Romanos 6 - Mam Huehuetenango New Ortography

Minti'tl tajb'en il qe, porke itz' qo' tu'n Crist

1¿Titzun ok qma'? ¿Kukxpe qo b'inchal il tu'n ttzaj tq'o'n Dios nimxixtl t-xtalb'il qe?

2Mi'n. Porke minti'tl tajb'en il qe, porke ik tza'n kyimni qo' te il. ¿Tza'ntzun tten kukx tu'n qb'inchan il?

3¿Minti'pe b'a'n kyu'ne, ik tza'n qe o qo b'yan, o qo ok mojb'a'n tuk'il Crist ex at qoklen ti'j tkamik?

4Porke tej tkyim Crist ex ku'x maqu'n, ikxtzun qe tej qb'yan, mer ik tza'n o qo kyim ex o qo ku'x maqu'n junx tuk'il, porke o qo ok mojb'a'n tuk'il. Ik tza'n te Crist o jatz anq'in kyxol kyimni tu'n tipumal Mamb'aj, ax ikxtzun qe tu'n qb'et tuj ak'aj chwinqlal.

5Porke qa ma qo ok mojb'a'n tuk'il Crist tu'n qkyim junx tuk'il, ax ikx ok qo jawil anq'in junx tuk'il.

6B'a'n qu'n, aju ojtxi qten o jaw q'o'n twitz crus junx tuk'il Crist tu'n tnaj aju tipumal il tuj qximlal, tu'ntzun mi'n qtentl te tmajen il.

7Porke aju o kyim, tzoqpi'majtl tjaq' tipumal il.

8Ex qa o qo kyim junx tuk'il Crist, q'uql qk'u'j ti'j qa ok qo anq'il junx tuk'il.

9Porke b'a'n qu'n o jaw anq'in Crist kyxol kyimni, mlay kyimtl; minti'tl toklen kamik ti'j.

10Porke tej tkyim Crist noq junx maj kyim tu'n tchjet qil; atzun ja'lo tuk'il Dios in anq'in.

11Ax ikxtzun kyeye, che ximane qa ax tok minti'tl toklen il kyi'je, porke ik tza'n kyimni qeye, ex itz' qeye te Dios tu'nju kymojb'ab'l kyib'e tuk'il Jesucrist aju Qajaw.

12Kyja'tzun, mi'n txi kyq'o'ne amb'il te il tu'n tkawin tuj kyximlale aju at tkyimel, ex mi'n txi kynimane aju tajb'il kyximlale.

13Ex mi'n txi kyq'o'ne kyximlale te il tu'n tb'inchet aju mya b'a'n; o'kx kyq'onx kyib'e te Dios mer ik tza'n kyimni qeye nej ex itz' qeye ja'lo, ex kyq'onx kyximlale te Dios tu'n tb'inchet aju tz'aqlxix.

14Porke ate il minti'tl toklen tu'n tkawin kyi'je, porke myatzun ate'ye tjaq' ley, noq o'kx tkub' t-xtalb'il Dios kyib'aje.

Tmajen Dios qo' tu'n qb'inchante aju b'a'n

15¿Chi tok kyu'ne? ¿Okpe qo b'inchal il tu'nju mya ato' tjaq' ley, noq o'kx tkub' t-xtalb'il Dios qib'aj? Mi'n.

16¿Minti'petzun b'a'n kyu'ne? Qa ma txi kyq'on kyib'e te juntl tu'n kyoke te tmajen tu'n t-xi kynimane, majen qeye teju in xi kynimane; qa ma txi kynimane aju il, kamik in tzaj tu'n; ex qa ma txi kynimane tyol Dios, che okel q'o'ne te tz'aqlxix tu'n.

17Ex chjonte te Dios, maske majentoq qeye te il ojtxi, atzun ja'lo ma txi kynimane tuj kyanmiye aju xnaq'tzb'il axix tok tzaj q'o'n kyeye.

18Ex tzoqpi'majtl qeye tjaq' tipumal il, ma che oke te majen tu'n kyb'inchanteye aju tz'aqlxix.

19(In chin yoline ik tza'n che yolin xjal tu'nju na'nx tel kynik'e ti'j.) Kyja'tzun, ik tza'n ojtxi xi kyq'o'ne kyximlale tu'n kyoke te tmajen mya b'a'n, ex b'aj kytz'ilsan kyib'e tu'n kyb'inchb'ene mya b'a'n, ax ikxtzun ja'lo kyq'onx kyximlale te Dios tu'n kyb'inchanteye aju tz'aqlxix, tu'ntzun kyajb'ene o'kx te Dios.

20Porke tej ate'xtoqe te tmajen il, myatzun majen qeye tu'n kyb'inchanteye aju tz'aqlxix.

21¿Atpe o kykamb'aye ti'j tkyaqilju in che ch'ixwiye ti'j ja'lo? Minti', porke kyu'ntzun qe jlu in tzaj kamik.

22Atzun ja'lo ma che tzoqpete tjaq' tipumal il ex ma che oke te tmajen Dios, ex atzun ma kykamb'aye jlu: Tu'n kyanq'ine kypa'n kyib'e ti'j il, ex tu'n tten kychwinqlale te jumajx.

23Porke aju chojb'il qe in tzaj tq'o'n il, atzun tu'n qkyim; atzunju oyaj in tzaj tq'o'n Dios qe, tu'n tten qchwinqlal te jumajx tu'n qmojb'ab'l qib' tuk'il Jesucrist aju Qajaw.