Proverbios 11 - Mam Huehuetenango New Ortography

1Ik'un tu'n Qman aju balans mya cabal, ex in tzalaj ti'j ju mark cabalxix.

2Aju xjal in jaw tniman tib' kb'el tch'ixwi; ex kyuk'il qe xjal mans, atzun ta' nab'l.

3Qe xjal in che anq'in tuj tumel in che ẍaqlunjtz tu'n kyb'inchb'en tz'aqlxix; atzun qe xjal sb'ul, tu'nxju kysb'ub'l in che naj.

4Tuj tq'ijlalil jwisi mlay che klet xjal tu'n kyq'inumab'l, atzunte xjal tz'aqlxix ok kletel tu'n mi'n tkyim.

5Aju xjal in b'et tuj tumelxix in xi jiquma'n ti'j tb'e tu'nju tz'aqlxix, atzunte xjal b'inchal mya b'a'n, ax in kub' tz'aq tuj tb'inchb'en mya b'a'n.

6Aju xjal tz'aqlxix in klet tu'nju minti' til, atzun qe xjal b'inchal mya b'a'n in che tzyet tu'nju in pon kyk'u'j ti'j nimku.

7Ok tkyim xjal mya b'a'n, ax ikx knajel aju in ayontoq ti'j, tuk'ix aju tok tk'u'j ti'j.

8Aju xjal tz'aqlxix in klet tuj yajb'il te, ex aju b'inchal mya b'a'n in yajlanjtz te t-xel.

9Aju xjal b'inchal mya b'a'n in che naj qe tuk'il tu'n tyol, atzunju xjal tz'aqlxix in klet tu'n tojtzqib'l.

10Qa b'a'n ta' ju xjal tz'aqlxix kykyaqil xjal tuj tnam in che tzalaj; ex ok kykyim qeju b'inchal mya b'a'n che jawil tzalaj xjal.

11Tu'nju ky'iwb'il in kyk'mo'n qe xjal tz'aqlxix in ch'iy tnam, ex in kub' xitj tu'n kyyol qe b'inchal mya b'a'n.

12Aju xjal minti' tnab'l in yolin mya b'a'n ti'j tuk'il; atzunte xjal at tnab'l minti' in q'ajt.

13Aju xjal ẍtaq'il yol, tkyaqil in b'aj tyolin; atzunte xjal b'a'n t-ximb'etz, minti' in b'aj tyolin aju b'a'n tu'n.

14Qa mya tuj tumel in che kawin qe kawil tuj tnam, kb'el xitj tnam; ex qa at nimku xjal at kynab'l, jaku klet tnam.

15Mya b'a'n nne'la te xjal in kyaj we' ti'j tk'as juntl xjal minti' ojtzqi'n tu'n; atzunju xjal minti' in kyaj we' ti'j tk'as juntl, in anq'in tuj txub'txaj.

16Aju xu'j b'a'n tmod in tk'mo'n nimb'il te, aju xinaq at tipun tu'n taq'nan in knet q'inumab'l tu'n.

17Aju xjal b'a'n q'aq'an tk'u'j ti'j juntl in tzaj ti'n b'a'n tib'ajx, atzunju xjal in tzalaj tu'n tyajlanjtz juntl tu'n, tib'ajx in tzaj ti'n mya b'a'n.

18Jurat kb'el naj aju kamb'ab'l in tk'mo'n xjal b'inchal mya b'a'n; atzunte xjal in tb'incha'n aju tz'aqlxix ok tkamb'a' twi tk'u'j mlay b'aj.

19Aju xjal in tb'incha'n aju tz'aqlxix, tzul q'o'n tchwinqlal, atzunte xjal in tb'incha'n mya b'a'n, kpol tuj kamik.

20Ik'un tu'n Qman qe xjal in che ximan ti'j tu'n kyb'inchante mya b'a'n, ex in tzalaj kyi'j qeju minti' kypaltil.

21Axix tok mlayx tzik'x ti'j tu'n mi'n tkub' tcastiw aju xjal b'inchal mya b'a'n, atzun qe xjal tz'aqlxix che kletel.

22Aju xu'j mejor ke'yin ex minti' tnab'l, junx ta' ik tza'n jun xmulq'ab'aj q'an pwaq ttx'otx'il tkub' twi ttxa'n jun b'och.

23Aju kyajb'il xjal tz'aqlxix, tkyaqil maj b'a'n nne'la; atzunju kychkinib'il qeju b'inchal mya b'a'n noq q'oj in tzaj tu'n.

24At xjal b'a'n q'on oyaj ex in tk'mo'n mas twitzju in xi tq'o'n, ex aju xjal xk'a kukx ktel tuj meb'ayil.

25Aju xjal b'a'n q'on oyaj, noq kyja' t-xi' jawni; ex aju in onin ti'j tuk'il, ikx te ok ktzajel onin.

26Aju xjal in kub' t-xk'ayin triw, in tzaj kyqanin xjal mya b'a'n tib'aj; atzunte xjal in xi tk'ayin triw kye, in tzaj kyqanin xjal ky'iwb'il tib'aj.

27Aju xjal nno'k tilil tu'n tu'n tb'inchante b'a'n, in knet xtalb'il tu'n; atzunte xjal in jyon ti'j mya b'a'n, ax mya b'a'n tzul tib'aj.

28Aju xjal nno'k qe' tk'u'j ti'j tq'inumab'l, kb'el tz'aq ik tza'n t-xaq tze' tzqij, ex atzun qe xjal tz'aqlxix, che okel ik tza'n tq'ab' tze' cha'x.

29Aju xjal minti' in che ok tkwentin qeju ate' tuj tja, minti' ch'intl kyjel ten te; aju xjal minti' tnab'l, kukx ktel te tmajen ju xjal at tnab'l.

30Aju xjal tz'aqlxix ik tten ik tza'n jun tze' in tq'o'n chwinqlal, atzunte xjal at tnab'l, in kub' ti'j kynab'l xjal tu'n, tu'n kyb'et tuj b'e b'a'n.

31Qa ma kub' tcastiw ju xjal tz'aqlxix tzalu twitz tx'otx', pyortzunlo te xjal b'inchal mya b'a'n ex aj il, kb'el tcastiw tu'nju otoq tb'incha mya b'a'n.