Jueces 1 - Mam Huehuetenango New Ortography

Tzyet Adoni-bezec kyu'n aj Judá ex kyu'n tiyjil Simeón

1Tkyimlenxitzun Josué, xi kyqanin aj Israel te Qman alkye jun k'loj kyxol kykyaqil k'loj kyiyjil tu'n kyok tzoqpaj tnejel kyi'j aj Canaán.

2Atzunte Qman tzaj ttzaq'we'n kyja': Aqe aj Judá che okel tzoqpaj tnejel, porke ma txi nq'o'ne tx'otx' lu te kye.

3Atzun kye tiyjil Judá xi kyma'n kye kyerman aqeju tiyjil Simeón kyja': Qo' quk'ile tu'n qok tzoqpaj q'ojlel ti'j kytx'otx' aj Canaán, aju ma tzaj q'o'n qeye. Te tib'ajxi, ax ikx qeye qo xe'le kyuk'ile tu'n qok tzoqpaj q'ojlel ti'j tx'otx' ma tzaj q'o'n kyeye, che chi aj Judá. E je'xtzun qe tiyjil Simeón kyuk'il.

4Kyja'tzun tten e ok tzoqpaj qe tiyjil Judá kyi'j aj Canaán ex kyi'j aj Ferezeo, ex e tzaj tq'o'n Qman qe xjal lu tuj kyq'ab'. Tuj tnam Bezec e kyim laj mil xinaq kyu'n.

5Knet Adoni-bezec kyu'n tuj tnam Bezec. E ok tzoqpaj q'ojlel ti'j ex kub' kyi'j aj Canaán ex aj Ferezeo kyu'n.

6Maske el oq Adoni-bezec, ex e je'x lpe' ti'j, o tzyet kyu'n, ex el kytx'emin qe tman tq'ab' kyuk'ix qe tman tqan.

7Tmatzun Adoni-bezec: Ojtxi aqine el tx'eminte qe tman kyq'ab' ex qe tman kyqan 70 rey, ex xi nma'ne kye tu'n tjaw kysk'o'n qe tb'uchil pan in che kub' tz'aq tjaq' nmese, atzun ja'lo ma tb'incha Dios wi'je ik tza'nx o nb'inchaye kyi'j, chi Adoni-bezec. Xitzun kyi'n Adoni-bezec tuj Jerusalén, ex atzun o kyim.

Tzyet tnam Hebrón ex Jerusalén kyu'n aj Judá

8E ok tzoqpaj qe tiyjil Judá ti'j tnam Jerusalén ex tzyet kyu'n. Tb'ajlenxi kyb'yo'n tu'n spad kykyaqil xjal ate' tuj tnam, oktzun kyq'o'n tq'aq'al tnam.

9Te tib'ajxi e ok tzoqpaj kyi'j aj Canaán, aqeju najlqe tuj tiwitz tx'otx' ex tuj tx'otx' Néguev ex tuj mlaj tx'otx'.

10Ax ikx e ok tzoqpaj kyi'j aj Canaán, aqeju ate' tuj tnam Hebrón aju toktoq tb'i nej Quiriat-arba, ex kub' kyb'yo'n Sesai, tuk'ix Ahimán ex tuk'ix Talmai.

Tzyet tnam Debir tu'n Otoniel ex tzaj q'o'n Acsa tu'n tok te t-xu'jil Josué 15.15-19

11Ex e ok tzoqpajtl ti'j tnam Debir aju toktoq tb'i nej Quiriat-sefer.

12Atzunte Caleb xi ttziyan jun yol kyja': Alkye jun ma tz'ok tzoqpaj ti'j tnam Quiriat-sefer ex qa ma tzyet tu'n, jaku txi nq'o'ne nme'jele Acsa te tu'n tok te t-xu'jil.

13O tzyet tnam tu'n Otoniel aju tky'ajal Cenaz aju titz'in Caleb; xitzun tq'o'n Caleb tme'jel Acsa tb'i tu'n tok te t-xu'jil Otoniel.

14Ex tej otoq b'ant tten Acsa tu'n t-xi' tuk'il Otoniel, xi tma'n Otoniel te tu'n t-xi tqanin te tman jun piẍ tx'otx' te kojb'il. Ku'tztzun Acsa tib'aj bur ex xi tqanin Caleb te:

—¿Ti taja?

15Xi ttzaq'we'n Acsa:

—Wajb'ile tu'n t-xi nqanine jun xtalb'il teya. Yake ma tzaj tq'o'na weye aju tzqij tx'otx' tuj lugar Néguev, ax ikx q'ontza qe twi a' weye.

Xitzun tq'o'n Caleb te txin qe twi a' te jawni ex qe twi a' te kub'ni.

Qe tnam e tzyet kyu'n aj Judá ex qe aj Benjamín

16Atzun qe tiyjil Hobab aju aj Quenita, aju tji' Moisés, e je'tz tuj tnam Tqan Xa'j tb'i tu'n kyxi' kyuk'il qe tiyjil Judá, ex e je'x tuj tzqij tx'otx' kye aj Judá tuj tx'otx' Néguev niqayin ttxlaj tnam Arad; atzun e kyaj ten najal junx kyuk'il qe xjal najlqe tuj tx'otx' lu.

17Aqeju tiyjil Judá e je'x kyuk'il qe kyerman aqeju tiyjil Simeón, ex e ok tzoqpaj kyi'j aj Canaán aqeju najlqe tuj tnam Sefat, ex b'i'x kub' kyxitun tnam te jumajx. Kyja'tzun ok kyq'o'n tb'i tnam Horma.

18Tzyet tnam Gaza kyu'n tuk'ix tnam Ascalón ex tnam Ecrón ex qe tx'otx' ate' kyi'jele.

19O ten Qman kyuk'il qe tiyjil Judá ex o tzyet tiwitz tx'otx' kyu'n, ex minti' e xkye' tu'n tex kylajo'n qe xjal najlqe tuj mlaj tx'otx', porke qe xjal lu puro k'uxb'il kycarwaj in che ajb'en tuj q'oj.

20Te Caleb xi q'o'n tnam Hebrón ik tza'nx otoq tma Moisés, ex e je'x tlajo'n Caleb qeju ox tky'ajal Anac ate'toq tuj.

21Atzun kye tiyjil Benjamín minti' e xkye' tu'n tex kylajo'n qe xjal aj Jebuseo aqeju najl tuj Jerusalén. Kyja'tzun qe xjal aj Jebuseo ax najlqe ja'lo junx kyuk'il qe tiyjil Benjamín tuj Jerusalén.

Tzyet tnam Betel kyu'n qe tiyjil José

22-23Qe tiyjil José kub' kyximan tu'n kyok tzoqpaj ti'j tnam Betel, aju tnam Luz tb'i nej, xi kysama'n junjun xinaq ke'yilte tnam ex ate Qman in onintoq kyi'j.

24Aqeju xinaq otoq che pon ke'yilte tnam o kyil tej tetz jun xinaq tuj tnam, ex xi kyma'n te: Qa ma tzaj tyek'una qeye jatum b'a'n tu'n qokxe tuj tnam, mi'ntzun kub' qb'yo'ne.

25Tzajtzun tyek'un xinaq jatum b'a'n tu'n kyokx tuj tnam, ex kub'tzun kyb'yo'n tu'n spad kykyaqil qe xjal najlqe tuj, atzunte xinaq aju otoq tzaj yek'unte jatum b'a'n tu'n kyokx tuj tnam, o klet kyu'n, kyuk'ix kykyaqil qeju ate' tuj tja.

26Atzunju xinaq lu xi' tuj kytx'otx' aj Heteo, jaw tb'incha'n jun ak'aj tnam ex ok tq'o'n tb'i Luz, ex axtzun tb'i toksa'n ja'lo.

Qe tnam minti' kub' kyi'j kyu'n aj Manasés ex qe aj Efraín

27Qe tiyjil Manasés minti' e xkye' tu'n tex kylajo'n qe xjal najlqe kyuj qe tnam lu: Bet-seán, Taanac, Dor, Ibleam ex Meguido, ex mi qe xjal najlqe kyuj qe aldey ate' niqayin kyi'j qe tnam lu; kyja'tzun qe xjal aj Canaán ax e najan kyuj qe tnam lu.

28Tejtzun tok mastl kyipun aj Israel, e oktzun kyq'o'n qe aj Canaán aq'nal lajwers, ex minti' e xkye' tu'n tex kylajo'n.

29Ax ikx qe tiyjil Efraín minti' e xkye' tu'n tex kylajo'n qe aj Canaán, aqeju najlqe tuj tnam Gezer, kyja'tzun, ax e najan qe aj Canaán kyxol.

Qe tnam minti' kub' kyi'j kyu'n txqantl kyiyjil aj Israel

30Ax ikx qe tiyjil Zabulón minti' e xkye' tu'n tex kylajo'n qe aj Canaán, aqeju najlqe tuj tnam Quitrón ex tuj tnam Naalal, kyja'tzun qe xjal aj Canaán ax e najan kyxol, noq o'kx e ok kyq'o'n aq'nal lajwers.

31Ax ikx qe tiyjil Aser minti' e xkye' tu'n tex kylajo'n qe xjal aj Canaán, aqeju najlqe kyuj qe tnam lu: Aco, Sidón, Ahlab, Aczib, Helba, Afec ex Rehob.

32Ex tu'nju minti' e xkye' tu'n tex kylajo'n qe aj Canaán kyuj qe tnam lu, kyja'tzun ax e kyaj ten najal kyxol.

33Ax ikx qe tiyjil Neftalí minti' e xkye' tu'n tex kylajo'n qe xjal aj Canaán, aqeju najlqe tuj tnam Bet-semes ex tuj tnam Bet-anat, ex e ok kyq'o'n te kymajen tu'n kyb'inchante aq'untl kyuwxix, ex axtzun e kyaj ten najal kyxol.

34Qe xjal aj Amorreo e je'x kylajo'n qe tiyjil Dan max kyuj tiwitz tx'otx', ex minti' xi kyq'o'n amb'il kye tu'n kyten kyuj chq'ajlaj.

35Kyja'tzun, qe xjal aj Amorreo ax e najan t-xe witz Heres ex kyuj qe tnam Ajalón ex Saalbim. Ex tej tok mastl kyipun qe tiyjil José, e ok kyq'o'n qe aj Amorreo te kymajen tu'n kyb'inchante aq'untl kyuwxix.

36Aju tmojonil kytx'otx' aj Amorreo, atzun xi'yni twitz witz Acrabim, ponin max tuj tnam Sela, ex atzun xi'yintl te jawni.