Jueces 7 - Mam Huehuetenango New Ortography

Kub' kyi'j aj Madián tu'n Gedeón

1Ate Gedeón aju otoq tz'ok q'o'n tb'i Jerobaal jaw we' primxix wen kyuk'ix kykyaqil xjal ate' tuk'il, ex e je'xtzun tu'n kykub' ten jatum ta' ju twi a' Harod. Atzun qe aj Madián otoq che kub' ten tumlal tb'anq'ab' q'ij tuj chq'ajlaj t-xe witz More.

2Xitzun tma'n Qman te Gedeón: Nim xjal uk'in tu'na, ex qa ma che'x nq'o'ne qe aj Madián tuj kyq'ab' tu'n tkub' kyi'j kyu'n, jakulo b'ant tjaw kyniman kyib' nwitze, ex jakulo kyma qa tu'n kyex kyipumal otoq che klet.

3Q'manxa kye xjal kyja': Alkye qeju in che lu'lun tu'n kyxob'il, b'a'n tu'n kyku'tz twi witz Galaad ex tu'n kyaj kyja.

E ajtzun 22 mil xjal kyja ex noq laj mil e kyaj ten.

4Ex tzaj tma'ntl Qman: Ax nim jlu. Q'inxa qe tu'n kyk'an a', ex atzunwe qin chin okel q'onte kye tuj malb'il ma chixin, ex kxel nma'ne teya alkyeqe che xe'l tuk'ila ex alkyeqe mi'n che'x.

5E je'xtzun ti'n Gedeón qe xjal tu'n kyk'an a', ex tzaj tma'n Qman te kyja': Pa'n ela qeju jato'n in jatz kyk'a a' tu'n kyq'ab' ex leq'an che k'an ik tza'n tx'yan, ax ikx pa'n ela qeju in che kub' ẍmeje' tu'n kyk'an a'.

6Ox syent b'ant kyb'et qeju jato'n jatz kyk'a a' tu'n tokx tuj kytzi' ex leq'an che k'an. Atzun qe txqantl e kub' ẍmeje' tu'n kyk'an a'.

7Tzajtzun tma'ntl Qman te Gedeón: Kyu'n qeju ox syent xinaq lu, aqeju leq'an che k'an a', che kletele wu'ne, ex che xel nq'o'ne qe aj Madián tuj kyq'ab'e tu'n tkub' kyi'j kyu'ne. Atzun qe txqantl b'a'n tu'n kyaj kyja.

8Xitzun tma'n Gedeón kye txqantl xjal tu'n kyaj kyja, ex na'nxtoq kyaj tu'n tkyaj kyq'o'n kywa ex qe tkach ẍne'l kye kyuk'il. O'kx qeju ox syent xinaq otoq che jaw t-sk'o'n e kyaj ten tuk'il, ex e kub'tzun ten max kyib'ajxi qe aj Madián aqeju otoq che kub' ten tuj chq'ajlaj.

9Tujtzun qonik'an lu tzaj tma'n Qman te Gedeón: We'ktza ex tku'xa tu'n tok tzoqpaja kyi'j aj Madián, ok che xel nq'o'ne tuj tq'ab'a tu'n tkub' kyi'j tu'na.

10Qatzun at t-xob'ila tu'n tok tzoqpaja kyi'j, b'a'n tu'n tku'x naja tuj kycampament aj Madián tuk'ix Fura aju tmajena,

11ex b'ina kyi'j ti in kyma'n, ex tu'ntzun jlu ok tna'ya k'okel mastl tipuna tu'n tok tzoqpaja kyi'j.

Ku'xtzun Gedeón tuk'ix Fura aju tmajen max jatum kykub' qe xq'uqil, ti'jele kycampament aj q'oj.

12Nojnitoq tuj chq'ajlaj kyu'n aj Madián, aj Amalec ex qe xjal te tjawitz q'ij, mer ik tza'n txqan ẍplon nim kyb'aj. Attoq nim kychej camey, mer ik tza'n ttxa tz'a'n ttzi mar.

13Tejtzun tpon laq'e' Gedeón niqayin ti'j lugar jatum kykub' aj q'oj, o tb'i lu jun soldad in q'ma'ntoq ti'j jun twitzik' te juntl, ex chi kyja':

—Ma tz'ok yek'un tuj nwitze lu jun pan sebad in tol toktz tuj qcampament, ex tej sul tz'aq ti'j xb'alun ja, b'i'x xkub' tz'aq xb'alun ja tu'n.

14Atzunte tuk'il tzaj ttzaq'we'n:

—A jlu mya tilo t-xilen; aju pan, atzun t-xilen t-spad Gedeón aju tky'ajal Joás aju aj Israel. Ate Dios kxel q'onte kye aj Madián tuj tq'ab' Gedeón, kyuk'ix kykyaqil qe kyuk'il, tu'n tkub' kyi'j tu'n.

15Tejtzun tb'aj tb'i'n Gedeón tza'n tten witzik xi q'ma'n ex tza'n tten pujb'il ti'j, ok ten k'ulul te Qman. Te tib'ajxi jlu aj meltz'aj Gedeón tuj kycampament aj Israel ex xi tma'n kye:

—Che we'ktze, porke ma che tzaj tq'o'n Qman qe aj Madián tuj qq'ab'.

16E kub'tzun tpa'n Gedeón qeju ox syent xinaq te ox k'loj, ex xi tq'o'n jun tkach ẍne'l ex jun ẍoq' te teyle junjun. Aqeju ẍoq' minti' a' kyuj, noq o'kx ttxa'n tzaj in k'ant kyuj.

17Ex xi tma'n kye:

—Ok npone tuj juntl pak' kycampament aj q'oj, b'ix chinx kyke'yine ex kyb'inchame ik tza'n weye kb'antel wu'n.

18Oktzun tok qq'ajtza'ne kach, b'ixtzun tz'ok kyq'ajtza'n kyeye ti'jele tkyaqil kycampament aj q'oj, ex b'ix che jaw sch'ine kyja': Tu'n Qman ex tu'n Gedeón, che chikuye.

19Kyja'tzun tten, ate Gedeón kyuk'ix jun syent xinaq uk'in tu'n, e pon tuj juntl pak' kycampament aj q'oj tej matoq kyb'ajlen ch'expu'n qeju in che xq'uqin tu'n tpon te tmij aq'b'il. Oktzun kyq'ajtza'n qe tkach ẍne'l ex e kub' kypa'n qe ẍoq' q'i'n kyu'n,

20ex junx e ok q'ajtza'n qe tkach ẍne'l kyu'n ox k'loj xjal ex e kub' kypa'n qe ẍoq'. Q'i'mlex ttxa'n tzaj kyu'n tuj kynayaj ex atzun qe tkach ẍne'l q'i'n tu'n kyb'anq'ab', ex e jaw sch'in kyja': Aju q'oj lu tu'n Qman ex tu'n Gedeón.

21Minti' e yukch qe aj Israel tuj kylugar ti'jele kycampament aj Madián, ex kykyaqiltzun soldad aj Madián e jaw sch'in ex e je'l oq.

22Atzun kye ox syent aj Israel kukx ok kyq'ajtza'n qe tkach ẍne'l, ex tu'n Qman e ok ten qe aj q'oj q'ojlel tu'n spad kyxolx tuj kycampament, ex e je'ltzun oq tu'n kypon max tuj lugar Bet-sita tuj b'e in xi' tumlal Zerera, ex max e pon oq tuj tmojonil lugar Abel-mehola aju tkub' junx tuk'il lugar Tabat.

23E tzajtzun txko'n qe tiyjil Neftalí, kyuk'ix qe tiyjil Aser ex kykyaqil qe tiyjil Manasés tu'n kyxi lpe' q'ojlel kyi'j aj Madián.

24Xi t-sama'n Gedeón qe t-sanjel tuj tiwitz tx'otx' kye aj Efraín, ex xi kyma'n tu'n kyku'tz qe xinaq q'ojlel kyi'j aj Madián, ex tu'n kykub' ten ttzi nima Jordán jatum at qe xajb'il a', ex tu'n kypon max tuj lugar Bet-bara akux na'nxtoq kypon qe aj Madián. Kyb'inchatzun qe tiyjil Efraín ik tza'n otoq tzaj q'ma'n kye.

25E tzyet kab'e nejenel kye aj Madián kyu'n, jun Oreb tb'i, atzun juntl Zeeb tb'i. Ate Oreb, atzun kub' b'yo'n twi' jun pik Oreb tb'i, atzunte Zeeb, atzun kub' b'yo'n tuj putz'b'il uva Zeeb tb'i. E ok lpe' q'ojlel kyi'j aj Madián tu'n tkub' kyi'j, ex xi kyi'n twi' Oreb tuk'ix twi' Zeeb tuk'il Gedeón, max jlajxi nima Jordán.