1 Samuel 6 - Mam Huehuetenango New Ortography

Aj kyq'o'n qe aj Filisteo aju kax k'ub'l tley Dios

1Tb'ajlenxi wuq xjaw tponlen kax k'ub'l tley Dios tuj kytx'otx' aj Filisteo,

2e tzajtzun kytxko'n aj Filisteo qe kypal ex qeju b'a'n che q'ijin, ex xi kyqanin kye:

—¿Ti k'okel ti'j kax k'ub'l tley Dios qu'ne? Kyq'mantze qeye alkye tumel tu'n taj qq'o'ne aju kax k'ub'l tley Dios tuj tlugar, che chi.

3Atzun kye xi kytzaq'we'n:

—Qa ma tz'aj kyq'o'ne kax k'ub'l tley Kydios aj Israel, mi'n tz'aj kyq'o'ne junx te, noq o'kx kyq'onxe ch'in oyaj te Dios te chojb'il kyile ex oktzun che b'anixele, ex atzun k'elel kynik'e ti'j tiqu'n na'nx tel q'i'n kycastiwoye, che chi pal.

4—¿Titzun b'a'n tu'n t-xi qq'o'ne tu'n tchjet qile? Che chi aj Filisteo xi kyqanin.

Atzun kye pal xi kytzaq'we'n:

—Jwe' tilb'ilal kyaqk'u q'an pwaq kytx'otx'il, jun te junjun nejenel kye aj Filisteo, tuk'ix jwe' tilb'ilal ich', ax q'an pwaq kytx'otx'il, tu'nju aylex yab'il in che k'ixb'isanjtze tu'n, ax ikx qe nejenel kyeye.

5Kyja'tzun kyb'inchame qe tilb'ilal kyaqk'u ex qe tilb'ilal ich', ex kyu'ntzun qe jlu ma naj kyawale. Ex kynimsan jawe tb'i Kydios aj Israel; b'alo mlay tzaj tq'o'ntl castiw kyib'aje ex kyib'aj qe kydiose, ex tib'aj kytx'otx'e.

6¿Tiqu'n ma kub' kykyuwsa'n kyanmiye ik tza'n kyb'incha aj Egipto ex Faraón? Ex tej kyk'ixb'isanjtz kyuwxix wen tu'n Kydios aj Israel, maxitzun e etz tzoqpi'n aj Israel kyu'n.

7Atzun ja'lo kyb'inchan b'aje jun carret ak'aj; ex kyi'ntze kab'e vac kukx tch'u'n kyal, aqeju vac na'nx tjax ten yuw ti'j kyqul, ex che kyq'on oke te jawol carret, ex mi'n che'x kytzoqpi'ne qe kyal tu'n kyxi lpe' kyi'j, noq o'kx che kylamo'n kyaje tuj pe'n.

8Ex kyi'ntze kax k'ub'l tley Kydios aj Israel, kyq'on jaxe tuj carret, ex atzun qeju q'an pwaq aju kxel kyq'o'ne te chojb'il kyile, kyq'on ku'xe tuj jun cajón, ex kyq'on kub'e ttxlaj kax, ex e kyxi b'et qe vac kyjunal kye tuk'ix carret jawo'n kyu'n.

9Ex lpex kywitze ti'j; qa a ma txi' carret tumlal tnam Bet-semes jatum tzajni kax, atzun k'elel qnik' ti'j qa tu'n Dios ma tzaj tq'o'n mya b'a'n lu qib'aj; ex qatzun mi'n, atzun k'elel qnik' ti'j qa mya tu'n Dios ma kub' tq'o'n qcastiw, noq o'kx minab'en ma tzaj jlu qib'aj, che chi pal.

10B'anttzun kyu'n qeju xinaq ikju. Tzaj kyi'n kab'e vac kukxtoq kych'u'n kyal, e ok kyk'alo'n te jawolte carret, ex e kyaj kylamo'n qe kyal tuj pe'n;

11jaxtzun kyq'o'n kax k'ub'l tley Dios tuj carret, tuk'ix ju cajon jatum kyku'x qe tilb'ilal ich' q'an pwaq kytx'otx'il ex qe tilb'ilal kyaqk'u.

12Te tib'ajxitzun jlu e ik'tzun b'et qe vac, ex atzun e je'x tuj b'e in xi' tu'n tpon tuj tnam Bet-semes, in che muyin ex jiqun e je'x, minti' xi kyi'n juntl b'e. E ok lpe' qe nejenel kye aj Filisteo kyi'j tejxi kypon tuj tmojonil Bet-semes.

13Atzun kye aj Bet-semes in jawtoq triw kyu'n tuj chq'ajlaj, ex tej t-xi kyke'yin, o kyil aju kax k'ub'l tley Dios, ex e jaw tzalaj nimxix.

14Tejtzun tpon carret tuj tkojb'il Josué aju aj Bet-semes, axtzun o we', ex tuj lugar lu attoq jun nintz ab'j. Atzun kye aj Bet-semes b'aj kytx'emin carret te si', ex kub' kyb'yo'n qe vac, ex e kub' kypatun te jun chojb'il te Qman.

15Atzun kye aj Leví ku'tz kyi'n kax k'ub'l tley Dios, ex aju cajón jatum kyku'x qe ti'xti q'an pwaq kytx'otx'il, ex e jax kyq'o'n twi' ju nintz ab'j. Atzun kye aj Bet-semes kub' kypatun qe alumaj te jun chojb'il, ex xi kyq'o'n txqantl oyaj te Qman tuj q'ij lu.

16Tejtzun kyb'aj ke'yin qe jwe' nejenel kye aj Filisteo ti'j jlu, e ajtzun meltz'aj tu'n kypon tuj tnam Ecrón ax q'ij lu.

17Aqeju jwe' tilb'ilal kyaqk'u q'an pwaq kytx'otx'il xi kyq'o'n aj Filisteo te Kydios aj Israel te chojb'il kyil: Jun ti'j tnam Asdod, juntl ti'j tnam Gaza, juntl ti'j tnam Ascalón, juntl ti'j tnam Gat, ex juntl ti'j tnam Ecrón.

18Aju kyajlal qe tilb'ilal ich' q'an pwaq kytx'otx'il junx ta' ik tza'n kyajlal kytanmi aj Filisteo jatum in che kawin qe jwe' nejenel, tza'nx qe tnam tok muro kyi'j ax ikx qe aldey minti' muro tok kyi'j. Aju nintz ab'j jatum jax q'o'n kax k'ub'l tley Dios ax ta' ja'lo tuj tkojb'il Josué, aju aj Bet-semes.

19Ex e kyim junjun aj Bet-semes tu'n Qman tu'nju tku'xlen kyke'yin tuj kax k'ub'l tley Dios. 70 xinaq e kyim, atzun qe txqantl xjal e ok ten oq'el tu'n tlaj otoq che kyim nim xjal kyxol tu'n Qman.

20Ex kymatzun qe aj Bet-semes: ¿Alkye jun jaku b'ant twe' twitz Qman aju Dios xjan? Ex ¿jatum b'a'n tpon tu'n mi'n ttentl qxol?

21Xitzun kysama'n qe sanjel kyuk'il qe xjal tuj tnam Quiriat-jearim tu'n t-xi kyma'n kyja': Ma tz'ajtz q'o'n kax k'ub'l tley Dios kyu'n aj Filisteo; kyja'tzun kytzaje tu'n t-xi kyi'ne.