1Chi Qman kyja': Ktzajel nsama'ne jun kyq'iq' kyuwxix wen te xitb'il te tnam Babilonia, ex tu'n kynaj qe xjal najl tuj, aqeju aj q'oj wi'je.
2Che tzajel nsama'ne xjal te najchaq, tu'n t-xi kyi'n tkyaqil ju at tuj tnam Babilonia ik tza'n in xi tiqan kyq'iq' ttxk'omil triw, ex minti' xjal mi ti'xti kyjel ten tuj. Ok tpon tq'ijlalil tu'n kynaj, che okel tzoqpaj aj q'oj kyi'j tuj tkyaqil part.
3Kyxqinin ele xob'l plech, aqeye b'a'n che xo'ne plech, kyq'o'nke k'uxb'il kyi'je aju in ajb'en tuj q'oj. Mi'n tzaj q'aq'an kyk'u'je kyi'j qe ku'xun ate' tuj Babilonia, kyb'yonkuye kykyaqil qe soldad.
4Kyuj kykyaqil tnam kye aj Caldeo che b'ajel xayu'n xjal tu'n lans ex che kyjel pale' kyuj cay kyimni qe.
5Na'nx kykyaj nkoline aj Israel ex aj Judá, aqine Dios aju Tajaw Tkyaqil, maske ma noj tuj kytanmi tu'n il ex maske o che b'inchan il nwitze, aqine Dios Xjan kye aj Israel.
6Kyex oqe tuj Babilonia, kyklom kyib'e alkye jaku b'ant tklonte tib', tu'ntzun mi'n kykyime tu'n tlaj kyil aj Babilonia. Ma pon tq'ijlalil tu'n t-xelin tu'n Qman ti'j kyb'inchb'en mya b'a'n ex tu'n tkub' kycastiw ik tza'nx kyb'inchb'en.
7Ik tten Babilonia tuj nq'ab'e ik tza'n jun tal copa q'an pwaq ttx'otx'il tku'x vin tuj, in chyo'n kywi' kykyaqil xjal twitz tx'otx' tu'n, kyja'tzun b'i'x tzakj kynab'l xjal najl kyuj kykyaqil nasyon, aqeju xi kyk'a'n vin lu.
8Te jurat naj ma kub' tz'aq tnam Babilonia ex b'i'x ma b'aj xitj. Kyok tene oq'el ti'j, kyi'ntze remey te q'anb'il te ẍil ti'j, qa jaku b'anix.
9Ma tz'ok qq'o'ne remey ti'j Babilonia ex minti' ma b'anix, kykolin kyaje, qo ex tzalu, ku taj teylex te junjun tuj ttanmi, porke ma'xix ju tcastiw ma kub' ex b'i'x ma naj te jumajx.
10Ma txi tb'incha'n Qman qi'j; chux qeye, qo' q'malte tuj tnam Sión aju ma tb'incha Qman aju Qdios.
11Ma kub' t-ximan Qman tu'n tkub' t-xitun tnam Babilonia, ex ma txi tma'n kye qe rey te tnam Media tu'n kyq'ojin ti'j tu'ntzun t-xelin tu'n Qman kyi'j, ex tu'n t-xelin tu'n ti'j ju o kyb'incha ti'j tja. Kyjaqu'n b'aje kywi' qe plech ex kytzyume qe maqb'il in che ajb'en tuj q'oj,
12Kyyek'un jawe bander tu'n kyok tzoqpaje ti'j muro tok ti'jele tnam Babilonia, kyq'onkuye mas nim kyajlal soldad, kyq'onkuye txqan soldad te xq'uqil, ex e kykub' ten txqantl tuj ewaj noq list kyten, porke kb'antel tu'n Qman aju o kub' t-ximan tu'n tb'inchante kyi'j qe xjal najl tuj tnam Babilonia.
13Aya tnam Babilonia tkub'a kyxol qe nima matijxix ex nimxix tq'inumab'la at, ya ma pon q'ij tu'n tnaja, ma pon b'aj q'ij tu'n ttena.
14Ate Qman aju Tajaw Tkyaqil ma txi tma'n jun yol axix tok tu'nx tib': Che ul nim aj q'oj ti'ja wu'ne ik tza'n kyb'aj ẍplon, ex kxel kyb'itzan b'itz te kamb'ab'l ti'ja.
B'itz te nimsab'l tb'i Dios Jeremías 10.12-1615Tu'n tipumal Qman o b'ant tx'otx', tu'n tnab'l kub' tq'o'n tq'uqb'il ex tu'n tojtzqib'l xi tlik'pu'n kya'j.
16Ok tq'ajt Dios in tzaj julin a' twitz kya'j, in tzaj ti'n muj tuj ttxa'npun enter tx'otx' tu'n tjapun twitz kya'j, in tzaj qoptz'aj tqan q'ankyoq tu'n tuj tmijil tqan jb'al ex nne'tz ti'n kyq'iq' jatum k'u'n tu'n.
17Kykyaqil xjal minti' kynab'l ex minti' nne'l kynik' ti'j. Ktzajel kych'ixwi qeju in che kub' b'inchante tilb'ilal tu'n tok kydiosin, tu'nju puro sb'ul qe tilb'ilal ex mya itz' qe.
18Noqx gan qe ex minti' kyajb'en; ok tpon tq'ijlalil tu'n ttzaj jwisi tu'n Qman, che najel.
19Mya ik tten aju Tdios Jacob, aju b'inchante tkyaqil aju at. Aku jaw sk'onte kye aj Israel te jun tetzb'il, ex atzun tb'i jlu, Qman Tajaw Tkyaqil.
Ate Babilonia tmakb'il Qman in ajb'en te q'ob'l castiw20Aya tnam Babilonia ik ttena tuj nq'ab'e ik tza'n jun martiy, ex ik tza'n qe nmakb'ile in che ajb'en tuj q'oj, ajb'ena wu'ne tu'n kykub' xitj qe nasyon ex qe kawb'il.
21Ajb'ena wu'ne tu'n kynaj qe chej, kyuk'ix qe xjal kyjax kyib'aj, kyuk'ix qe carwaj ex qe yukul kye.
22Ajb'ena wu'ne tu'n kynaj qe xinaq ex qe xu'j, qe tij xjal ex qe q'a, qe ku'xun ex qe q'apoj,
23ajb'ena wu'ne tu'n kynaj qe pastor kyuk'ix qe kyẍne'l, qe ch'okil tx'otx' kyuk'ix qe kywakẍ, qe kawil ex qe xjal at kyoklen kytxlaj.
Tzul castiw kyib'aj aj Babilonia24Ex kywitzxe kb'el nq'o'ne tcastiw tnam Babilonia ex kykyaqil aj Caldeo, tu'n tlaj tkyaqil mya b'a'n kyb'incha ti'j tnam Sión. Aqine Dios in chin q'mante jlu.
25Aj q'oj qine ti'ja aya tnam Babilonia. Ik ttena ik tza'n jun witz xitul tkyaqil. Ma b'aj t-xituna tkyaqil twitz tx'otx'. Aqine Dios kxel nma'ne jlu: Kxel nnuqpi'ne nq'ab'e tu'n tkub' tcastiwoya wu'ne, ktzajel ntolina twitz jun pik ma' twa'l ex k'okela wu'ne ik tza'n jun witz otoq b'aj tz'e'y.
26Mi jun ab'j ktzajel q'i'n ti'j ttx'aqan tnam Babilonia tu'n kyjaw b'inchet qe ja juntl maj tzalu, te jumajx k'okel tnam te tzqij tx'otx'. Aqine Dios in chin q'mante jlu.
27Kyyek'un jawe bander twitz kya'j, kyq'ajtzan oke chun kyuj qe nasyon, kyb'inchame kyten qe nasyon tu'n kyok tzoqpaj q'ojlel ti'j tnam Babilonia, kychmon oke qe nasyon Ararat, Mini ex Asquenaz tu'n kyok tzoqpaj ti'j, kyq'o'nke jun nejenel tu'n tkub' nej tuj q'oj. Che ojqelinx qe chej kyu'ne ik tza'n in che'x lipan qe ẍplon nimxix kyajlal.
28Kyb'inchame kyten qe nasyon tu'n kyok tzoqpaj ti'j; aqeju rey te Media kyuk'ix qe gobernador ex qe nejenel at kyxol ex kykyaqil qe xjal jatum in che kawin.
29Ma tzaj lu'lun tx'otx' ex in yukch wen, porke ma japun tu'n Qman aju ximamaj tu'n ti'j Babilonia, tu'n tok te jun lugar tzqij tx'otx' minti' xjal tuj.
30Qe soldad te Babilonia ma txi kykolin tu'n kyq'ojin ex ma tz'okx kylamon kyib' kyuj qe ja te kykolb'il kyib', ya minti'tl kyipun, ma che ok ik tza'n qe xu'j. Ma tz'ok q'o'n tq'aq'al kyja ex ma che b'aj piẍj qe pasador tok kyi'j tlamel tnam.
31Tkyaqil ttxa'nile tnam in che tzaj qe sanjel q'malte tqanil te rey te Babilonia qa otoq kub' ti'j enter tnam.
32Ma che tzyet qe xajb'il a' kyu'n aj q'oj, ma tz'ok kyq'o'n tq'aq'al tqan ajlaj in ch'iy tuj sob'an ex ma tzaj nim kyxob'il qe soldad te Babilonia.
33Porke ate Qman aju Tajaw Tkyaqil ex Kydios aj Israel in tma'n kyja': Ik tten Babilonia ik tza'n jun pe'n jatum in kub' wab'at triw tu'n tel ttxk'omil, ex ch'ix tul kanun tq'ijlalil tu'n tok chmet twitz awal.
34-35Che chi aj Jerusalén, aqeju najl tuj tnam Sión: Ma qo b'aj tpaẍu'n Nabucodonosor aju rey te Babilonia, ex ma qo'x tchyo'n; ma qo kyaj tq'o'n ik tza'n jun laq minti' tuj. Ik tten ik tza'n jun nintz txkup, ma qo'x tb'alq'u'n, ma noj tk'u'j tu'n qq'inumab'l ma tz'el ti'n qe ex ma qo etz tlajo'n tuj qtanmi. E t-xi kychjo'n aj Babilonia aju mya b'a'n o kyb'incha qi'j ex e t-xi kychjo'n aj Caldeo tu'nju nim xjal kub' kyb'yo'n.
Aju yol xi ttziyan Dios kye aj Israel36Chi Qman kyja': Aqine chin xel b'inchante kyi'je, kxelil wu'ne kyi'j aj q'oj kyi'je, b'i'x che ajel tzqij qe nima wu'ne ex qe twi a' at tuj Babilonia.
37Noq ttx'aqan tnam Babilonia kyjel ten; te kynajb'il xo'j k'okel ex minti' xjal knajal tuj. Kykyaqil xjal che jawil sek'paj ti'j ex che xmayil ti'j.
38Kykyaqil aj Babilonia che jawil wuyin ik tza'n qe b'alun, ex che jawil tzanun ik tza'n qe tal b'alun.
39Oktzun ttzaj el kyk'u'j wen, kb'el nq'o'ne jun nintz wa'n kywitz tuk'ix kyk'a vin tu'ntzun kytzalaj ex tu'n tchyo'n kywi'; ex ktzajel kywatl ex mi'n tzul kynab'l te jumajx. Aqine Dios in chin q'mante jlu.
40Che xel wi'ne ik tza'n in che'x q'i'n qe tal ẍne'l, qe tman chip ex qe tman ẍne'l tuj b'iyb'il kye.
Tej tkub' xitj tnam Babilonia41Ma kub' xitj ex ma kub' ti'j tnam Babilonia aju puro b'a'n yolb'ilte tuj tkyaqil twitz tx'otx'. B'i'x in che jaw sek'paj qe nasyon ok kylonte aju otoq b'aj ti'j.
42Ma tz'okx mar tuj tnam Babilonia ex ma kyaj mulq'aj tjaq' a'.
43Qe tnam at tuj tkwent ma che ok te jun tzqij tx'otx' xob'ajilxix, jun tx'otx' jumajx tzqij jatum mi jun xjal knajal tuj, ex milpe jun xjal tu'n tten noq ch'in tuj.
44Kb'el tcastiw Bel wu'ne, aju tilb'ilal kydios xjal at tuj Babilonia, k'elel wi'ne te tkyaqilju otoq tz'el ti'n kye xjal nej, ex mlayx che pon juntl maj qe xjal te txqantl nasyon tuj. Kb'el xitj muro tok ti'jele tnam Babilonia.
45Kyetze tuj tnam Babilonia aqeye xjal etzan wu'ne, ex teylex te junjun klom tib' tu'n mi'n tkyim, ex nimxix ntx'u'jile ma tzaj.
46Mi'n che jaw sek'paje ex mi'n tzaj kyxob'ile tu'nju yol in b'et kyxol xjal tuj tx'otx' lu; junxitl tten yol in b'et kyxol xjal junjun ab'q'i, at yol qa in che q'ojin xjal tuj tnam ex qa in che q'ojin qe kawil kyxolx.
47Kyja'tzun tzul tq'ijlalil che b'ajel nxitune qe tilb'ilal ate' tuj Babilonia. Ktzajel tch'ixwi tkyaqil tx'otx' Babilonia ex kykyaqil kyimni che b'el pale' tuj tnam.
48Che tzalajel kya'j ex tx'otx' tuk'ix tkyaqilju at kywitz ok tkub' xitj tnam Babilonia, porke tuj tx'otx' tuj tb'anq'ab' q'ij che tzajel aj q'oj xitul te. Aqine Dios in chin q'mante jlu.
49Kb'el xitj tnam Babilonia tu'n tlaj tkub'len kyb'yo'n aj Babilonia qe aj Israel ex tu'n kylaj qe xjal kub' kyb'yo'n tuj enter twitz tx'otx'.
Tqanil kye xjal judiy, ate' tuj Babilonia50Kyel oqe ex mi'n che we'ye aqeye ma che tzoqpaj ex minti' ma che kyime; che ximane ti'j Qman ok kylaq'e'ye najchaq ex kyna'ntze tnam Jerusalén.
51Kyeye in kyma'ne kyja': Ma tzaj qch'ixwiye tu'nju in che yasun xjal qi'je, nimxix qch'ixwiye ma tzaj, porke ma che okx stranjer xjal kyuj Lugar Xjan te tja Qman, che chiye.
52Kyja'tzun chi Qman kyja': Tzul tq'ijlalil che b'ajel nxitune qe tilb'ilal ate' tuj Babilonia, ex tuj tkyaqil tx'otx' te Babilonia che ayayal xjal tu'n ẍil tok kyi'j.
53Maske che jax aj Babilonia max twitz kya'j tu'n tjaw kyb'incha'n qe ja ma' kywa'l te kykolb'il kyib', pero che xel nsama'ne aj q'oj kyi'j tu'n kyb'aj xitun. Aqine Dios in chin q'mante jlu.
Tej tb'aj xitj tnam Babilonia54Kyb'inxe tq'ajq'ajel kywi xjal tuj Babilonia in che sch'in tu'n ta'w k'ixk'oj ex in che wuyin tuj tx'otx' kye aj Caldeo,
55porke ma kub' xitun tnam Babilonia tu'n Qman ex b'i'x ma we' tq'ajq'ajel kywi xjal tuj tnam. Ik kyten aj q'oj kyi'j ik tza'n mar in pulin wen.
56Ma che ul aj q'oj xitulte tnam Babilonia, ma che tzyet qe soldad kyu'n ex ma b'aj kytoqin qe kyxob'l plech. Porke in kub' tq'o'n Qman Dios kycastiw xjal ik tza'nx kyb'inchb'en.
57Ate Rey, aju tok tb'i Qman Tajaw Tkyaqil, in tma'n kyja': Kchyo'l kywi' qe nejenel te Babilonia wu'ne, ikx qe aj nab'l ex qe kawil at kyxol, kyuk'ix qe xjal ma' kyoklen ex qe soldad, ex ok ttzaj kywatl, ya mi'n tzul kynab'l te jumajx.
58Aqine Dios aju Tajaw Tkyaqil in nma'ne jlu: Che b'el xitj kykyaqil muro ma' kywitz tok ti'j tnam Babilonia ex k'okel kyq'aq'al qe tlamel tnam ma' kywa'l; noqx gan otoq che aq'nan tnam xjal ex otoq che sikt qe nasyon ti'j aq'untl lu, noq tu'n tajb'en te twa q'aq'.
Xi q'i'n tuj Babilonia aju tqanil tma Jeremías59Tuj tkyajin ab'q'i ttzyetlen tkawin Sedequías aju rey te Judá, xi t-sama'n Jeremías jun tqanil tu'n t-xi ti'n Seraías aju tky'ajal Nerías ex tal tchman Maasías, tej t-xi' tuj Babilonia tuk'il rey Sedequías, tu'nju atzun Seraías b'inchalte ti'j jatum tu'n ttan rey Sedequías.
60Ku'xtzun ttz'ib'an Jeremías tuj jun libro tkyaqil tqanil ti'j k'ixb'isab'l attoq ttzajel tib'aj tnam Babilonia ex tkyaqilju q'mamaj ti'j tnam lu.
61Ex xi tma'n Jeremías te Seraías kyja': Ok tpona tuj tnam Babilonia, noq tzik' tna'l tu'na tu'n tjaw t-sch'i'na tkyaqil tqanil lu.
62Ex kxel tma'na kyja': Aya Nman, o tmaya tu'n tkub' t-xituna lugar lu ex mi jun kyjel anq'in tuj, mi qe xjal ex mi qe alumaj, porke k'okel tu'na te tzqij tx'otx' te jumajx.
63Oktzun tb'aj t-sch'i'na libro lu, k'alo'nka ti'j jun ab'j ex xo'nxa tuj nima Éufrates,
64ex b'ix txi tma'na kyja': Kyja'xtzun kyjel mulq'aj tnam Babilonia tjaq' a', ex mlay jaw b'inchet juntl maj tuj xitb'ilte ktzajel t-sama'n Qman. Qe xjal najl tuj b'i'x che najel.
Atzun in pon b'aj qe tyol Jeremías tzalu.
Who We AreWhat We EelieveWhat We Do
2025 by iamachristian.org,Inc All rights reserved.
