Romanos 7 - Mam Huehuetenango New Ortography

Jun xnaq'tzb'il nne'l q'i'n ti'j mejeb'le'n

1Erman, in chin yoline kyeye aqeye ojtzqi'n ley kyu'ne, ex b'a'n kyu'ne ate ley at toklen ti'j xjal itz'xku xjal.

2Porke ik tza'n jun xu'j at tchmil, tok tuj tkwent tchmil tu'n ley itz'xku tchmil; ex qa ma kyim tchmil, tzoqpi'ntl te xu'j twitz ju ley otoq tz'ok mojb'ante kye.

3Kyja'tzun, qa ma moje' xu'j tuk'il juntl xinaq itz'xku tchmil, k'okel tb'i aj pajil; qatzun ma kyim tchmil, tzoqpi'ntl te xu'j twitz ley; masketzun moje' tuk'il juntl tchmil mlay tz'ok q'o'n tb'i aj pajil.

4Ax ikxtzun kyeye erman, minti'tl toklen ley kyi'je, porke o kyim Crist tu'n kytzoqpete, b'a'ntzun tu'n kymoje'ye tuk'il Crist aju jatz anq'in kyxol kyimni, tu'ntzun qb'inchante aju b'a'n tuj twitz Dios.

5Tej na'nxtoq qokslan, in qb'incha'ntoq aju tajb'il qchib'jal; maske in tma'n ley tu'n mi'n qb'inchante il, pero mas nno'k tilil qu'n tu'n qb'inchante, mer ik tza'n at jun to'yil qe. Kyja'tzun tzaj kamik qi'j.

6Atzun ja'lo tzoqpi'ntl qo', minti' toklen ley qi'j, ik tza'n kyimni ma qo ok twitz ley jatum tzyu'ntoq qo' nej; kyja'tzun tzoqpi'ntl qo' tu'ntzun qajb'en te Dios tuj ak'aj chwinqlal tu'n Xewb'aj, ex mya tu'n qten tjaq' ojtxi ley aju tz'ib'an.

Aju il at tuj qanmi

7¿Titzun ok qma'? ¿Ilpe aju ley? Mi'n. Ex minti'wtlo sel nnik'e ti'j il noqwit minti' saj tyek'un ley; ex minti'wtlo sel nnik'e ti'j qa mya b'a'n tu'n tpon nk'u'je ti'j jun ti'xti te juntl noqwit minti' in tma'n ley: Mi'n pon tk'u'ja ti'j.

8Ate il axju mandamyent ajb'en tu'n, ex tkyaqilju mya b'a'n in pon nk'u'je ti'j, el tuj q'ancha'l tu'nju mandamyent; ex noqwit minti' ley, ate il minti' tipun, mer ik tza'n kyimni.

9Na'nxtoq tel nnik'e ti'j ley, b'a'n ntene nna'ne; ex tej tel nnik'e ti'j mandamyent, maxitzun el nnik'e ti'j qa at wile, ex kub' nsentense tu'n nkyime.

10Kyja'tzun ma tz'el nnik'e ti'j jlu, aju mandamyent tzaj q'o'n tu'n tten qchwinqlal, atzun weye, axju mandamyent kub' q'onte nsentense tu'n nkyime.

11Porke ate il, axju mandamyent ajb'en tu'n te sb'ub'l weye, ex ma chin kub' b'yo'ne tu'n il noq tu'nju mandamyent.

12Kyja'tzun, ate ley ax tok xjan te, ex aju mandamyent xjan te, ex tz'aqlxix ex b'a'n te.

13B'a'n te ley. ¿Apetzunju b'a'n kub' b'yonte weye? Mi'n. Ate il kub' b'yonte weye noq tu'nju ley b'a'n, tu'n tyek'unjtz aju il, qa ilte, ex tu'n tok il puro ilxix tu'nju mandamyent.

14Porke b'a'n qu'n, aju ley te Dios te; atzun weye in nb'incha'ne aju tajb'il nchib'jale, k'a'yimaj qine tjaq' tipumal il.

15Porke aju in nb'incha'ne, minti' nne'l nnik'e ti'j; aju wajb'ile, minti' in b'ant wu'ne; ex aju nk'i'ye, atzunju in b'ant wu'ne.

16Ex qa ma b'ant wu'ne aju nk'i'ye; kyja'tzun nne'l nnik'e ti'j ax tok b'a'n te ley.

17Kyja'tzun, mya aqine in chin b'inchante jlu, ate il at wuje in b'inchante.

18Porke b'a'n wu'ne minti' jun b'a'n at wuje tuj nchib'jale; wajb'ile tu'n nb'inchanteye aju b'a'n, pero minti' wipumale tu'n tb'ant wu'ne.

19Porke aju b'a'n wajb'ile tu'n tb'ant, minti' in b'ant wu'ne; atzunju mya b'a'n, aju mi'n wajb'ile tu'n tb'ant, atzunju in b'ant wu'ne.

20Qatzun ma nb'inchaye aju mi'n wajb'ile, mya aqine in chin b'inchante, ate il at wuje in b'inchante.

21Kyja'tzun ma tz'el nnik'e wi'je tza'n ntene: wajb'ile tu'n nb'inchanteye aju b'a'n, pero aju mya b'a'n tkub' nwitze.

22Porke in chin tzalaje ti'j Dios tuj wanmiye:;

23pero in nna'ne juntl ley tuj nximlale in q'ojin ti'j tley nnab'le, ex in chin okx presine tu'n tjaq' tley il aju at tuj nximlale.

24B'ek'b'ilxix nwitze. ¿Alkye ktzoqpilte weye teju nximlale lu in chinx ti'n tuj kamik?

25O'kx te Dios tzoqpil weye noq tu'n Jesucrist aju Qajaw. Chjonte Dios. Kyja'tzun, tuj jun tumel in chin ajb'ene te tley Dios tu'n nnab'le; atzun tuj juntl tumel tajb'il nchib'jale tu'n wajb'ene te tley il.