Colosenses 2 - Mam Huehuetenango New Ortography

1Ex waje tu'n kyb'inteye, nimxix in chin na'ne Dios kyi'je, ex kyi'j qeju ate' tuj tnam Laodicea, ex kyi'j kykyaqil qeju na'nx tok kyke'yin nwitze.

2Waje tu'n tq'uqb'anjtz kyk'u'je, ex tu'n tten kymojb'ab'l kyib'e tu'n kyk'ujlalile, ex tu'n telxix kynik'e ti'j tu'ntzun tqe'xix kyk'u'je, ex tu'n tel kynik'e ti'j tyol Qman Dios ewantoq nej, in yolin ti'j Crist.

3Porke atzun ta' tkyaqil tb'anil nab'l tuk'il Crist, tewan tib', ex tkyaqil ojtzqi'n tu'n Crist.

4Ma txi nma'ne jlu kyeye tu'n mi'n kysb'unjtze kyu'n xjal in kub' ti'j kynab'l xjal tu'n kyyol.

5Ex maske mi a'l qine kyuk'ile pero aju wanmiye at kyuk'ile, in chin tzalaje tu'nju b'a'n kytene in xi nb'i'ne, ex tu'nju wa'l qe'xixe tuj kyokslab'le ti'j Crist.

6Kyja'tzun, ik tza'n ma kyk'ame Qajaw Jesucrist, ikxtzun tu'n kyanq'ine junx tuk'il.

7Kyawam kyib'e ti'j Crist ex kyb'incha'n jawe kychwinqlale tib'aj, porke ate Crist simyent; che we'xixe tuj kyokslab'le ik tza'n ju xnaq'tzb'il ma kyk'ame, ex nimxix kyq'onxe chjonte te Dios.

Aju ak'aj qchwinqlal tu'n Crist.

8Ten kykwente kyi'je tu'n mi'n kysb'unjtze tu'n kyxnaq'tzb'il xjal tuj kyex kynab'l in tzaj, ex tu'n mi'n kysb'unjtze tu'n kysb'ub'l noqx gan; porke in che ok lpe' ti'j ju yol kyajni q'ma'n kyu'n kytijil xjal, in che ok lpe' ti'j jun xnaq'tzb'il mya tz'aqlxix in kyq'o'n xjal, minti' in che ok lpe' ti'j Crist.

9Porke tkyaqilju tten Dios najl tuj t-ximlal Crist,

10atzun kyeye ma che tz'aqete tu'nju kymojb'ab'l kyib'e tuk'il Crist. Ate Crist nejenel kyib'aj kykyaqil qeju at kyipumal ex at kyoklen twitz tx'otx' ex tuj kya'j.

11Tu'nju okslal qeye ti'j Crist ma che sircunsidarinjtze, mya tu'n kyq'ab' xjal ma b'ant jlu, noq o'kx tu'n Crist ma che sircunsidarinjtze, tu'nju ma tz'el kykotpi'ne aju ojtxi kytene mya b'a'n, tuk'ix ju tajb'il kychib'jale.

12Junx e ku'x maqu'ne tuk'il Crist tej kyb'yane, ex junx ma che jaw anq'ine tuk'il Crist tu'nju ma qe' kyk'u'je ti'j tipumal Dios, aju jaw anq'in Crist tu'n kyxol kyimni.

13Kyimni qeye nej tu'n tlaj kyile ex tu'n tlaj kukx kyb'inchanteye tajb'il kychib'jale, atzun ja'lo ma tzaj tq'o'n Dios kychwinqlale junx tuk'il Crist, ex ma kub' tnajsa'n tkyaqil kyile.

14Kub' tnajsa'n Dios aju tu'jil qk'as jatum in tma'n qa at qil, b'i'x el ti'n, kyaj tklawsiyi'n twitz crus.

15Tu'n Crist kub' kyi'j qe nejenel minti' q'ancha'l ex qeju at kyipumal; e kub' tq'o'n tu'n kyke'yinjtz kyu'n kykyaqil xjal, kub' kyi'j tu'n tej tjaw q'o'n twitz crus.

Kyq'o'nk kyximb'etze ti'j ju at tuj kya'j

16Kyja'tzun, mi'n txi kyq'o'ne amb'il kye xjal tu'n kyyolin kyi'je tu'n tlaj alkye in xi kywa'ne ex in xi kyk'a'ne, ex qa ti'j jun ninq'ij, ex qa ti'j tu'n tik'set ninq'ij ok ttzaj ke'yin ak'aj xjaw, ex qa ti'j ju q'ij te ojlab'l.

17Tkyaqil jlu noq jun techal ti'j ju attoq tulel, ex ate Crist ttxuylal, ex tkyaqil jlu ti'j Crist in japun b'aj.

18Mi'n txi kyq'o'ne amb'il tu'n tel q'i'n kykamb'ab'le kyu'n xjal noq nno'k kyq'on kyib' mans qe, ex in kyma'n tu'n kyk'ulun xjal kywitz anjel. In che yolin ti'j ju na'nx kylonte, ex noqx gan in jaw kyniman kyib' tu'n kyex kynab'l.

19Mya kytzyun kyib' ti'j Crist aju wib'aj, porke tu'n Crist in ch'iy tkyaqil t-ximlal, tk'a'ch tib' ex ttzyun tib' tu'n tyaqamil ex tu'n tb'otx'il, in ch'iy porke a Dios ch'isal te.

20O che kyime tuk'il Crist tu'n kytzoqpete tjaq' ju xnaq'tzb'il mya tz'aqlxix in kyq'o'n xjal, ¿tiqu'ntzun in xi kyq'on kyib'e tjaq' kyxnaq'tzb'il xjal mer ik tza'n atx kyoklene kyxol?

21Achaqtzun kymandamyent jlu: Mi'n tzaj ttzyu'na jlu, mi'n txi tnik'b'e'na jlu, mi'n tz'ok tmako'na jlu, che chi.

22Tkyaqil jlu kymandamyent xjal ex kyxnaq'tzb'il xjal, tkyaqil jlu knajel ok tb'aj tajb'en kye xjal.

23Qe xjal in che japun qe mandamyent lu kyu'n, mer ik tza'n at kynab'l, ex kyu'nx kyib' in kub' kyximan tza'n tten tu'n kyk'ulun, in kyyek'un kyib' mans qe, ex in b'aj kyk'ixb'isa'n kyximlal; ex mlay maqet tajb'il kychib'jal tu'n tkyaqil jlu.