Josué 7 - Mam Huehuetenango New Ortography

Aju il o tb'incha Acán

1Attoq jun xinaq kyxol tiyjil Judá Acán tb'i, tky'ajal Carmi, tal tchman Zabdi ex ttxk'a tchman Zera tzaj ti'n junjun ti'xti aju otoq tma Dios b'i'x tu'n tnaj, ex tu'n tlaj jlu kykyaqil aj Israel e ok te at kyil twitz Qman. Kyja'tzun tzaj nimxix tq'oj Qman kyi'j aj Israel.

Kub' kyi'j aj Israel kyu'n xjal te tnam Hai

2Xi t-sama'n Josué junjun xinaq tuj tnam Jericó tu'n kypon tuj tnam Hai, aju tkub' tuj tjawitz q'ij te Betel, niqayin ttxlaj tnam Bet-avén, tu'n tb'aj kyke'yin lugar. E je'xtzun qe xinaq ex b'aj kyke'yin tnam Hai,

3ex tej kyul meltz'aj xi kyma'n te Josué: Mya il ti'j tu'n kyxi' kykyaqil xjal tu'n kyok tzoqpaj ti'j tnam Hai, cabal qa ma txi' kab' ex qa ox mil xinaq tu'n ttzyet tnam lu. Mi'n txi t-sama'na kykyaqil tnam xjal ex nik'xi kyb'aj xjal ate' tuj tnam lu, che chi.

4Kyja'tzun, b'alo ox mil xinaq aj Israel xi' tu'n kyok tzoqpaj ti'j tnam Hai, ex aqe kub' kyi'j kyu'n qe xjal te tnam Hai ex e b'jel oq qe kyu'n;

5kub' kyb'yo'n b'alo 36 aj Israel ex e ok lpe'tl kyi'j txqantl, tzyet-x max ttzi tlamel tnam tejxi kypon max tuj lugar Sebarim tb'i, ex tuj b'e in ku'tz kub'l atzun kub' kyi'j kyu'n. Tu'ntzun jlu tzaj b'aj kyk'u'j aj Israel ex el kyipun.

6Atzunte Josué kyuk'ix qe kytijil xjal aj Israel, el kysb'it'un kyxb'alun kyi'j ex jax kyq'o'n quq tuj kywi' te jun techal kyb'is, ex e kub'tzun ẍmeje' twitz kax k'ub'l tley Dios tejxi tpon takl tib'aj kywitz twitz tx'otx', ex kukx kyten ikju tejxi tok qax.

7Atzunte Josué xi tma'n kyja':

—Nman Dios, ¿tiqu'n tzaj tma'na tu'n kyik'tz tnam xjal tuj nima Jordán? Noqpetzun q'ol qib'e tuj kyq'ab' aj Amorreo ma qo ik'tze tu'n qnaje kyu'n. Maslo b'a'n noqwit ax xqo kyaj tene jlajxi nima Jordán.

8Nman Dios, ¿ti kb'antel wu'ne ja'lo tu'nju ma che el oq aj Israel kywitz aj q'oj kyi'j?

9Ok kyb'inte qe xjal aj Canaán jlu, ex ok kyb'inte kykyaqil qeju najl tuj lugar lu aju ma b'aj kyi'j aj Israel, che okel tzoqpaj kykyaqil qi'je, milo jun qeye kyjel anq'in ex mlaylo qo tzaj na'ntle. ¿Titzun kb'antel tu'na ti'j tb'iya ma'xix t-xilen? Chi Josué.

10Tzajtzun tma'n Qman te Josué:

—We'ktza, ¿ti nb'aj teya noq mutzl tkub'a twitz tx'otx'?

11Ma che b'inchan aj Israel il, ex minti' ma japun kyu'n aju yol kyaj b'ant ti'j wu'ne kyuk'il. Ma tzaj kyi'n junjun ti'xti attoq tu'n kynaj te jumajx, ma tzaj kyelq'a'n, ma che nik'an yol ex ma tz'okx kyewan kyxol qe ti'xti at kye.

12Tu'ntzun jlu mlay che kub' we' aj Israel kywitz aj q'oj kyi'j, noq in che el oq kywitz aj q'oj, ex ja'lotzun ax qe aj Israel b'a'n tu'n kynaj. Qa mi'n ma naj kyu'ne aju xi nma'ne kyeye tu'n b'i'x tnaj, mlay chin tentle kyuk'ile.

13We'ktza ex q'manxa kye tnam xjal tu'n tel kypa'n kyib' ti'j tkyaqil mya b'a'n. Q'manxa kye tu'n tb'ant kyten tu'n kyul yek'ul kyib' nwitze nchi'j, porke aqine Kyman ex Kydios aj Israel in chin q'mante jlu kye: Aqeye aj Israel ma tzaj kyi'ne aju attoq tu'n tnaj te jumajx, ex qa mi'n ma naj kyu'ne, ex qa mi'n ma tz'ex kyi'ne kyxole, mlay che we'ye kywitz aj q'oj kyi'je.

14B'ix che ule nchi'j yek'ul kyib'e kykyaqile tuj k'lojin kytene ik tza'nx kyiyjile, ex aju k'loj kyiyjile k'okel nch'ikune, teyletzun te junjun kpol tyek'un qeju at kyxilen kyuk'il, ex aju k'okel nch'ikune, teyletzun te junjun kpol tyek'un qe xinaq ate' tuj tja.

15Ex atzunju q'ilte te aju attoq tu'n tnaj, kb'el patit kyuk'ix qe tk'wa'l ex tuk'ix tkyaqilju at te, tu'nju ma tb'incha jun mya b'a'n kyi'j aj Israel, ex minti' ma japun tu'n aju yol kyaj b'ant ti'j wu'ne kyuk'il, chi Dios.

Aju tcastiw Acán

16Tuj juntl q'ij primxix jaw we' Josué, ex xi tma'n tu'n kypon qe xjal yek'ul kyib' tuj k'lojin ik tza'nx kyiyjil. Atzunte Qman ok tch'ikun ju k'loj tiyjil Judá.

17Xitzun tma'n Josué tu'n kypon teyle junjun k'loj tiyjil Judá, ex atzunju k'loj tiyjil Zera ok ch'ikun. Kyxoltzun qe k'loj tiyjil Zera ok ch'ikun Zabdi kyuk'ix qeju at t-xilen tuk'il.

18Tejtzun kypon laq'e' teyle junjun xinaq at kyxilen tuk'il Zabdi, ok ch'ikun Acán aju tky'ajal Carmi, tal tchman Zabdi, ttxk'a tchman Zera ex tiyjil Judá te.

19Xitzun tma'n Josué te Acán:

—Aya nky'ajal, nimsa'nktza tb'i Qman aju Kydios aj Israel ex q'onxa nimb'il te. Q'mantza weye aju ma tb'inchaya. Mi'n kub' tewana nwitze.

20Atzunte Acán xi ttzaq'we'n:

—Ax tok kxel nma'ne ma chin b'inchane il twitz Qman aju Kydios aj Israel, ex atzun jlu ma nb'inchaye:

21Kyxol qe ti'xti e etz qi'ne tuj tnam Jericó, o wile jun tb'anil xb'alun tzajni tuj Babilonia, tuk'ix kab' syent saq pwaq ex jun piẍ q'an pwaq mas te jun libr talil. Tzaj nganiye kyi'j qe jlu, ex e kyaj wi'ne, o che ku'x nmaqu'ne jatum tkub'sa'n njaye, xb'alun ja, ex aju pwaq o ku'x nq'o'ne max t-xe'pun, chi Acán.

22Xitzun t-sama'n Josué junjun xinaq ke'yilte tuj tja Acán, ex o knet kyu'n tkyaqil aju ewantoq ma chixin, tuk'ix saq pwaq tku'x max t-xe'pun.

23Tzajtzun kyi'n ex pon kyi'n twitz Josué ex kywitz aj Israel, ex kub'tzun kyq'o'n twitz Qman.

24Xitzun q'i'n Acán tuj chq'ajlaj Acor tb'i, junx tuk'il saq pwaq ex xb'alun, tuk'ix jun piẍ q'an pwaq, kyuk'ix qe tky'ajal ex qe tme'jel, kyuk'ix qe twakẍ, qe tbur, qe t-ẍne'l ex ju tja, xb'alun ja, tuk'ix tkyaqilju at te.

25Xitzun tma'n Josué te:

—¿Tiqu'n ma tzaj ti'na mya b'a'n qib'aje? Ja'lotzun, tu'nx Qman kb'el tz'aq mya b'a'n tib'aja, aju ma tzaj ti'na qib'aje.

Tej t-xi tma'n Josué ikju, kykyaqiltzun aj Israel e kub' b'yonte te Acán tu'n ab'j, kyuk'ix qe tk'wa'l ex tkyaqilju at te, ex kub' kypatun.

26Kyja'tzun o chewix tq'oj Qman kyi'j aj Israel. Te tib'ajxi kub' kyq'o'n jun b'yuj ab'j kyib'aj Acán, ex kukx ate' qe ab'j ja'lo, ex tu'ntzun jlu ax tb'i lugar lu toksa'n ja'lo, chq'ajlaj te Acor.