Mateo 11 - Mam Huehuetenango New Ortography

Qe xjal e tzaj sama'n tu'n Juan, aju in che b'yan xjal tu'n Lucas 7.18-35

1Tejtzun tb'aj tma'n Jesús xnaq'tzb'il kye kab'laj t-xnaq'tzb'en, ik'tzun tuj lugar lu, xi' q'ol xnaq'tzb'il ex pakb'al kye xjal kyuj txqantl tnam kye aj Galilea.

2Tokx Juan tuj pres ex tej tb'inte aju in tb'incha'n Crist, e tzaj t-sama'n kab'e t-xnaq'tzb'en tuk'il

3tu'n t-xi kyqanin te kyja':

—¿Apeya ju Crist aju at tulel, ex qa qo ayole ti'j juntl? Che chi.

4Xi ttzaq'we'n Jesús:

—Kyxi'ye ex kymanxe te Juan aju ma kyb'iye ex ma kyile.

5Qe moẍ in b'ant kyke'yin, qe kox in b'ant kyb'et, qe xjal at tx'a'k kyi'j minti' q'anb'il ti'j in che b'anix, qe chkyin kywi' in b'ant kyb'in, qe kyimni in che jatz anq'in, ex in pakb'anjtz tqanil jun kolb'il kye meb'a.

6Ex at tzalajb'il teju xjal minti' in jawje' tk'u'j wi'je, chi Jesús kye t-xnaq'tzb'en Juan.

7Tej kyaj meltz'aj qe t-xnaq'tzb'en Juan, ok ten Jesús yolil kye xjal ti'j Juan:

—¿Titzun xi kyla'kje tuj lugar minti' kynajb'il xjal tuj? ¿Ikpe tten xjal o kyile ik tza'n jun ajlaj in yukch tu'n kyq'iq'? Mi'n.

8¿Titzun xi kyla'kje? ¿Tb'anilpe t-xb'alun xjal xi kyla'kje? Mi'n. Porke b'a'n kyu'ne, qe xjal tok kyxb'alun tb'anilxix, atzun ate' tuj kyja rey.

9Pero ¿titzun xi kyla'kje? ¿Jun t-sanjel Diospe xi kyla'kje? Kxel nma'ne kyeye, ax tok jun t-sanjel Dios xi kyla'kje, ex mas ma' t-xilen twitz jun t-sanjel Dios.

10Tu'nju at jun yol tz'ib'an tuj Tu'jil in yolin ti'j Juan, chi kyja':

Lu kxel nsama'ne nsanjele tu'n tkub' nej twitza b'inchalte tb'eya, chi tuj Tu'jil.

11Ax tok kxel nma'ne kyeye: Kyxol kykyaqil xjal minti' jun mas ma' toklen ik tza'n te Juan aju in che b'yan xjal tu'n; ex aju mas tal ch'in tuj kawb'il in tzaj tuj kya'j, mas ma' toklen twitz Juan.

12Atxix tuj tq'ijlalil tej tten Juan aju in che b'yan xjal tu'n, in kyipuman kyib' xjal tu'n kyokx tuj tkawb'il Dios, ex kukx tb'aj ja'lo, ex qeju in kyipuman kyib' in che okx naj tuj.

13Ex kykyaqil qe t-sanjel Dios tuk'ix tley Moisés, o'kxtzun web'a kyyol tej tul Juan.

14Qa kyajb'ile tu'n t-xi kyoksla'ne, ate Juan Elías aju o q'manjtz ti'j qa attoq tulel.

15Alkye at t-ẍkyin, b'inx ju yol lu.

16At jun techal kxel nma'ne tza'n tten kymod xjal ate' tuj tq'ijlalil ja'lo. Ik kyten xjal ik tza'n qe k'wa'l q'uql qe tuj plas in che schan ex in che sch'in in kyma'n kye kyuk'il:

17Nno'k qq'ajtza'ne xux kywitze, ex minti' ma che b'ixane; in qo b'itzane jun b'itz b'isb'ajil kywitze, ex minti' ma che ok tene oq'el, che chi k'wa'l.

18Ex ul Juan minti' o wa'n ex minti' o k'an ti'j nintz wa'n nno'k kyu'ne, ex in kyma'ne: At ju'ẍ tuj tanmi.

19Atzun weye ma chin ule, aqine sk'o'maj qine tu'n Dios tu'n ntene kyuk'il xjal, in chin wa'ne ex in chin k'ane, ex in kyma'ne: Lu jun xjal kye wa'n ex kye k'an vin, mer tamiw tib' kyuk'il qe peyil pwaq ex kyuk'il qe aj il, che chiye. Ex k'elel qnik' ti'j jun xjal qa at tnab'l, tu'n tb'inchb'en.

Qe tnam minti' xi kyniman tyol Jesús Lucas 10.13-15

20Oktzun ten Jesús qawil kyi'j tnam jatum otoq tb'incha nimku b'inchb'en nim kyipumal, porke minti' ajtz ti'j kyanmi ex xi tma'n kye:

21—Ay b'ek'b'il kywitze aj Corazín. Ay b'ek'b'il kywitze aj Betsaida. Porke noqwit tuj tnam Tiro ex tuj tnam Sidón o che b'inchanjtz qe b'inchb'en nim kyipumal ik tza'n ma nb'inchaye kyxole, b'i'xwitlo ajtz ti'j kyanmi ojtxi, owtlo tz'ok kyq'o'n kyxb'alun ch'i'x twitz, ex owtlo che kub' qe' tuj tza'j.

22Kyja'tzun kxel nma'ne kyeye, tuj tq'ijlalil jwisi mas nim kyeye kycastiw kb'el ik tza'n te tnam Tiro ex tnam Sidón.

23Ex aya tnam Capernaum, ¿maj kjapunela tuj kya'j? Mlay, max kb'el ponela tuj kynajb'il kyimni. Ex noqwit tuj tnam Sodoma o che b'inchanjtz qe b'inchb'en nim kyipumal ik tza'n ma nb'inchaye kyxole, atxwitlo tnam ja'lo.

24Kyja'tzun kxel nma'ne kyeye, tuj tq'ijlalil jwisi, mas nim kyeye kycastiw kb'el ik tza'n te tnam Sodoma.

Kytzaje wuk'ile tu'ntzun kyojlane Lucas 10.21-22

25Tuj tq'ijlalil lu ok ten Jesús yolil ex tma:

—Kxel nq'o'ne chjonte teya, Tat, aya Tajaw kya'j ex Tajaw tx'otx', porke ma kub' tewana tkyaqil jlu kywitz aj nab'l ex kywitz qeju nne'lxix kynik' ti'j, ex ma tzaj tyek'una kye tal k'wa'l.

26Ma tb'inchaya ikju Tat, porke b'a'n ela tuj twitza.

27Ax ikx tma Jesús: Tkyaqil ma tzaj q'o'n weye tu'n Nmane; ex mi jun ojtzqilte alkye qine, o'kxte Nmane ojtzqilte, porke aqine Tk'wa'l; ex mi jun ojtzqilte Nmane, o'kx aqine ojtzqilte, porke aqine Tk'wa'l, ex alkye jun xjal waje tu'n t-xi nyek'une Nmane te k'eleltzun tnik' xjal ti'j Nmane.

28Kytzaje wuk'ile kykyaqile aqeye ma che sikte tu'n aq'untl ex ma che sikte tjaq' iqtz, oktzun che ojlale wu'ne.

29Kyiqanxe nyuwiye, ex kyxnaq'tzam kyib'e wi'je, porke mans qine ex mans wanmiye; oktzun knetel jun ojlab'l kyu'ne te kyanmiye.

30Porke aju nyuwiye mya yajkux tiqanjtz, ex sasj wiqatze kxel kyiqane.