Salmos 106 - Mam Huehuetenango New Ortography

Minti' xi kyniman aj Israel tley Qman

1Nimanxwit te Qman.

Kyq'onxe chjonte te tu'nju b'a'n te, ex kukx k'ujla'n qo' tu'n te jumajx.

2¿Alkye jun jaku tzaj q'mante qe taq'unb'en Qman ma'xix kyipumal? ¿Alkye jun jaku jaw nimsante te tu'nju at nim t-xtalb'il?

3At tzalajb'il kye qeju in che b'et tuj tumelxix ex kukx in kyb'incha'n aju tz'aqlxix.

4B'ix chin tzaj tna'na Nman ok tb'inchanteya b'a'n kye qe xjal etzan tu'na; b'ix chin ule ti'j tk'u'ja ok ttzaja klol kye,

5tu'ntzun twile aju kytzalajb'il qeju sk'o'maj tu'na, tu'ntzun ntzalaje ex tu'n tjaw nnimsa'ne tb'iya junx kyuk'il qe xjal etzan tu'na.

6Ma qo b'inchane il ik tza'nx qe qxe'chele; ma qo el tzpete; ma qb'inchaye mya b'a'n.

7Tej kyten qe qxe'chele max tuj Egipto, mya nim toklen ela tuj kywitz qe tb'inchb'ena ma'xix e b'ant; ik' tna'l kyu'n aju tk'ujlalila ma'xix, ex jaw kyi'n kyib' ti'ja ttzi Mar Kyaq Ke'yin.

8Pero tu'n Dios e klet, ex xi tyek'un tipumal tu'n tjaw nimsa'n tb'i.

9Xi tmayo'n aju Mar Kyaq Ke'yin ex aj tzqij tu'n. Ex e ik'tz ti'n max t-xe'pun mar, mer ik tza'n tuj tzqij tx'otx'.

10Kyja'tzun e klet tu'n kywitz aj q'oj kyi'j, ex tjaq' kyipumal qeju in che ik'un kyi'j.

11Qe aj q'oj kyi'j e kyaj mulq'aj tjaq' a' ex mi jun kye o kyaj anq'in.

12Xitzun kyniman qe yol otoq tzaj ttziyan Dios ex xi kyb'itzan qe b'itz te nimb'il te.

13Pero jurat ik' kyna'l qe tb'inchb'en Dios kyu'n, ex minti' kub' kyyo'n tu'n tel kynik' ti'j alkye otoq kub' t-ximan tu'n tb'ant.

14Nim pon kyk'u'j ti'j kychi' tuj tzqij tx'otx'; ok kyq'o'n Dios tuj malb'il.

15Tzaj tq'o'n Dios aju xi kyqanin, ax ikx tzaj t-sama'n jun yab'il kyi'j, ex nim xjal e kyim tu'n.

16Tuj lugar jatum e kub' ten, tzaj tlo'ch kyk'u'j ti'j Moisés, ax ikx ti'j Aarón, aju otoq tz'el tpa'n Qman tu'n tajb'en te.

17Eltzun k'ab'chaj tx'otx' ex xi tz'aq Datán tuj, tuk'ix Abiram, kyuk'ix qe xjal ate'toq junx tuk'il.

18Jaw julin q'aq' kyi'j kykyaqil qeju otoq che ok lpe' kyi'j; tu'n tqan q'aq' lu e b'aj tz'e'y qe xjal mya b'a'n.

19T-xe witz Horeb okx kyq'o'n q'an pwaq tuj q'aq' tu'n tkub' ulj, ex ti'jtzun jlu kub' kyb'incha'n tilb'ilal jun tal tor ex e k'ulun twitz.

20Kyaj kykolin Dios aju ma' tajwalil; te t-xel kub' kyb'incha'n jun tilb'ilal wakẍ b'a'n wa'n k'ul.

21Ik' tna'l Dios kyu'n, aju Klol kye, aju otoq tb'incha qe b'inchb'en ma'xix tuj Egipto,

22ex otoq tb'incha qe b'inchb'en ma'xix kyxilen tuj kytx'otx' tiyjil Cam, ax ikx tuj Mar Kyaq Ke'yin.

23O yolin Dios ti'j tu'n kynaj tu'n; pero ate Moisés aju sk'o'maj tu'n ok ten yolil kyi'j tu'n mi'n kynaj, ex o chewix ttx'u'jil Dios kyi'j, kyja'tzun ik'x ti'j tu'n kynaj.

24Mas yajxi el kyik'un aju tx'otx' tb'anilxix, ex minti' xi kyniman qe yol otoq tzaj ttziyan Dios;

25tuj kyja, xb'alun ja, e yolin mya b'a'n ti'j Qman, ex minti' xi kyniman aju otoq tzaj tma'n.

26Tu'n ttzi' xi tma'n jun yol axix tok kyi'j, tu'n kykyim tu'n ax tuj tzqij tx'otx',

27ex tu'n kynaj qe kyiyjil che ul itz'j te tib'ajxi, ex tu'n kyxi t-sputun kyxol qe nasyon mya okslal qe ti'j Dios.

28Tuj lugar Peor ok kyjunin kyib' kyuk'il qeju in che k'ulun twitz tilb'ilal Baal, ex xi kychyo'n kychib'jal qe alumaj in kub' q'o'n kywitz qe tilb'ilal.

29Tzaj tq'oj Dios kyi'j tu'n tlaj kyb'inchb'en mya b'a'n, tzaj jun k'ixb'isab'l kyxol ex nim xjal e kyim.

30Atzunte Finees jaw we' ex kub' tb'yo'n aju b'inchan il, kyja'tzun we' aju k'ixb'isab'l ex minti'tl e kyim.

31B'a'n ela tb'inchb'en Finees tuj twitz Dios, ex kukx tu'n ttzaj na'n tu'n Dios te jumajx.

32Ax ikx tzaj tq'oj Dios kyi'j xjal tu'n tlaj kyb'inchb'en mya b'a'n ttzi a' tuj Meriba, ex tu'n kye kylaj tzaj jun mya b'a'n ti'j Moisés,

33tu'nju otoq b'aj tpasens kyu'n ex o yolin mya tuj tumel.

34Minti' kub' kyxitun qe tnam otoq tma Qman tu'n tkub' kyxitun.

35O'kx b'aj kysmon kyib' kyuk'il qe xjal mya okslal ti'j Dios ex o b'ant kye kyu'n aju in b'ant kyu'n xjal;

36e k'ulun kywitz qe tilb'ilal nno'k kydiosin xjal, ex tu'n jlu e naj,

37xi kyq'o'n qe kyky'ajal ex qe kyme'jel te jun chojb'il kye ju'ẍ.

38Kub' kyb'yo'n qe k'wa'l minti' kyil, ax qe kyky'ajal ex qe kyme'jel, ex xi kyq'o'n te chojb'il kye qe tilb'ilal nno'k kydiosin xjal tuj Canaán. Kyja'tzun o tz'ilix tx'otx' tu'n kychk'el,

39e tz'ilix qe xjal lu tu'n tkyaqilju kyb'inchb'en mya b'a'n ex el kypa'n kyib' ti'j Dios.

40Tzajxix tq'oj Qman ti'j tnam etzan tu'n, ex e je'l tik'un;

41e je'x tq'o'n tjaq' kykawb'il qe nasyon mya okslal qe, ex kub' kyi'j kyu'n qe aj q'oj kyi'j;

42e b'aj yajla'n kyu'n qe aj q'oj kyi'j ex b'i'x e kyaj ten tjaq' kykawb'il.

43Nimku maj e klet tu'n Dios, atzun kye minti' xi kyniman aju ximamajtl tu'n, ex e je'x tz'aq tujx kyb'inchb'en mya b'a'n.

44Maske ikju, pero tej ttzaj tke'yin Dios aju yajb'il kye ex tej tb'inte tq'ajq'ajel kywi' in che oq',

45tzaj tna'n aju yol kyaj b'ant ti'j tu'n kyuk'il ex ch'expettzun tnab'l, porke ma'xix tk'ujlalil:

46ex tma kye qeju otoq che kamb'an kyi'j tu'n kykub' xtalin kyu'n.

47Qo tkloma Qman Dios. Qo ti'n exa kyuj qe nasyon tu'ntzun tjaw qnimsa'ne tb'iya xjan, ex tu'n qtzalaje nim ok tjaw qnimsa'ne.

48Tuj tkyaqil tab'q'iyil nimanxwit te Qman aju Kydios aj Israel. Ex tu'n kymante kykyaqil: B'ant-xwit ikju.

Nimanxwit tb'i Qman.

LIBRO VSALMOS 107-150