Números 8 - Mam Huehuetenango New Ortography

Tza'n tten tu'n kytxaqet qe kandil

1Tzaj yolin Qman tuk'il Moisés ex tma:

2Q'manxa te Aarón kyja': Ok kyok ttxaqo'n qe wuq kandil, b'a'n tu'n t-xi tb'incha'n kyten tu'n t-xi' kyspik'umal kywitzx.

3O tb'incha Aarón ik tza'nx otoq tma Qman te Moisés, ok ttxaqo'n qe kandil tu'n t-xi' kyspik'umal kywitzx.

4Aju tkub'l kandil lu q'an pwaq ttx'otx'il, tx'ino'n tu'n martiy tzajnix qe' max t-xe' ex ponin b'aj max tuj twi'. O tb'incha Moisés ik tza'nx b'inchb'en te otoq tzaj tma'n Qman.

Aju xjansab'l kye aj Leví

5Tzaj yolin Qman tuk'il Moisés ex tma:

6Pa'n ela qe aj Leví kyi'j aj Israel ex saqsa'n b'aja qe.

7Atzun jlu kb'antel tu'na tu'n kysaqset: K'okel tchituna a' te saqsab'l kyi'j, k'elel kyi'n xya'n ti'j tkyaqil kyximlal tu'n jun navaj ex kjawitz kytx'jo'n ti'j kyxb'alun; kyja'tzun tten che saqsetel.

8Ktzajel kyi'n jun tal tor tuk'ix ch'in arin tb'anil xyoq'imaj tuk'il aseyt, te oyaj ti'j twitz awal, ex ktzajel ti'na juntl tal tor te chojb'il il.

9Che tzajel ti'na qe aj Leví tu'n kyul laq'e' twitz ja xb'alun te mojb'ab'l tib'il, ex che okel tchmo'na kykyaqil aj Israel.

10Oktzun kytzaj ti'na aj Leví nwitze, kb'el kyq'o'n aj Israel kyq'ab' tib'aj kywi'.

11Che tzajel tq'o'n Aarón qe aj Leví weye te jun oyaj te kyxel aj Israel, tu'ntzun kyajb'en aj Leví o'kx weye.

12Te tib'ajxi kb'el kyq'o'n aj Leví kyq'ab' tib'aj kywi' qe tal tor; kxe'ltzun q'ot jun tal tor te chojb'il il, atzun juntl kxel q'ot te jun chojb'il patun in kub' nwitze tu'n tnajset kyil aj Leví.

13Che b'eltzun tq'o'na aj Leví twitz Aarón ex kywitz qe tky'ajal, ex che tzajel tq'o'na te jun oyaj weye;

14kyja'tzun tten che elel tpa'na aj Leví kyxol aj Israel tu'ntzun kyok te weye.

15Te tib'ajxi b'a'ntzun tu'n kytzaj tuj ja xb'alun te mojb'ab'l tib'il tu'n kyajb'en weye. Tnejel che b'ajel t-saqsa'na ex che tzajel tq'o'na te weye ik tza'n jun oyaj,

16ex kyxol kykyaqil aj Israel ma che ok aj Leví te weye. Ma che nk'ame qe te kyxel kykyaqil nej kyky'ajal aj Israel.

17Porke weye kykyaqil nej kyky'ajal aj Israel, ax ikx nej kyal alumaj. Tej kykyim qe nej kyky'ajal aj Egipto wu'ne, b'i'xtzun e je'l npa'ne qe nej kyky'ajal aj Israel tu'n kyok te weye.

18Ex te kyxeltzun qe nej kyky'ajal aj Israel, ma che ok qe aj Leví te weye,

19ex e je'x nq'o'ne qe tuj tkwent Aarón ex tuj kykwent qe tky'ajal, tu'ntzun kyajb'en tuj ja xb'alun te mojb'ab'l tib'il te kyxel aj Israel, ex tu'n tchjet kyil aj Israel kyu'n, tu'ntzun mi'n ttzaj jun castiw kyib'aj aj Israel ok kypon laq'e' twitz njaye, chi Qman te Moisés.

20Kyb'inchatzun Moisés, tuk'ix Aarón, kyuk'ix kykyaqil tnam xjal kyi'j aj Leví ik tza'nx otoq tma Qman te Moisés.

21B'ajtzun kysaqsan kyib' aj Leví ex jatz kytx'jo'n ti'j kyxb'alun, e je'xtzun q'o'n tu'n Aarón te jun oyaj te Qman ex xi tq'o'n Aarón chojb'il kyil tu'n kysaqset.

22Tb'ajlenxitzun tkyaqil jlu, e okxtzun aj Leví tu'n kyaq'nan twitz ja xb'alun te mojb'ab'l tib'il, ex a Aarón ex qe tky'ajal e tzaj q'mante kyaq'un. Kyb'inchatzun kyi'j aj Leví ik tza'nx otoq tzaj tma'n Qman te Moisés.

Jte' ab'q'i tu'n kyajb'en aj Leví

23Tzaj yolin Qman tuk'il Moisés ex tma:

24Ktzyetel kyaq'nan aj Leví tuj ja xb'alun te mojb'ab'l tib'il ok tjapun 25 ab'q'i kyu'n,

25ex che elel q'it ti'j kyaq'un okxi kyjapun twi' 50 ab'q'i.

26Te tib'ajxi jlu, o'kx che ajb'el tu'n kyonin kyi'j kyerman twitz ja xb'alun te mojb'ab'l tib'il, tu'n kykwentin kyi'j qe ti'xti, ex mlay che aq'nan ik tza'n nej. Kyja'tzun che temb'il aj Leví tuj kyaq'un tu'na.