1Ax ikx xi nma'ntle: Kyb'intze ja'lo aqeye kawil ex nejenel kyxol aj Israel: ¿Myapetzun il ti'j tu'n tel kynik'e ti'j tu'n tb'inchet aju tz'aqlxix kyu'ne ik tza'nx in tma'n ley?
2Atzun kyeye nne'l kyik'une ju b'a'n ex in che tzalaje ti'j ju mya b'a'n; ik in che ok kyq'o'ne qe xjal etzan wu'ne ik tza'n qe ẍne'l b'i'x nne'l kytz'umal ex b'i'x nne'l b'aj kychib'jal ti'j kyb'aqil.
3Ik in che tenb'a qe xjal kyu'ne, aqeju etzan wu'ne, ik tza'n in tenb'a jun ẍne'l tu'n jun txkup te tjaq' k'ul, itz'x in xi tchyo'n, nne'l ti'n ttz'umal ex b'i'x in b'aj tpa'n tb'aqil; ikxtzun kyeye nno'k kyq'o'ne qe xjal etzan wu'ne ik tza'n chib'j tu'n t-xi' tuj k'il.
4Tzul tq'ijlalil tu'n kyok tene txokil ti'j Qman, ex mlay che tzaj tzaq'we'ne tu'n. Tuj tq'ijlalil lu, kb'el tewan tib' kywitze tu'n tlaj mya b'a'n ma b'ant kyu'ne.
5Qe xjal etzan wu'ne in che el txalpuj ti'j ju b'e b'a'n, tu'n kylaj qeju nno'k kyq'on kyib' te nsanjele in che sb'un kye, in kyma'n kye qe xjal in tzaj kyq'o'n kywa: Mi'n b'aj kyk'u'je, che tele tuj txub'txaj, che chi; atzun kye qeju minti' in che tzaj q'onte kywa in xi kyma'n kyja': Tzul tq'oj Dios kyi'je, che chi. Kyja'tzun chi Qman, in tma'n kye qeju nno'k kyq'on kyib' te t-sanjel:
6Mlayx tzaj yek'un jun yol kyeye ik tza'n tuj witzik' qonik'an, ex mlay tzaj q'ma'ntl jun ti'xti kyeye tuj qlolj ti'j alkye tzul te tib'ajxi, ex ch'ix tb'aj tuj kyq'ije ex tzul qlolj kyib'aje.
7Te jumajx kb'el kych'ixwi qe xjal b'a'n che nab'in ex qeju b'a'n che q'ijin. Kykyaqil mi'n che q'ajt tu'nju minti' tzaq'web'l tu'n Dios.
8Atzun weye ma nk'ame nim wipumale tu'n T-xew Qman, ex nne'l nnik'e ti'j alkye ju tz'aqlxix in tma'n Dios tu'n tb'ant kyu'n xjal, ex kyuw nk'u'je tu'n tok nma'ne tib'aj kywitz aj Israel qa mib'an che b'in ex tu'n tok nma'ne aju kyil.
9Kyb'intze jlu ja'lo aqeye kawil ex nejenel kyxol aj Israel, aqeye mi'n kyaje tu'n kyb'inchante ju tz'aqlxix ex in b'aj kyẍoksa'ne tkyaqil aju tuj tumel ta',
10in b'aj kyyajla'ne qe xjal ex nne'l kyi'ne chojenj kye noqx gan, tu'n tjaw kyb'incha'ne tnam Jerusalén aju tkub' twi witz Sión.
11Qe jwes tuj tnam in xi kyb'incha'n kyi'j xjal noq tu'n pwaq, qe pal in kyq'o'n xnaq'tzb'il ti'j ley ax noq tu'n pwaq, ex qeju nno'k kyq'on kyib' te nsanjele in che q'ijin noq tu'n pwaq; tuj kywitz qe jlu qa a Qman onil kye, ex in kyma'n: A Qman at quk'il, misikyer jun mya b'a'n jaku tzaj qi'j, che chi.
12Tu'ntzun jlu, noq tu'n kylaje kb'el xitj tnam Jerusalén aju tkub'sa'n twi witz Sión; noq ttx'aqan kyjel b'uye' ex kb'ajel ch'oket ik tza'n jun kojb'il. Aju witz jatum tkub'sa'n tja Dios, ktzajel ch'iy k'ul tuj.
Who We AreWhat We EelieveWhat We Do
2025 by iamachristian.org,Inc All rights reserved.
