1Nman Dios, mi'n kyaj tena minti' in q'ajta. Mi'n noq kub' txuleya ex minti' in yolina.
2Ke'yintza qe aj q'oj ti'ja ex qeju in che ik'un teya; in che jaw tilj ex in jaw kyi'n kyib' ti'ja.
3Tu'nju jawni kywitz, ma b'ant ti'j kyu'n tu'n kyb'inchante mya b'a'n kyi'j qe xjal etzan tu'na ex kyi'j qeju klo'maj tu'na.
4O kub' kyximan tu'n kytzaj xitul qeye, tu'n mi'n qtentle ik tza'n jun nasyon, ex tu'n mi'n ttzaj na'ntl qb'iye, aqo'ye aj Israel.
5O b'ant ti'j jun kyyol mya b'a'n ti'ja, o jaw kyi'n kyib' ti'ja mojl kyyol kykyaqil.
6Atzun qe jlu: Qe aj Edom, qe aj Ismael kyuk'ix qe tiyjil Agar ex qe tiyjil Moab,
7qe aj Geba, qe aj Amón ex qe aj Amalec, kyuk'ix qe aj Filisteo, ex qe xjal najl tuj tnam Tiro,
8ex kyuk'ixpe qe aj Asiria ma tz'ok kymojb'an kyib' kyuk'il, tu'n kyonin kyuk'il qe kyiyjil tky'ajal Lot.
9B'inchama kyi'j ik tza'nx o tb'inchaya kyi'j aj Madián, ik tza'n o tb'inchaya ti'j Sísara ex ik tza'n o tb'inchaya ti'j Jabín tuj tq'ab' xaq Sisón,
10aqeju e naj tu'na tuj Endor e ok ik tza'n abono te tx'otx'.
11B'inchama kyi'j qe nejenel kye ik tza'nx o tb'inchaya ti'j Oreb ex ti'j Zeeb; b'inchama kyi'j kykyaqil qeju at kyoklen tu'n kykawin kyxol ik tza'nx o tb'inchaya ti'j Zeba ex ti'j Zalmuna,
12aqeju o kyajb'e tu'n kyok te tajwil tb'anil tx'otx' etzan tu'n Dios.
13Nman Dios, q'onka qe ik tza'n tzqij ch'i'x tol t-xi' tu'n kyq'iq', ex ik tza'n t-xaq tze' tzqij in xi iqan tu'n kyq'iq';
14ex ik tza'n in tz'e'y chk'ul tu'n q'aq' ex in che b'aj tz'e'y qe witz tu'n tq'aq'al.
15Ikxtzun yajlan kub'a qe tu'n nintz kyq'iq' ex sek'pun b'aja qe tu'n kyq'iq' jb'al.
16Q'on kub'a kych'ixwi qe jlu, Nman, tu'ntzun tel kynik' ti'j tipumala.
17Kub'xwit kych'ixwi te jumajx; e ttzaj kych'ixwi ex e kykyim.
18E tel kynik' ti'j qa o'kx aya Mamb'aj, ex o'kx aya Dios Ma'xix Toklen tib'aj tkyaqil twitz tx'otx'.
Who We AreWhat We EelieveWhat We Do
2025 by iamachristian.org,Inc All rights reserved.
