Mateo 2 - Mam Huehuetenango New Ortography

Tej kypon aj nab'l k'ulul twitz Jesús

1Tej titz'j Jesús tuj tnam Belén tuj tx'otx' Judea, tuj tq'ijlalil tej tten rey Herodes, at junjun xjal aj nab'l e tzaj tuj tjawitz q'ij e ul tuj Jerusalén.

2Xi kyqanin:

—¿Jatum ta' ju rey kye xjal judiy, aju ma tz'itz'j? Porke ma qile tche'w tuj tjawitz q'ij, ex ma qo tzaje k'ulul twitz, che chi.

3Tej tb'inte rey Herodes jlu, b'i'x naj tnab'l kyuk'ix kykyaqil xjal aj Jerusalén.

4Oktzun tchmo'n Herodes kykyaqil nejenel kye pal kyuk'ix qe xnaq'tzal ti'j ley kye tnam xjal, xi tqanin kye jatum tu'n titz'j ju Crist aju at toklen tu'n Dios.

5Xitzun kyma'n te:

—Tuj tnam Belén tu'n titz'j, tuj tx'otx' Judea; porke iktzun tten tz'ib'an tu'n t-sanjel Dios. Chi t-sanjel Dios:

6Aya tnam Belén tuj tx'otx' Judá, mya mas ch'in toklena kyxol txqantl tnam tuj Judá; ex atzun ktzajel jun nejenel tuja, te kwentil kye xjal aj Israel, aqeju etzan wu'ne.

7E tzajtzun ttxko'n Herodes qe xjal aj nab'l tuj ewaj, cheb'a xi t-xjelin kye jte'xi q'ij ttzajlen tyek'un tib' che'w.

8Xitzun t-sama'n Herodes qe xjal aj nab'l tuj tnam Belén, ex xi tma'n kye:

—Kyxi'ye tuj Belén, cheb'a kyb'ime ti'j tal ne'; oktzun tknet kyu'ne, kytzaje q'malte weye tu'ntzun ikx weye tu'n nxi'ye k'ulul twitz, chi Herodes.

9Tejtzun kyb'inte qe xjal aj nab'l tyol rey e je'xtzun. Ex lu ju che'w nejni kywitz, aju otoq kyil tuj tjawitz q'ij. Tejtzun tkanun che'w jatum ta' tal ne', axtzun kub' ten.

10Tejtzun kylonte qe xjal aj nab'l ju che'w, nimxix e jaw tzalaj.

11E okxtzun tuja ex o kyil ju tal ne' tuk'ix Mariy aju ttxu'; e kub' ẍmeje' ex e k'ulun twitz ne'. Jatztzun kyi'n kyq'inumab'l, xi kyq'o'n oyaj te, ex atzun jlu: Q'an pwaq, tuk'ix storak, tuk'ix tq'olil tze' mirra tb'i.

12Ex tzaj q'ma'n kye xjal aj nab'l tu'n Dios tuj witzik' tu'n mi'n kyaj meltz'aj tuk'il Herodes; e ajtzun tuj kytanmi knet juntl kyb'e.

Tej kyel oq José, e pon tuj tx'otx' Egipto

13Kyajlenxitzun qe xjal aj nab'l, kub' tyek'un tib' jun t-anjel Qman twitz José tuj witzik'. Chi anjel:

—We'ktza ex q'inxa tal ne' tuk'ix ttxu', ex t-xi oqa tuj tx'otx' Egipto, axtzun tkyaj tena, maxitzun k'ajetza ok t-xi nma'ne teya; porke ktzajel Herodes jyolte ne' tu'n tkub' tb'yo'n.

14Tej tel twatl José, xi ti'n tal ne' tuk'ix ttxu' te qonik'an ex xi' tuj Egipto.

15Axtzun kyaj ten tuj Egipto; maxitzun ajtz tej tkyim Herodes, tu'ntzun tjapun ju yol q'ma'maj tu'n Qman tzaj tma'n tu'n t-sanjel: Tuj Egipto etz ntxko'ne Nk'wa'le, chi t-sanjel Dios.

Xi tq'o'n Herodes orden tu'n kykub' b'yo'n qe ne'

16Tejtzun tel tnik' Herodes ti'j otoq kub' sb'u'n kyu'n xjal aj nab'l, tzaj nimxix tq'oj; ex etz jun orden tu'n, tu'n kyb'yet kykyaqil tal q'a na'nx tjapun kab'e ab'q'i kyu'n ate' tuj Belén ex kyuj aldey ti'jele Belén; el tnik' ti'j tq'ijlalil tu'nju yol tzaj q'ma'n te kyu'n aj nab'l.

17Japuntzun aju yol tz'ib'an tu'n Jeremías aju t-sanjel Dios. Chi Jeremías:

18O b'injtz tq'ajq'ajel kywi xjal tuj Ramá in che wuyin, in che oq' ex in che ayin; in oq' Raquel kyi'j qe tal, ex minti' o tajb'e tu'n tq'uqb'anjtz tk'u'j, tu'nju otoq che naj qe tal, chi Jeremías.

19Ex tkyimlenxitzun Herodes, kub' tyek'un tib' jun t-anjel Qman twitz José tuj witzik' tuj tx'otx' Egipto ex tma anjel:

20—We'ktza, q'inxa tal ne' tuk'ix ttxu', ex txi'ya tuj kytx'otx' aj Israel, porke o che kyim qeju ok tilil kyu'n tu'n tkub' kyb'yo'n tal ne'.

21Jawtzun we' José, xi ti'n tal ne' tuk'ix ttxu', ex ul tuj kytx'otx' aj Israel.

22Ex tej tb'inte José ate Arquelao in kawin tuj tx'otx' Judea te t-xel Herodes aju qtzan tman, tzaj t-xob'il José tu'n t-xi' tuj Judea; ex tzaj tma'n Dios te tuj witzik' tu'n t-xi' tuj tx'otx' Galilea.

23Ultzun ex najan tuj tnam Nazaret, tu'ntzun tjapun aju yol q'ma'maj kyu'n t-sanjel Dios qa ate Jesús attoq tokel q'o'n tb'i aj Nazaret.