Isaías 38 - Mam Huehuetenango New Ortography

Tzaj tyab'il Ezequías ex b'anix 2 Reyes 20.1-11; 2 Crónicas 32.24-26

1Tuj tq'ijlalil lu tzaj jun tyab'il Ezequías kyuwxix wen, ex pon Isaías aju t-sanjel Dios ex tky'ajal Amoz ke'yilte te, ex xi tma'n te kyja':

—Chi Qman teya kyja': Kawin kyaja qeju ate' tuj tjaya, porke kymela. Mlayx b'anixa.

2Atzunte Ezequías aj tq'o'n twitz twitz ja ex ok ten na'l Dios kyja':

3—In chin kub'sane twitza Nman, na'ntza, o chin ajb'ene teya tuj tumelxix ex tu'n tkyaqil wanmiye, ex o nb'inchaye aju in tzalaja ti'j, chi Ezequías. Ex jaw oq' kyuwxix wen.

4Tzajtzun tma'n Qman te Isaías kyja':

5Txi'ya ex q'manxa te Ezequías kyja': Ate Qman aju Tdios qtzan t-xe'chela David in tma'n teya kyja': Ma nb'iye tna'j Diosa ex ma wile ta'l twitza. Kxel nq'o'ntle olaj ab'q'i tanq'ib'la.

6Kkletela wu'ne, ax ikx tnam Jerusalén kkletel wu'ne tuj tq'ab' rey te Asiria. A qine chin kolol ti'j tnam lu.

7Atzun techal jlu kxel nyek'une teya, tu'n tjapun wu'ne aju yol xi ntziyane teya:

8Tuj t-reloj Acaz, aju in markarinjtz tu'n t-xlekumal q'ij, k'ajel meltz'aj t-xlekumal q'ij laj grad wu'ne, aqeju otoq tz'ok t-xlekumal q'ij kyi'j, chikuya te Ezequías, chi Dios te Isaías.

Ex aj meltz'aj t-xlekumal q'ij laj grad.

9Tej tb'anix Ezequías aju rey te Judá, kub' ttz'ib'an jun b'itz lu:

10O nmaye kyja': Tuj tmij wab'q'iyile chin kymele tu'n npone tuj kynajb'il kyimni, mlay japun b'aj wab'q'iyile aju b'animaj ti'j tu'n wanq'ine tzalu.

11Kub' nximane kyja': Mlayx tz'ok nke'yintle Qman twitz tx'otx' lu, mlay tz'ok nke'yintle jun xjal kyxol qeju najl twitz tx'otx'.

12Ik tten nchwinqlale ik tza'n kyja pastor ẍne'l, xb'alun ja, aju nnik' ch'expu'n. Ik tten nchwinqlale ik tza'n jun xb'alun nne'l qesin ti'j ttxuylal tuj chemb'ilte. Q'ijtl ex qonik'an in chin k'ixb'isanjtze tu'na.

13Tuj enter qonik'an in chin sch'ine tu'n ta'w, mer ik tza'n tu'n jun b'alun in b'aj toqin qe nb'aqile. Q'ijtl ex qonik'an in chin k'ixb'isanjtze tu'na.

14In chin q'ajte ik tza'n in che q'ajt qe xtx'a'yil, in chin oq'e ik tza'n qe paloma. Ma che sikt tb'aq' nwitze tu'nju in chin ke'yine twitz kya'j. Nman, in chin yajlanjtze, chin tonintza.

15Ex ¿ti kxel nma'ne? Ax Qman ma q'mante jlu weye ex ax ma b'inchante. Cheb'a chin b'etele tuj tkyaqil wanq'ib'le, tu'nju at nim b'is tuj wanmiye.

16Nman, ti'j tkyaqil jlu in che anq'in xjal, ax ikx wanmiye in knet tanq'ib'l ti'j tkyaqil jlu.

Tu'na ma chin b'anixe ex ma tzaj tq'o'na juntl maj nchwinqlale.

17B'intza, atintoqe tuj b'is nej, atzun ja'lo atine tuj txub'txaj. Tu'na ma klet nchwinqlale tu'n mi'n nxi'ye tuj najen, ex tkyaqil wile ma kub' tnajsa'na.

18Qe xjal o che kyim ax ate' tuj muqb'il, mlayx b'ant tu'n tjaw nimsa'na kyu'n, mlay jaw nimsa'na kyu'n qe kyimni; aqeju o che'x tuj jul minti' in qe' kyk'u'j tu'n kyk'monte aju tzaj ttziyana kye.

19O'kx qe xjal itz'x jaku b'ant tnimsanjtza kyu'n, ik tza'n in b'ant wu'ne ja'lo. In xi kyma'n mamb'aj kye kyk'wa'l qa in japun tu'na aju in xi ttziyana kye.

20Chin kletele tu'n Qman. Kyja'tzun k'okel q'ajtza'n qe chnab' arpa ex qo b'itzal tuj tja Qman tkyaqil q'ij te qanq'ib'l.

21Xi tma'n Isaías tu'n tb'inchet ch'in tq'otjil twitz higo, tu'ntzun tok q'ot jatum tok tyab'il rey Ezequías, ex b'anixtzun.

22Otoq txi tma'n Ezequías te Isaías: ¿Alkyetzun jun techal ktzajel yek'un tu'n tel nnik'e ti'j qa chin xe'le juntl maj tuj tja Qman?