Hageo 2 - Mam Huehuetenango New Ortography

Mas tb'anil k'okel tja Dios kb'antel

1Tuj 21 tajlal twuqin xjaw tzaj yolin Qman juntl maj te Hageo aju t-sanjel,

2ex xi tma'n te tu'n t-xi tma'n te Zorobabel, te Josué ex kye xjal otoq che ul meltz'aj tuj kytanmi:

3Qa at jun kyxole o ke'yinte aju tb'anilxix b'inchb'en te tja Dios nej, b'a'n tu'n ttzaj tma'n qa junx ta' tuk'il ju nib'an tb'ant ja'lo. ¿Myape ax tok a jlu minti' ma pon b'inchb'en te ik tza'n aju b'ant nej?

4Ex tenx tipuna, aya Zorobabel; tenx tipuna Josué, aya nejenel kye pal, ex tenx kyipune kykyaqile aqeye xjal ate'ye tuj tx'otx' lu; che aq'nane ok chin tele kyuk'ile. Aqine Kymane, aju Tajaw Tkyaqil in xi nma'ne jlu kyeye.

5Ik tza'n xi ntziyane kyeye tej kyetze tuj Egipto, aju Nxewe kukx at kyuk'ile. Mi'n che xob'e.

6Ch'ix tpon tq'ijlalil tu'n ttzaj yukch kya'j ex enter tx'otx' wu'ne, tuk'ix mar ex tx'otx'.

7Che tzajel lu'lun kykyaqil nasyon wu'ne ex ktzajel kyi'n kyq'inumab'l, ex knojel njaye tu'n wajwalile. Aqine Kymane aju Tajaw Tkyaqil in chin q'mante jlu:

8Weye aju saq pwaq ex q'an pwaq chi Qman, aju Tajaw Tkyaqil.

9Aju njaye lu mas tb'anil k'okel ik tza'n tnejel ex wu'ne che tel xjal tuj tzalajb'il tuj lugar lu. Aqine Kymane aju Tajaw Tkyaqil in chin q'mante jlu.

Xi tkawin Dios qe xjal tu'n tlaj minti' japun tyol kyu'n

10Tuj 24 tajlal tb'elajin xjaw te tkab'in ab'q'i ttzyetlen tkawin rey Darío, tzaj yolin Qman tuk'il Hageo aju t-sanjel, chi kyja':

11Atzun jlu in tma'n Qman aju Tajaw Tkyaqil: Qaninxa kye pal junjun xjel ti'j ley kyja':

12Qa at jun xjal ma txi q'inte chib'j xjansamaj b'alq'i'n tuj t-ẍjo'w, ex qa ma tzik' takl ttxa'n t-ẍjo'w ti'j pan, chib'j, ta'l twitz uva, chib'j aseyt, ex qa juntl wiq chib'j, ¿Jakupe che xjanset qe jlu ikju? Atzun kye pal tzaj kytzaq'we'n, mlay, che chi.

13Xi tqanin Hageo juntl xjel kyja': Ex qa at jun otoq tz'ilix tu'nju toklen tmako'n t-ximlal jun kyimni ex qa ma tz'ok tmako'n qe ti'xti lu: ¿Mlaype che ok qe jlu te tz'il? Atzun kye pal tzaj kytzaq'wen, jaku, che chi.

14Xitzun tma'n Hageo: Chi Qman in tma'n: Iktzun in b'aj kye qe xjal lu: Tkyaqil aju in kyb'incha'n ex tkyaqil aju in tzaj kyq'o'n weye, puro tz'il qe.

15Textzun ja'lo che ximane ti'j jlu, na'nxtoq ttzyet tu'n tjaw b'inchet njaye,

16¿Alkyetoq in b'aj kyi'j xjal? Qa at jun ma txi' jatum ta' jun b'yuj twitz awal te winqin malb'il, ok tpon q'ilte noq laj malb'il in b'ant, ex ok t-xi' jun jatum nne'l ta'l twitz uva tu'n tjatz ti'n 50 ẍoq' ta'l twitz uva, ok tpon q'ilte noq winqin ẍoq' in b'ant.

17O naj tkyaqil kyaq'unb'ene wu'ne tu'n kyq'iq', yab'il ex saqb'aqun, atzun kyeye minti' e ajtz meltz'aje wuk'ile. Aqine Kymane in chin q'mante jlu.

18Kyq'o'nke kwent ti'j, ja'lo 24 tajlal tb'elajin xjaw ma kub' qe' t-simyentil njaye, ex tz'elx kynik'e ti'j.

19Maske ja'lo minti' twitz awal kyuj tx'utx', ex na'nx ttzaj kyq'o'n kywitz qe tqan uva, mi qe tqan higo, mi qe tqan karnad ẍoq', mi qe tqan olivo, pero texju ja'lo che b'el nky'iwla'ne, chi Dios.

Aju yol tzaj ttziyan Qman te Zorobabel

20Tuj 24 tajlal tb'elajin xjaw tzaj yolin Qman juntl maj tuk'il Hageo,

21ex xi tma'n te tu'n t-xi tma'n te Zorobabel aju gobernador te Judá aqeju yol lu: Ktzajel lu'lun kya'j ex tx'otx' wu'ne;

22che elex nxo'ne qe q'uqb'il te kawb'il, knajel kyipumal qe kawb'il te twitz tx'otx' wu'ne, che jawil ntoline qe carwaj in che ajb'en tuj q'oj, kyuk'ix qeju ate'jx kyuj, che najel qe chej cabay ex qe xjal kyjax kyib'aj kb'el kyb'yon kyib' kyxolx tu'n spad.

23Ex tuj tq'ijlalil lu, aya Zorobabel, k'okel nq'o'ne toklena ik tza'n nxmulq'ab'e in ajb'en te sey, porke aqine ma chin jaw sk'onte teya. Aqine Kymane, aju Tajaw Tkyaqil in chin q'mante jlu.