Eclesiastés 7 - Mam Huehuetenango New Ortography

B'a'n tu'n t-xi qq'o'n qwi' ti'j ju mas b'a'n

1Mas b'a'n qa ma che yolin xjal b'a'n qi'j twitz ju perjum tb'anilxix. Mas b'a'n ju q'ij ok qkyim twitz ju q'ij tej qul itz'j.

2Mas b'a'n tu'n qxi' jatum in che oq' xjal ti'j jun kyimni, twitzju tu'n qxi' tuj jun ninq'ij tja jun xjal, porke aju kamik atzun b'ajsb'il kye kykyaqil xjal, ex aqeju itz'xqe b'a'n tu'n kyximan ti'j.

3Mas b'a'n tu'n qjaw oq' twitzju tu'n qtze'n, maske miyalnix nno'k qwitz tu'n oq'el, pero b'a'n jlu te qanmi.

4Aju xjal at tnab'l in ximan ti'j ju kamik, atzunju xjal minti' tnab'l o'kx in ximan ti'j tu'n t-xi' achil.

5Mas b'a'n tu'n t-xi qb'i'n kawb'il qe kyu'n qe xjal at kynab'l, twitzju tu'n t-xi qb'i'n kyb'itz qe xjal minti' kynab'l.

6Ok kyjaw tze'n qe xjal minti' kynab'l, ik che q'ajt ik tza'n ch'i'x tokx tuj q'aq' in poq'oq'on wen; ax ikx noqx gan te jlu.

7In tzpet tnab'l xjal at tnab'l tu'nju in che kub' yajla'n qe xjal, ax ikx in tzpet tnab'l tu'nju nne'l ti'n pwaq kye xjal tu'n mi'n tkub' kysentens tu'n.

8Mas b'a'n ju b'ajsb'il te jun ti'xti twitz ju ttzyetlen. Mas b'a'n tu'n tten qpasens twitzju tu'n qok jawni qwitz.

9Mi'n taq'a amb'il tu'n ttzaj naj tq'oja, porke aju q'oj atzun in kyb'inchan xjal minti' kynab'l.

10Mi'n tmaya: ¿Tiqu'n mas b'a'n qe tyemp o che b'aj twitzju te ja'lo? Porke jun xjal at tnab'l mlay tma ikju.

11Aju tu'n tten qnab'l, junx ta' ik tza'n jun qetzb'il, ex at tajb'en kye qe xjal najlqe twitz tx'otx'.

12Porke aju nab'l in kolin ti'j xjal, ax ikx ju pwaq in kolin ti'j; pero mas b'a'n qa at tnab'l xjal, porke aju nab'l in tq'o'n chwinqlal.

13Q'onk tkwenta ti'j aju o tb'incha Dios: ¿Alkye jun jaku txi tjiquma'n ti'j aju jaw t-ẍokpi'n Dios ti'j?

14Qa b'a'n ta'ya, tzalajxa tu'n jlu; qatzun mya b'a'n ta'ya, tenkuya ximal ti'j, tza'nx ju tzalajb'il ikx ju b'is tu'n Dios in che tzaj, ex mlayx tz'el tnik' xjal ti'j aju ktzajel ti'j te tib'ajxi.

15Nimku o wile tuj nchwinqlale noqx gan: At xjal b'a'n kymod ex in che kyim naj maske b'a'n kymod, ex at xjal mya b'a'n kymod in che anq'in nim ab'q'i maske mya b'a'n kyb'inchb'en.

16Mi'n tz'ok tq'on tib'a te tz'aqlxix wen ex mi'n tz'ok tq'on tib'a at-xix tnab'la. ¿Tiqu'n taja tu'n tkyim naja?

17Mi'n tz'ok tq'on tib'a te jumajx mya b'a'n, ex mi'n tz'oka minti' tnab'la. ¿Tiqu'n taja tu'n tkyima na'nxtoq tpon q'ij tu'n tnaja?

18Aju mas b'a'n, tzyumxixa qe jlu wen, ex mi'n che'x ttzoqpi'na. Aju xjal in niman te Dios tkyaqil b'a'n k'elel te te.

19Aju xjal at tnab'l, nno'k mas tipumal kywitz laj xjal in che kawin tuj jun tnam.

20Ax tok mi a'l jun xjal at twitz tx'otx' tz'aqlxix wen in tb'incha'n aju b'a'n ex b'ajx b'inchan il.

21Mi'n tz'ok tena b'ilte tkyaqil yol in che yolin xjal ti'j, tu'ntzun mi'n tb'inteya ok tok ten tmajena yolil mya b'a'n ti'ja.

22Porke b'a'n jlu tu'na, ax ikx teya nimku maj ma yolina mya b'a'n kyi'j txqantl.

O jyon Salomón ti'j tu'n tok tnab'l

23Tkyaqil jlu o b'aj nximane ti'j tuk'il nab'l, ex o wajb'eye tu'n woke at nnab'le; pero minti'x in oke at nnab'le.

24Kyuw tu'n tel nnik'e ti'j tkyaqilju at. Puro kyuw wen ex mi jun jaku tz'el tnik' ti'j.

25Xi nq'on wib'e tu'n tknet ojtzqib'l wu'ne, tu'n nxnaq'tzane ti'j ex tu'n njyone alkyexix t-xilen tkyaqil. Ex el nnik'e ti'j qa mya b'a'n tu'n qok minti' qnab'l.

26At juntl ma tz'el nnik'e ti'j mas b'is twitz kamik: Aju xu'j aj pajil ik tten t-ximb'etz ik tza'n jun k'ob'il ex qe tq'ab' ik tza'n jun caden tu'n ttzyet xjal tu'n. Ex aju xjal in tzalaj Dios ti'j ok kletel tu'n twitz ju xu'j lu, atzunju xjal aj il kb'el tz'aq tuj tk'ob'il xu'j lu.

27Aju nximb'etze tu'n tel nnik'e ti'j t-xilen junjun ti'xti, aqine pakb'al, ex atzun jlu o wile:

28Na'nx tel nnik'e ti'j aju wajb'ile tu'n tel nnik'e ti'j. Kyxol jun mil xinaq o'kx junx tz'aqlxix knet wu'ne, atzun kyxol jun mil xu'j mi jun tz'aqlxix o knet wu'ne.

29O'kxtzun jlu ma tz'el nnik'e ti'j: Tz'aqlxix te xjal b'aj tb'incha'n Dios nej, pero tu'nxtzun te xjal xi tjyo'n nimku mya b'a'n.