Romanos 2 - Mam Huehuetenango New Ortography

Tuj tumelxix aju jwisi tu'n Dios

1Tu'ntzunju minti' tkolb'il tib'a, aya wuk'il, noq alxkyeya in yolina ti'j juntl qa aj ilxix; tu'nju in yolina ti'j juntl qa aj ilxix, tib'ajxa in kub' tz'aq, porke in tma'na qa aj ilxix juntl, ax ikx teya in tb'incha'na mya b'a'n.

2Ex b'a'n qu'n, tuj tumelxix kb'el kysentens xjal tu'n Dios, aqeju in che b'inchan il.

3Yajtzun teya wuk'il, in yolina kyi'j qeju in che b'inchan il ax ikx teya in tb'incha'na mya b'a'n, ¿maj in ximana ti'j qa tu'n ttzoqpaja tuj jwisi tzul tu'n Dios?

4¿Mujqa nne'l tik'una Dios tu'nju b'a'nxix ex at tpasens ex apa'nx tu'n? ¿Minti'pe b'a'n tu'na ate Dios in txokon teya tu'n tajtz ti'j tanmiya tu'nju at nim t-xtalb'il?

5Ex tu'nju kyuw tanmiya ex minti' nna'jtz ti'j, kyja'tzun mas in ch'iy tcastiwoya aju ok tk'ma'ya tuj q'ij ok ttzaj tcastiwoya tu'n Dios, ex ok ttzaj jwisi tuj tumelxix tu'n Dios.

6Porke ktzajel tq'o'n Dios chojb'il te teyle junjun ik tza'nx taq'unb'en.

7Ktzajel tq'o'n Dios chwinqlal te jumajx kye qeju kukx tok tilil kyu'n tu'n kyb'inchante b'a'n, nno'k tilil kyu'n tu'n kykamb'ante jun nimb'il kye tuj kya'j ex tu'n tten kychwinqlal te jumajx.

8Atzun kye qeju kyk'i' che b'in ex minti' in xi kyniman aju yol ax tok, noq o'kx in xi kyniman aju mya tuj tumel, tzul tq'oj Dios kyi'j ex ktzajel tq'o'n kycastiw.

9Tzul yajb'il ex k'ixk'oj kyib'aj kykyaqil xjal in che b'inchan mya b'a'n, tnejelxix kye xjal judiy, ax ikx kye xjal mya judiy.

10Atzun kye qeju in kyb'incha'n b'a'n, ktzajel tq'o'n Dios nimb'il kye tuj kya'j, ex che tel tuj txub'txaj, tnejelxix kye xjal judiy, ax ikx kye xjal mya judiy.

11Porke minti' nno'k tke'yin Dios ti kyxilen xjal.

12Ex kykyaqil qeju o che b'inchan il ex minti'toq b'i'n tley Moisés kyu'n, ok che najel minti' toklen ley kyi'j; ex kykyaqil qeju o che b'inchan il ex b'i'ntoq tley Moisés kyu'n, che okel tuj xjel ex kb'el kysentens tu'nxju ley.

13Ex mlay che ok tq'o'n Dios qe xjal te tz'aqlxix qa noq in che b'in ti'j ley ex minti' in japun kyu'n; noq o'kx che okel te tz'aqlxix tu'n, aqeju in japun ley kyu'n.

14Porke qe xjal mya judiy qe, aqeju minti' tley Moisés kyuk'il, qa ma kyb'incha aju in tma'n ley, ax kynab'l in q'mante alkye tu'n kyb'inchante maske minti' jun ley kyuk'il, kyja'tzun kyleyx kyib'.

15Ax kyb'inchb'en in yek'unte qa at jun ley tz'ib'an tuj kyanmi, aju ley lu in tma'n tu'n tjapun kyu'n ik tza'n in tma'n tuj tley Moisés, ex ax kyanmi in q'mante qa ax tok jlu, ex tuj kyximb'etz at maj in kyma'n qa at kyil ex at maj in kyma'n qa minti'.

16Tkyaqil jlu k'elel tuj q'ancha'l tuj tq'ijlalil ok kyok xjal tuj xjel twitz Dios tu'n Jesucrist, ik tza'nx tqanil kolb'il in xi npakb'a'ne, ex tkyaqil kyb'inchb'en xjal mya b'a'n ewan kyu'n, k'elel chik'e'.

Qe xjal judiy ex aju tley Moisés

17Aya tok tb'iya xjal judiy ex q'uql tk'u'ja ti'j tley Moisés ex in jaw tniman tib'a tu'nju ojtzqi'n Dios tu'na.

18Ojtzqi'n tajb'il Dios tu'na, ex ik'ni twitza ti'j aju b'a'nxix, porke xnaq'tza'maja ti'j ley.

19Ex q'uql tk'u'ja ti'j qa aya ẍaqlul kye moẍ ex qa aya q'ol spik'un kye qeju in che b'et tuj qlolj.

20Tuj tnab'la qa aya q'ol xnaq'tzb'il kye qeju minti' b'a'n kyu'n, ex xnaq'tzala kye k'wa'l, tu'nju at ttxuylal ojtzqib'l tuk'ila tuj ley, ax ikx ttxuylal ju yol axix tok.

21Qatzun aya xnaq'tzal te juntl, ¿tiqu'n minti' in t-xnaq'tzan tib'a? Aya in pakb'an kye xjal tu'n mi'n kyelq'an, ¿yajtzun teya, tiqu'ntzun in elq'a'na?

22Aya in q'mante tu'n mi'n kyb'inchante xjal aj pajil, ¿yajtzun teya, tiqu'ntzun in tb'incha'na aj pajil? Ex aya ik'un qe tilb'ilal tu'na, ¿tiqu'ntzun nne'tz telq'a'na q'inumab'l tuj kyja qe tilb'ilal?

23Aya in jaw tniman tib'a tu'nju at tley Dios tuk'ila, ex in kub' tq'o'na tch'ixwi Dios tu'nju nnik'a tib'aj tley.

24Tuj tumelxix in tma'n tuj Tu'jil kyja': Qe xjal mya judiy qe in che yolin mya b'a'n ti'j Dios noq tu'n kylaje, chi tuj Tu'jil.

25Ax tok at tajb'en sircunsisyón qa ma japun tley Moisés tu'na; ex qa ma tzik'a tib'aj ley, k'okela ik tza'n mya sircunsidarimaja.

26Atzunju xjal mya sircunsidarimaj ex qa ma japun tu'n aju in tma'n ley, junx ta' ik tza'n otoq sircunsidarinjtz.

27Ex aju xjal mya sircunsidarimaj ti'j tchib'jal, qa ma japun ley tu'n, k'okel q'o'na te aj il tu'n, tu'nju at tley Dios tz'ib'an tuk'ila ex o sircunsidarinjtza, pero nnik'a tib'aj ley.

28Porke mya ax tok judiyte xjal noq tu'nju in tyek'un tib' qa judiy xjalte; ex mya ax tok sircunsisyón aju in b'ant ti'j qchib'jal.

29Aju xjal axix tok judiy, atzun teju at tley Dios tuj tanmi; ex aju sircunsisyón axix tok, atzun tu'n tten tuj qanmi, mya tu'n ley tz'ib'an in b'ant jlu, noq o'kx tu'n T-xew Dios in tb'incha'n. Ate xjal lu kjawil nimsa'n tu'n Dios, mya kyu'n xjal.