1Ate Abimelec aju tky'ajal Jerobaal xi' tuj Siquem tu'n tyolin kyuk'il qe t-xib'en ttxu', ex kyuk'il kykyaqil qeju at t-xilen tman ttxu' kyuk'il, ex xi tma'n kye kyja':
2—Kyb'inchame xtalb'il, kymanxe kye kykyaqil xjal aj Siquem kyja': ¿Alkye b'a'n tuj kywitze, b'a'npe tu'n kykawin kykyaqil qeju 70 tky'ajal Jerobaal kyib'aje, ex qa mas b'a'n tu'n tkawin junx xjal kyib'aje? Che ximane ti'j qa ax kyermaniye qine, chi Abimelec, che chikuye.
3Tu'nju at t-xilen Abimelec kyuk'il qe xjal lu, kyja'tzun o moje' kyyol tuk'il, e je'xtzun q'malte kye kykyaqil xjal aj Siquem tu'n kyok lpe' ti'j, ex b'a'n e'la tuj kywitz.
4Ex mya noq o'kx jlu, ax ikx etz kyi'n 70 saq pwaq tuj tja kydios Baal-berit tb'i, ex xi kyq'o'n te Abimelec. Tu'ntzunju pwaq lu, e je'x tmajna'n Abimelec junjun xjal mya b'a'n ex ky'aj qe, e je'xtzun qe xjal lu tuk'il Abimelec,
5e pon tuj tnam Ofra jatum otoq najan qtzan tman, ex twi' junx ab'j kub' kyb'yo'n qe 70 terman Abimelec. O'kx te Jotam aju tch'i'p Jerobaal xi tewan naj tib' ex o klet.
6Te tib'ajxi jlu, kykyaqil aj Siquem ex qe aj Bet-milo ok kychmon kyib' t-xe tze' k'ol, twitz ab'j xjan at tuj Siquem, ex atzun ok kyq'o'n toklen Abimelec te rey.
7Tejtzun tb'inte Jotam jlu, jax twi witz Gerizim ex maxtzun jaw sch'in kyuw wen tu'ntzun kyb'inte kykyaqil xjal:
—Chin kyb'intze aqeye xjal aj Siquem tu'ntzun ikx kyeye tu'n kytzaj b'i'ne tu'n Dios.
8At jun maj o kyajb'e qe tze' tu'n tok jun kyrey, ex xi kyma'n te tze' olivo tu'n tok te kyrey.
9Atzunte tze' olivo xi tma'n kye: Mlay, ex qa ma chin oke te kyreye, il-lo ti'j tu'n mi'n tel chib'j aseyt wi'je aju in ajb'en te nimb'il te Dios ex kye xjal.
10Xitzun kyma'n qe tze' te tqan higo tu'n tok te kyrey.
11Atzunte tqan higo xi tma'n kye: Mlay, ex qa ma chin oke te kyreye, il-lo ti'j tu'n mi'n tok nwitze aju puro chi' ex puro k'ok'j tlo'njtz.
12Xitzun kyma'ntl qe tze' te tqan uva tu'n tok te kyrey.
13Atzunte tqan uva xi tma'n kye: Mlay, ex qa ma chin oke te kyreye, il-lo ti'j tu'n mi'n tel nwitze aju nno'k te vin ex in che tzalaj xjal ti'j, ax ikx te Dios.
14Te mankb'iltzun xi kyma'n qe tze' te jun wi' ch'i'x tu'n tok te kyrey.
15Atzunte ch'i'x xi tma'n kye: Qa axix tok kyaje tu'n woke te kyreye, il ti'j tu'n kykub' tene kykyaqile tjaq' nxlekumale, ex qatzun mi'n kyaje tu'n kykub' tene tjaq' nxlekumale, k'elel jukpaj jun q'aq' wi'je tu'n kyb'aj naj qe tze' wi'ten ate' twi witz Líbano, chi ch'i'x.
16Atzun ja'lo kxel nqanine kyeye: ¿Tujpe tumel ex tz'aqlxixpe aju ma kyb'inchaye tu'nju ma tz'ok kyq'o'ne Abimelec te kyreye? ¿Ex mape kyb'inchaye b'a'n te Jerobaal ex kye qe tk'wa'l, ik tza'nx te o tb'incha b'a'n kyeye?
17Porke o q'ojin qtzan nmane ex xi tq'on tib' tu'n tkyim tu'n kykolpete tu'n tuj kyq'ab' aj Madián;
18atzun kyeye ma che ok tzoqpaje kyi'j qe terman nmane, ex twi' junx ab'j ma che kub' kyb'yo'ne qeju 70 tky'ajal, ex ma tz'ok kyq'o'ne Abimelec te kyreye, aju tal tkab' t-xu'jil, noq tu'nju at t-xilen xjal lu kyuk'ile.
19Ex kxel nma'ne kyeye ja'lo: Qa tuj tumel ex qa tz'aqlxix aju ma kyb'inchaye ti'j Jerobaal ex kyi'j qe tk'wa'l, che tzalajxtzune tuk'il Abimelec, ax ikx te Abimelec tu'n ttzalaj kyuk'ile.
20Qatzun minti' ma b'ant kyu'ne ikju, e tel jukpaj jun q'aq' ti'j Abimelec, tu'ntzun kynaj kykyaqil qe xjal najl tuj Siquem kyuk'ix qe xjal najl tuj Bet-milo, ex e tel jukpaj jun q'aq' ti'j Siquem ex ti'j Bet-milo tu'n tnaj Abimelec.
21Tb'ajlenxitzun tma'n Jotam jlu, el oq ex xi' najal tuj lugar Beer, ex tzaj t-xob'il twitz Abimelec aju terman.
22Ox ab'q'i e ten aj Israel tjaq' tkawb'il Abimelec,
23ex tzaj t-sama'n Dios jun pa'j tib'il kyxol aj Siquem tuk'il Abimelec, tu'n tjaw kyi'n kyib' ti'j,
24tu'ntzun tchjet tu'n Abimelec aju kykub'len tb'yo'n 70 tky'ajal Gedeón, ex tu'n tchjet kyu'n aj Siquem tu'nju e ok ten onil tuk'il Abimelec tu'n kykub' tb'yo'n qe terman.
25Qe xjal aj Siquem jaw kyi'n kyib' ti'j Abimelec, kyja'tzun kub' kyq'o'n junjun xjal kywi' qe witz in xi kyewan kyib' ttxlaj b'e tu'n kyelq'an kyi'j xjal in che b'et tuj b'e. Ex o tb'i Abimelec jlu.
26At jun q'ij pon Gaal aju tky'ajal Ebed najal tuj Siquem, kyuk'ix qe terman, ex ok qe' kyk'u'j aj Siquem ti'j Gaal.
27Tej tpon tq'ijlalil tu'n tjaw chmet twitz uva, e je'x tuj kojb'il xilil twitz uva, el kyyatz'o'n ta'l tu'n tok te vin ex kub' kyik'sa'n jun ninq'ij, e wa'n ex e k'an tuj tja kydios, ex e ok ten yolil mya b'a'n ti'j Abimelec.
28Atzunte Gaal xi tma'n: ¿Titzun toklen Abimelec tuj twitz? Baqa mya jun tky'ajal Gedeón jlu ex ate Zebul onil te. Atzun qe aj Siquem qo', ¿tza'ntzun tten tu'n qok te kymajen xjal lu? Mas b'a'n tu'n qok te tmajen Hamor aju kub' xe't tnam Siquem tu'n, ex mya a tu'n qajb'en te Abimelec.
29Noqwit aqine nejenel kyeye tuj tnam lu, ja'lwitlo tz'ex nlajo'ne Abimelec, ex jakulo txi nma'ne te: Chmon b'aja qe t-soldadiya ex tzaja q'ojlel quk'ile, nchiloye.
30Atzunte Zebul aju gobernador te tnam, tej tb'inte tyol Gaal, tzaj nim tq'oj,
31ex xi t-sama'n tqanil te Abimelec kyja': Ate Gaal aju tky'ajal Ebed o tzul tuj Siquem kyuk'ix qe terman, ex nib'an tb'aj tconsejarin kyk'u'j xjal tu'n tjaw kyi'n kyib' ti'ja.
32Kyja'tzun, b'a'n tu'n ttzaja te qonik'an kyuk'ix qe t-soldadiya, ex kyewanx kyib'e tuj kojb'il.
33Oktzun qsqix ex ok tqoptz'aj q'ij, b'ixtzun che ok tzoqpaje kyi'j qe xjal tuj tnam, ex oktzun tetz Gaal kyuk'ix txqantl xjal tu'n kyq'ojin ti'ja, b'ixtzun tb'inchaya ti'j Gaal noq alkye b'a'n tuj twitza, chi tqanil xi t-sama'n Zebul te Abimelec.
34Kyja'tzun ate Abimelec kyuk'ix kykyaqil qe t-soldad, e tzaj te qonik'an ex xi kyewan kyib' ti'jele tnam Siquem. Te kyaje k'loj e ela kyb'aj.
35Tejtzun tetz Gaal ttzi tlamel tnam, etz Abimelec kyuk'ix qe t-soldad jatum kyewantoq kyib'.
36Tejtzun tlonte Gaal qe t-soldad Abimelec, xi tma'n te Zebul:
—Ke'yinxa, lu txqan xjal kyja' kyku'tz kywi witz.
Xi ttzaq'we'n Zebul kyja':
—Noq t-xlekumal witz jlu ex mer ik tza'n xjal nne'la tuj twitza.
37Atzunte Gaal xi tma'ntl:
—Ax ikx ma twi' tal witz aju tok tb'i Tmux Tx'otx', lu txqan soldad kyja' kyku'tz. Ex lu juntl k'loj kyja' kytzaj tuj b'e nnik' t-xe k'ol kye aj q'ij.
38Xitzun tma'n Zebul:
—¿Ti ma tzaj ti'ja? Aya o q'mante qa ate Abimelec minti' toklen qi'j tu'n qok te tmajen. Lu qe t-soldad lu aqeju mya nim in che ela tuj twitza. Wab'an kub' tib'a ja'lo tu'n tq'ojina kyi'j.
39Kub'tzun nej Gaal kywitz aj Siquem tu'n tq'ojin ti'j Abimelec,
40ex el oq Gaal twitz Abimelec ex xi lpe' Abimelec ti'j; nim xjal e kub' tejxi kypon ttzi tlamel tnam.
41Ax kyaj ten Abimelec tuj lugar Aruma, atzunte Gaal kyuk'ix qe terman e je'tz tlajo'n Zebul tuj Siquem.
42Tujtzun juntl q'ij e je'x aj Siquem tuj kojb'il. Tej tb'inte Abimelec jlu,
43e kub' tpa'n qe t-soldad te ox k'loj ex xi kyewan kyib' tuj kojb'il. Tejtzun tke'yinte Abimelec tej kyetz aj Siquem tuj tnam, e je'tztzun Abimelec jatum kyewan kyib' ex e ok tzoqpaj kyi'j aj Siquem.
44Ate Abimelec tuk'ix jun k'loj soldad uk'in tu'n, e je'x t'ikpaj naj tu'n kykub' ten ttzi tlamel tnam, atzun qe kab'etl k'loj soldad e ok tzoqpaj tu'n tkub' kyb'yo'n qe xjal in che b'et tuj kojb'il.
45Ate Abimelec kukxtoq tq'ojin kyi'j aj Siquem tuj enter q'ij, ex kub' ti'j tnam tu'n. B'i'x b'aj naj tnam tu'n, e kub' tb'yo'n kykyaqil xjal najl tuj, ex xi tchitun atz'an tuj enter tnam.
46Qe xjal ate' tuj ja ma' twa'l te kykolb'il kyib' at tuj Siquem, tej kyb'inte aju otoq tb'incha Abimelec, e je'x klolte kyib' tuj tja kydios El-berit tb'i.
47Tejtzun tb'inte Abimelec qa otoq pon kychmon kyib' kykyaqil xjal tuj ja lu,
48xi'tzun twi witz Salmón kyuk'ix kykyaqil qe t-soldad, ex ku'tz ttx'emin jun tq'ab' tze' tu'n jun siwb'il k'uxb'il, jax tq'o'n tq'ab' tze' lu twi t-semil, ex xi tma'n kye kykyaqil t-soldad tu'n kyb'inchante jurat naj ik tza'n te otoq tb'incha.
49Kykyaqiltzun qe t-soldad ku'tz kytx'emin jun tq'ab' kytze' ex e ok lpe' ti'j. Tejtzun kypon jatum ta' tja kydios xjal aju ma' twa'l, ok kyb'uyb'a'n kykyaqil tq'ab' tze' ti'j ja ex ok kyqoptz'i'n q'aq' ti'j. Tu'nju q'aq' lu e b'aj naj kykyaqil xjal aj Migdal-siquem, ex aju tajlal xjal e naj, aqeju ate' tuj ja ma' twa'l te kykolb'il kyib' at tuj Siquem, b'alo jun mil kyb'et; at xinaq ex xu'j.
50Te tib'ajxi jlu, xi' Abimelec tuj tnam Tebes, ok tzoqpaj ti'j ex kub' ti'j tnam tu'n.
51Tuj tmij tnam lu tkub' jun ja ma' twa'l, ex tujtzun ja lu okx kyewan kyib' kykyaqil qe xjal najl tuj tnam, qe xinaq ex qe xu'j. Kyaj kylamo'n ttzi ja wen ex e jax max twi ja,
52ex pon Abimelec max ttzi tlamel ja ma' twa'l tu'n tok tzoqpaj kyi'j xjal. Kyja'toq tok tqoptz'i'n q'aq' ti'j ja,
53ku'tz xo'n jun kya' tu'n jun xu'j, ex tib'ajku twi' Abimelec kub'il tz'aq kya' ex b'i'x el k'ab'chaj twi' tu'n.
54Tzajtzun ttxko'n naj Abimelec aju onil te tuj q'oj ex xi tma'n te: Q'in jatz t-spadiya ex chin tb'yonkuya, ex mi'n waje tu'n kymante xjal wi'je qa tu'n jun xu'j otoq chin kub' b'yo'ne, chi Abimelec. Atzunte ju onil te jatz ti'n t-spad, aq'pon t-xayu'n ti'j ex b'i'x elpun ma ti'jxi; kyja'tzun tten kyim Abimelec.
55Tejtzun kyke'yinte aj Israel ya otoq kyim Abimelec, e aj kyja.
56Kyja'tzun tenb'a tu'n Dios tu'n t-xelin ti'j Abimelec aju mya b'a'n otoq b'ant tu'n ti'j tman, tu'nju e kub' tb'yo'n 70 terman aqeju ax tky'ajal tman.
57Ax ikx o tb'incha Dios kyi'j aj Siquem tu'n tchjet tkyaqil mya b'a'n kyu'n, aju otoq kyb'incha. Kyja'tzun tten o japun castiw o tma Jotam aju tky'ajal Jerobaal.
Who We AreWhat We EelieveWhat We Do
2025 by iamachristian.org,Inc All rights reserved.
