Ezequiel 44 - Mam Huehuetenango New Ortography

Aju tajb'en ttzi ja tkub' tuj tjawitz q'ij

1Inx q'i'ne tu'n xinaq juntl maj ttzi ja tkub' tetz ti'jxi tja Dios, aju kyja' xi'yni twitz tuj tjawitz q'ij, ex lamo'ntoq.

2Atzun tzaj tma'n Qman weye kyja': Aju ttzi ja lu kukx kyjel ten lamo'n; mi'n jaqet. Mi jun k'okex tuj, ex atzun ma chin okxe, aqine Kydios aj Israel. Kyja'tzun kukx kyjel ten lamo'n.

3O'kx te kawil k'okex tuj, tu'n tkub' qe' nwitze wa'l ti'j pan xjansamaj. Atzun k'okex ttzi ja ex k'okex tuj tal cuart ex ax k'eletz jatum otoq tz'okx, chi Qman.

Aqeju at kyoklen tu'n kyokx tuj tja Dios

4Te tib'ajxi inx q'i'ne tu'n xinaq tu'n wokxe ttzi ja tkub' tuj tumlal tb'anq'ab' q'ij, tu'n npone twitz tja Dios. Ex o wile tajwalil Qman otoq b'aj noj tuj tja tu'n, in kub'tzun ẍmeje'ye tejxi tpon takl tib'aj nwitze twitz tx'otx'.

5Tzajtzun tma'n Qman weye kyja': Aya xinaq, ke'yintza ex q'onka kwent ti'j tkyaqilju kxel nma'ne teya kyi'j qe tumel ex qe ley ti'j njaye. Q'onka kwent ti'j alkye qe at kyoklen tu'n kyokx tuj ex alkye qe minti' kyoklen tu'n kyokx.

6Q'manxa kye aj Israel aqeju mib'an che b'in: Atzun jlu in tma'n Qman: Nimxix kyb'inchb'ene mya b'a'n, aqeye aj Israel.

7Ma b'aj kytz'ilsa'ne njaye tu'nju ma txi kyq'o'ne amb'il kye stranjer xjal tu'n kyokx tuj, aqeju mya sircunsidarimaj qe ex mib'an che niman nyole; ma b'aj kytz'ilsa'ne tu'nju in kub' kyq'o'ne nwitze ik tza'n wab'j aju seb ex chik' nne'l ti'j chojb'il, ex tu'n tkyaqil kyb'inchb'ene mya b'a'n ma che ik'e tib'aj ju yol kyaj b'ant ti'j wu'ne kyuk'ile.

8Minti' ma che japun qe nleye kyu'ne tu'n kyb'inchet qe ti'xti xjan o txi nma'ne kyeye, noq o'kx ma txi kyq'o'ne tuj kykwent stranjer xjal.

9Kyja'tzun aqine Dios kxel nma'ne jlu: Mi jun stranjer xjal k'okex tuj njaye qa mya sircunsidarimaj ex qa mib'an niman nyole; ex milpe jun stranjer xjal k'okex tuj, aju ax najl kyxol aj Israel.

10Qe aj Leví, aqeju el kypa'n kyib' wi'je junx kyuk'il qe txqantl aj Israel, ex in kyaj koline kyu'n tej kyxi' k'ulul kywitz tilb'ilal, il ti'j kb'el kycastiw tu'n tlaj kyil.

11Atzun qe che b'el ten xq'uqil kytzi' qe tlamel njaye ex che aq'nal ti'j txqantl aq'untl at tuj; atzun qe b'a'n tu'n kykub' b'yonte kye alumaj in che kub' patit, ex qeju nnu'l kyi'n xjal te chojb'il; ax ikx list che tel tu'n kyonin kyi'j xjal.

12Atzun qe e ajb'en kyxol aj Israel tej kyk'ulun kywitz tilb'ilal, ex noq kyu'n aj Leví e b'inchan aj Israel il. Kyja'tzun aqine Dios in xi nma'ne jun yol axix tok, kb'el kycastiw tu'n tlaj il o kyb'incha.

13Mlay che ok te pal tu'n kyajb'en weye ex mi tu'n tok kymako'n qe ti'xti xjan mi qeju mas xjanxix. Il ti'j ktzajel kych'ixwi tu'n tlaj kyb'inchb'en ik'b'ilxix.

14O'kx kxel nq'o'ne kyoklen tu'n tok kykwentin tkyaqilju at tuj njaye, ex tu'n kyb'inchante qe aq'untl ch'in kyoklen in che b'ant tuj.

Qe pal

15Qe pal aj Leví aqeju tiyjil Sadoc, ex aqeju kukx e ajb'en tuj njaye tej tel kypan kyib' txqantl aj Israel wi'je, at kyoklen tu'n kyajb'en weye. Atzun qe b'a'n tu'n kykub' ten nwitze tu'n ttzaj kyq'o'n kysebyil ex kychk'el qe chojb'il weye. Aqine Dios in chin q'mante jlu.

16O'kx qe jlu b'a'n tu'n kyokx tuj njaye ex tu'n kypon laq'e' ti'j n-altare tu'ntzun kyajb'en weye, ex tuj kykwent kyjel ten ju aq'untl at tuj njaye.

17Ok kyokx ttzi tlamel tu'n kyokpun tuj tkab'in ttxa'n pe'n, il ti'j tu'n tok kyq'o'n kyxb'alun saq ke'yin ex tz'umin twitz. Oktzun kyajb'en tuj tkab'in ttxa'n pe'n ex qa tuj njaye, mlay tz'ok kyq'o'n kyxb'alun lan.

18Ex k'okel kyq'o'n jun xb'alun k'alb'il kywi' saq ke'yin ex tz'umin twitz, ax ikx k'okel kyq'o'n kycalsonsiy xb'alun saq ke'yin ex tz'umin twitz, ex mi'n tz'ok kyq'o'n k'alb'il kyk'u'j tu'ntzun mi'n ttzaj a' kyi'j.

19Ex na'nxtoq kyelel tuj tnejel ttxa'n pe'n jatum in che kub' ten xjal, il ti'j k'elel kyi'n kyxb'alun aju tok kyi'j ok kyajb'en tuj njaye, tu'ntzun mi'n kyxjanset xjal tu'n kyxb'alun, ax kyjel kyq'o'n kyuj cuart ate' tuj njaye, ex k'okel kyq'o'n juntl kyxb'alun.

20Mi'n tz'el kyk'o'xin ti'j kywi' ex mi'n kub' kych'isun, noq o'kx tu'n tel ch'inaq ttxa'n kyu'n.

21Mi jun pal kxel tk'a'n ta'l twitz uva ok tokx tuj tkab'in ttxa'n pe'n.

22Minti' tu'n tmoje' tuk'il jun meb'a xu'j ex mi tuk'il jun xu'j otoq kub' tpa'n tib' tuk'il tchmil, o'kx tu'n tmoje' tuk'il jun xu'j aj Israel na'nxtoq tlonte xinaq ex qa tuk'il jun meb'a xu'j t-xu'jilb'en jun qtzan pal.

23Il ti'j tu'n t-xi kyq'o'n pal xnaq'tzb'il kye xjal etzan wu'ne, tu'n tel kynik' ti'j alkye xjan ex alkye mya xjan, ex tu'n tel kynik' ti'j alkye saq ex alkye tz'il.

24Ok kyjaw q'ojl xjal, atzun qe pal che okel te jwes tu'n t-xi b'inchet kyi'j ik tza'n in tma'n nleye. Che japunel kykyaqil nleye kyu'n, ex qe nxnaq'tzb'ile aju in yolin kyi'j kykyaqil ninq'ij q'mamaj wu'ne, ex kxel kyniman qe q'ij te ojlab'l xjansa'maj wu'ne.

25Mi'n tz'ok kymako'n pal jun kyimni tu'ntzun mi'n tb'aj kytz'ilsan kyib'. Qatzun qa a kyman ma kyim, ex qa kytxu', ex qa jun kyky'ajal, ex qa jun kyme'jel, ex qa jun kyerman xinaq ex qa jun kyanb' na'nx tmoje'; b'a'ntzun tu'n tok kymako'n.

26Qa ma tz'ok kymako'n, il ti'j tu'n tb'aj kytx'jon kyib', ex te tib'ajxi che ayol wuq q'ijtl.

27Oktzun kyokx juntl maj tuj tkab'in ttxa'n pe'n twitz njaye tu'n kyajb'en, kxel kyq'o'n jun chojb'il kyil. Aqine Dios ma chin q'mante jlu.

28O'kxku aqine chin okel te kyetzb'il qe pal. Minti' jun etzb'il kxel q'o'n kye kyxol aj Israel. Aqine aju kyetzb'il.

29B'a'n t-xi kywa'n twitz awal aju in tzaj kyq'o'n aj Israel te oyaj weye, ex b'a'n t-xi kychyo'n tchib'jal alumaj aju in tzaj q'o'n weye te chojb'il kyil xjal ex kypaltil, ax ikx tkyaqilju ma tz'el kypa'n aj Israel tu'n ttzaj kyq'o'n weye, b'a'n tu'n t-xi kynik'b'e'n.

30Ax ikx kxel kyq'o'ne kye pal aju tnejel twitz awal tb'anilxix, ex kykyaqil txkaj oyaj tb'anilxix. Ex ok tb'ant tten tq'otjil pan kyu'ne, aju tb'anilxix, kxel kyq'o'ne kye qe pal tu'ntzun kykub' nky'iwla'ne qeju ate' tuj kyjaye.

31Mi'n txi kychyo'n pal jun chyu'j ex qa jun alumaj tajx otoq kyim, ex qa otoq b'aj tzaqin kyu'n txkup te tjaq' k'ul.