il ti'j tu'n qaq'nane tu'n tknet qwaye?

7¿Atpe jun xjal ma tz'ok te soldad tkwent-x tib'? ¿Atpe jun xjal in ku'x tawa'n tqan awal ex minti' in xi tlo'n twitz? ¿Atpe jun xjal pastor wakẍ ex minti' nne'l ch'in tk'a lech ti'j wakẍ?

8¿Kyyol xjalpe jlu ma txi nma'ne kyeye? ¿Myapetzun ikx in tma'n tuj tley Moisés?

9Porke tz'ib'a'maj tuj tley Moisés: Mi'n tz'ok tk'alo'na ttzi boys in b'et tib'aj triw tu'n tel ttxk'omil, chi tuj Tu'jil. ¿O'kxpe kyi'j boys in ximan Dios,

10ex qa tnejelxix o tma qi'j? Ex qi'j o tz'ib'anjtz jlu; porke aju xjal in ch'okin, q'uql tk'u'j ti'j tu'n tk'monte twitz taq'unb'en, ax ikx ju xjal in aq'nan ti'j triw tu'n tel ttxk'omil.

11Ikx qeye ma qo aq'nane kyxole ex ma che okslane, ¿myapelo b'a'n tu'n qk'monteye jun oyaj kyu'ne te k'a'chb'il qeye?

12Qa in kyk'mo'n mastl jun onb'il kye kyu'ne, ¿yajtzun qeye, myapelo at mas qoklene ti'j?

Ex minti' o txi qma'ne qa at qoklene ti'j jun onb'il, noq o'kx nnik'x tkyaqil qu'ne tu'ntzun mi'n tmaqet tqanil b'a'n in yolin ti'j Crist.

13¿Minti'pe b'a'n kyu'ne, qeju in che ajb'en tuj tja Dios, ax in che wa'n ti'j ju at tuj tja Dios, ex qeju in che ajb'en twitz altar, at kyoklen ti'j tu'n t-xi kychyo'n tchib'jal alumaj in kub' tib'aj altar?

14Kyja'tzun b'i'x kyaj tma'n Qajaw: Aqeju in che pakb'an ti'j tqanil kolb'il, ti'jxtzun ju aq'untl lu tu'n kyanq'in.

15Atzun weye na'nx tajb'en jlu weye, ex minti' ma txi ntz'ib'ane jlu tu'n ttzaj kyq'o'ne ch'in onb'il weye, ex mas b'a'n tu'n nkyime ex mya tu'n tel q'i'n aju in chin tzalaje ti'j.

16Qa ma txi npakb'a'ne tqanil kolb'il, mya tu'n jlu tu'n tjaw nniman wib'e, porke il ti'j tu'n nb'inchanteye. Ex b'ek'b'il nwitze qa minti' ma txi npakb'a'ne tqanil kolb'il.

17Ex qa ma nb'inchaye jlu tu'n wexe wajb'il, atlo twi nk'u'je ti'j; qatzun mya tu'n wexe wajb'il ma nb'inchaye, qa ikju at juntl ma q'mante weye tu'n waq'nane ti'j.

18¿Alkyetzun twi nk'u'je? Atzun jlu ok nxi'ye pakb'alte tqanil kolb'il, tu'n t-xi nma'ne kye xjal noq kukx, tu'n mi'n tajb'en wu'ne aju woklene tu'n wanq'ine ti'j tqanil b'a'n.

19Kyja'tzun, maske tzoqpi'n qine kye kykyaqil, pero ma tz'ok nq'on wib'e te kymajen kykyaqil tu'ntzun nkamb'anteye nimku xjal tu'n kyokslan ti'j Crist.

20Nno'k nq'on wib'e te xjal judiy ok in chin tene kyxol xjal judiy, tu'n nkamb'anteye qe xjal judiy; ma tz'ok nq'on wib'e ik tza'n atine tjaq' tley Moisés kyxol qeju ate' tjaq' tley, maske mya tjaq' tley atine, tu'ntzun nkamb'anteye qeju ate' tjaq' tley.

21Ok in chin tene kyxol txqantl xjal, qeju minti' tley Moisés kyuk'il, nno'k nq'on wib'e ik tza'n minti' ley wuk'ile, maske at tley Dios wuk'ile ex atine tjaq' tley Crist, tu'ntzun nkamb'anteye qe txqantl xjal minti' tley Moisés kyuk'il.

22Ma tz'ok nq'on wib'e ik tza'n minti' wipune kyxol qeju minti' kyipun, tu'ntzun nkamb'anteye qeju minti' kyipun; te tkyaqil ma tz'ok nq'on wib'e kyxol kykyaqil xjal, tu'ntzun kyklet junjun wu'ne tuj nimku tumel.

23In nb'incha'ne jlu tu'n tlaj tqanil kolb'il, tu'ntzun nk'monteye xtalb'il in tzaj tu'n tqanil b'a'n junx kyuk'il txqantl erman.

24¿Minti'pe b'a'n kyu'ne, aqeju in che qelan tuj ojqelb'il, kykyaqil in che qelan, ex noq junx in kamb'ante ju oyaj? Ikxtzun kyeye, che qelane tu'ntzun kykamb'anteye jun oyaj.

25Ex kykyaqil qeju nno'kx kyq'on kyib' tuj jun saqchb'il, in kyjak'un kyib' ti'j tkyaqil; qe xjal lu nno'k tilil kyu'n tu'n kykamb'ante jun oyaj jurat in b'aj, ex atzun qe nno'k tilil qu'n tu'n qkamb'ante jun oyaj mlay b'aj.

26Kyja'tzun weye in chin qelane ik tza'n jlu, minti' in chin el takje ti'j; ikxtzun in chin sweltyine, minti' in chin b'ujine tuj kyq'iq'.

27Ex nno'k nk'ixb'isa'ne nximlale ex nno'k nq'o'ne te nmajene, mya yajku ax qine mi'n chin k'mete ex otoq txi npakb'a'ne kye txqantl.