1Attoq jun xinaq puro mya b'a'n, tiyjil Benjamín, Seba tb'i, ex tky'ajal Bicri, attoq tuj Gilgal. Ok tq'ajtza'n Seba chun tu'n kyb'inte tnam xjal, ex xi tma'n kye kyja': Minti' qoklen ex minti' qetzb'il tuk'il David aju tky'ajal Isaí. Aqeye aj Israel, b'a'n tu'n kyaje kyjaye kykyaqile.
2Kykyaqiltzun qe xinaq aj Israel kyaj kolin David kyu'n, tu'n kyxi lpe' ti'j Seba aju tky'ajal Bicri. Atzun kye aj Judá, xi'ynix ttzi nima Jordán ponin b'aj max tuj Jerusalén, kukx e ok lpe' ti'j kyrey.
3Tejtzun taj meltz'aj David tuj tja ma tuj Jerusalén, e tzaj ti'n qeju laj t-xu'jil aqeju otoq che kyaj tq'o'n xq'uqil tja, ex e okx tq'o'n tuj juntl ja ex e ok tq'o'n xjal te kwentil kye. Kukx e ok tkwentin rey qe xu'j lu, ex minti' kub' tmojb'an tib' kyuk'il. Kyja'tzun e kyaj tlamo'n qe ex e ten ik tza'n meb'a xu'j qe tejxi kykyim.
4Te tib'ajxi xi tma'n rey te Amasa kyja':
—Txkontza qe xinaq aj Judá, ex tuj ox q'ij ja'lo b'ix tzula tzalu kyuk'ix qe xjal tuk'ila.
5Xi'tzun Amasa chmolte kye aj Judá, ex mas nim tyemp ten ik tza'nju otoq b'ant ti'j.
6Xitzun tma'n David te Abisai:
—Ate Seba kb'antel mas mya b'a'n qi'j tu'n ik tza'n te Absalón. Kyja'tzun q'inxa qe nsoldadiye ex lpexa ti'j tu'ntzun mi'n tokx tklon tib' kyuj qe tnam tok muro kyi'j, ex tu'n jlu jaku txi tzoqpaj qu'n.
7Qe xinaq ate' tuk'il Joab, kyuk'ix qe aj Cereteo ex qe aj peleteo aqeju xq'uqil tja rey, ex kyuk'ix qe soldad kyuw kyk'u'j tuj q'oj, e etz tuj Jerusalén tuk'il Abisai tu'n kyok lpe' ti'j Seba.
8Tej ch'ixtoq kypon niqayin jatum ta' nintz pik at tuj Gabaón, etz Amasa kanul kyi'j. Ate Joab toktoq t-xb'alun in ajb'en tuj q'oj; te ti'jxi toksa'n jun k'alb'il tk'u'j, ex toktoq jun spad tk'u'j xi'yni tuj tjayil. Tej t-xi laq'e' Joab tuk'il Amasa, jatz tz'aq t-spad tuj tjayil,
9ex tzaj tzyu'n Amasa ti'j t-xmatz tu'n Joab tu'n tb'anq'ab' tu'n tel ttz'ub'an twitz, ex xi tqanin te:
—¿B'a'npe ta'ya erman?
10Atzunte Amasa minti' ok tq'o'n tkwent ti'j spad q'i'ntoq tu'n Joab tuj tq'ab'. Jurattzun xi t-xayu'n Joab ju spad tuj tk'u'j, ex b'i'x e kub' tz'aq kykyaqil qe tuj tk'u'j twitz tx'otx'. Minti'tl xi' Joab b'antzalte, porke tu'n jlu b'i'x o kyim. Atzunte Joab tuk'ix Abisai aju terman, e ik' tu'n kyxi lpe' ti'j Seba aju tky'ajal Bicri, tu'n tkub' ti'j kyu'n.
11At jun kyxol qe t-soldad Joab kub' we' ttxlaj t-ximlal Amasa ex xi tma'n kyja':
—Alkye tq'on tib' tuk'il Joab ex tuk'il David, lpextzun ti'j Joab.
12Ex ate Amasa tkub'sa'ntoq t-ximlal tuj b'e ex nojni ti'j tu'n chik'; ex tej ttil soldad qa kykyaqil xjal in che kub' we' ti'j, ik'x ti'n t-ximlal Amasa ttxlaj b'e ex ik'x tmaqsi'n tib'aj tu'n jun xb'alun, porke o til kykyaqil xjal in che pon ax e kub' we' ke'yilte.
13Te tib'ajxi, tej tik'len q'i'n tuj b'e, e ik'tzun kykyaqil qeju in che b'ettoq tuk'il Joab tu'n kyxi lpe' ti'j Seba, tu'n tkub' ti'j kyu'n.
14Ate Seba ik' tuj kytx'otx' kykyaqil kyiyjil aj Israel tejxi tpon max tuj tnam Abel-bet-maaca, ex kykyaqil qeju tiyjil Bicri b'aj kychmon kyib' ex e okx lpe' ti'j tuj tnam.
15Tejtzun kypon qe xinaq uk'in tu'n Joab tuj tnam Abel-bet-maaca, ok kyjokun tx'otx' ti'j muro te ti'jxi tu'ntzun kyokx tu'n kyok tzoqpaj ti'j tnam, ex tu'n kykyaqil o kyajb'e tu'n tkub' kyxitun muro.
16Attoq jun xu'j at tnab'l etz sch'in tujxi muro ex tma kyja':
—Kyb'inchame xtalb'il, chin kyb'intze. Chin kyb'intze. Kyq'manxe te Joab tu'n ttzaj laq'e' ex waje tu'n nyoline tuk'il.
17Tejtzun tpon laq'e' Joab, xi tqanin xu'j te:
—¿Apeya Joab?
—Aqine, chi Joab xi ttzaq'we'n.
Xitzun tma'n xu'j te:
—B'intza qe nyole, aqine ajb'el teya.
—Jaku txi nb'i'ne, chi Joab xi ttzaq'we'n.
18Tzyettzun tyolin xu'j ex tma:
—Ojtxi attoq jun yol in q'manjtz kyja': Qa at jun taj tu'n tb'inte jun ti'xti, b'a'n tu'n txi tqanin tuj tnam Abel. Ex kyja'tzun in b'ant ti'j jun ti'xti.
19Aju qtanmiye, atzun jun tnam mib'an q'ojin ex tz'aqlxix kyxol aj Israel, ex ma' toklen. Maske ikju, atzun teya taja tu'n tkub' t-xituna. ¿Tiqu'ntzun tajb'ila tu'n tnaj aju tnam etzan tu'n Qman?
20Xitzun ttzaq'we'n Joab:
—Minti' in chin ximane ti'j jlu. Mya we nximb'etz tu'n tkub' nxitune ex mi tu'n tnaj.
21Mya ikju, noq tu'nju at jun xinaq najl tuj tiwitz tx'otx' kye aj Efraín, Seba tb'i, aju tky'ajal Bicri, ma jaw ti'n tib' ti'j rey David. Q'ontza o'kx ju xinaq lu weye, ex jakutzun chin el laq'e'ye ti'j tnam, chi Joab.
—Jaku tz'ex qxo'ne twi' teya max twi muro, chi xu'j xi ttzaq'we'n te Joab.
22Xi'tzun xu'j yolil tuk'il nab'l kyuk'il kykyaqil xjal tuj tnam, ex el kytx'emin twi Seba ex ex kyxo'n te Joab. Xitzun tma'n Joab tu'n tok q'ajtza'n chun tu'n kyel laq'e' xjal, ex e je'ltzun laq'e' ti'j tnam, ex teyle junjun aj tja, atzunte Joab aj meltz'aj tuj Jerusalén tu'n tyolin tuk'il rey.
Qe xjal at kyoklen ttxlaj David 2 Samuel 8.15-18; 1 Crónicas 18.14-1723Ate Joab nejenel kye kykyaqil soldad aj Israel, atzunte Benaía aju tky'ajal Joiada, atzun nejenel kye aj Cereteo ex aj peleteo aqeju xq'uqil te rey.
24Atzunte Adoram nejenel tuj aq'untl in che ok lajwersin xjal ti'j tu'n tb'ant, ex atzunju aj tz'ib'al te rey, atzun Josafat aju tky'ajal Ahilud.
25Atzunte Seva juntl aj tz'ib'al, ex ate Sadoc tuk'ix Abiatar pal qe.
26Atzunte Ira aju aj Jair ax ikx in ajb'en te pal te David.
Who We AreWhat We EelieveWhat We Do
2025 by iamachristian.org,Inc All rights reserved.
