Ezequiel 32 - Mam Huehuetenango New Ortography

Ik tten Faraón ik tza'n jun nintz txkup najl tuj mar

1Tuj tnejel q'ij te tkab'lajin xjaw ex te tkab'lajin ab'q'i, tzaj yolin Qman wuk'ile ex tma kyja':

2Aya xjal, b'itzanxa ju b'itz lu te b'is ti'j Faraón aju rey te Egipto:

Ik ttena ik tza'n jun b'alun kyxol qe nasyon; ik ttena ik tza'n jun nintz txkup najl tuj mar: In xpurin a' tu'n tqana tuj nima, ex tu'n tqana in b'aj ttz'ilsa'na a' ex in yukch tu'na.

3Atzun jlu in tma'n Qman: Kxel nxo'ne nxuyb'e tib'aja, atzun nim kyajlal tnam ex kyu'ntzun ktzyetela wu'ne.

4Ok kjawitz wi'ne tu'n tjawila twitz tx'otx' ex kyjel pale'ya wu'ne twitz tx'otx'. Che tzajel wi'ne kykyaqil txkaj jil in che lipan twitz kya'j tu'n kykub' we' tib'aja, ex kxel chyo'n tchib'jala kyu'n kykyaqil txkup te tjaq' k'ul.

5Kb'el nq'o'ne tchib'jala q'ayni kywi' qe witz ex kywitz qe chq'ajlaj kyxol witz.

6Kb'ajel ak'ix twitz tx'otx' tu'n tchk'ela wu'ne ex kpol ak'ix max kywi' qe witz, ex che nojel qe tq'ab' xaq tu'n.

7Ok tnaja wu'ne, kmaqsetel twitz kya'j ex k'okel yupj kywitz qe che'w; k'okel nq'o'ne muj twitz q'ij ex mlay tzaj tq'o'n xjaw t-spik'umal.

8Tu'n tlaja che b'elex nyupune kykyaqil qe spik'un in che qoptz'aj twitz kya'j, ex knojel tuj ttanmiya wu'ne tu'n qlolj. Aqine Dios in chin q'mante jlu.

9Ktzajel kyb'is nimku tnam ok kyxi wi'ne qe t-xjalila kyuj qe nasyon minti' ojtzqi'n tu'na.

10Ktzajel kyxob'il nimku tnam ti'ja; b'i'x knajel kynab'l qe kyrey ok kylonte ok t-xi njato'ne nspadiye ti'ja. Ok tkub' xitja che tzajel lu'lun tu'n kyxob'il, ti'j kychwinqlal.

11Chi Qman kyja': Aju t-spad rey te Babilonia kpol kanun ti'ja ex knajela tu'n.

12Qe t-xjalila nimxix kyb'aj che najel wu'ne tu'n kyspad qe q'ojlel nim kyipun ex tx'u'j qe. Mi'n jaw kynimantl kyib' aj Egipto, ex che b'el b'yo'n kykyaqil qe t-xjalila nimxix kyb'aj.

13Che najel kykyaqil alumaj wu'ne, aqeju in che wa'n ttzi nima, ex mlay b'aj ẍwo'jix twitz a' tu'n kyqan xjal ex mi tu'n kyqan alumaj.

14Ksaqixtel twitz a' wu'ne ex che b'etel qe nima wu'ne ik tza'n aseyt minti' in jululun. Aqine Dios in chin q'mante jlu.

15Ok tb'aj xitj tnam Egipto wu'ne ok tex q'i'n tkyaqilju at tuj ex ok kykub' b'yo'n kykyaqil xjal najl tuj, k'eleltzun kynik' ti'j, aqine Dios.

16Atzunju b'itz lu te b'is kxel kyb'itzan qe xu'j te txqantl nasyon ok kyjaw oq' ti'j tnam Egipto ex kyi'j qe xjal nimxix kyb'aj najlqe tuj. Aqine Dios in chin q'mante jlu.

Che pol aj Egipto tuj kynajb'il kyimni

17Tuj t-olajin q'ij te xjaw te tkab'lajin ab'q'i, tzaj yolin Qman wuk'ile ex tma kyja':

18Aya xjal, b'itzanxa jun b'itz te b'is kyi'j qe xjal nimxix kyb'aj ate' tuj Egipto.

Xo'n ku'xa qe tuj kynajb'il kyimni junx kyuk'il qe txqantl nasyon nim kyipun ex mojl kyyol tuk'il, junx kyuk'il qeju in che ku'pun tuj kynajb'il kyimni.

19¿Maspetzun mejorxix ke'yina kywitz qe txqantl nasyon? Tku'xa tuj kynajb'il kyimni ex koẍekuya junx kyuk'il qeju mya nimal Dios qe.

20Che b'el b'yo'n aj Egipto junx kyuk'il qeju o che kyim tuj q'oj. B'anin tten spad kyi'j. Kyi'nxe qe kyuk'ix qe kyxjalil nim kyb'aj.

21Qe nejenel nimxix kyipun, aqeju otoq che ku'pun tuj kynajb'il kyimni kyuk'ix qeju mojl kyyol kyuk'il, ktzajel kyma'n kyja': Ma che ku'tz ex ma che kub' koẍe' kyxol qeju mya nimal Dios qe, aqeju e kyim tu'n spad tuj q'oj.

22Atzun ta' nasyon Asiria kyuk'ix qe t-soldad nim kyb'aj ex txolin ti'j tmuqb'il tu'n kymuqb'il. Kykyaqil qe jlu tuj q'oj e kyim.

23Maqu'n qe max t-xe'pun kynajb'il kyimni. Tej itz'xtoq qe soldad lu tzaj nim kyxob'il xjal kyu'n, ex e kyim tuj q'oj ex atzun ja'lo txolin ti'j tmuqb'il Asiria kyu'n.

24Atzun ta' nasyon Elam kyuk'ix kykyaqil qe t-soldad txolin ti'j tmuqb'il kyu'n. Kykyaqil qe jlu tuj q'oj e kyim, mya nimal Dios qe ex ma che'x tuj kynajb'il kyimni. Tej itz'xtoq qe tzaj kyxob'il xjal kyu'n, atzun ja'lo minti' nimb'il kye kyxol qeju o che ku'pun tuj kynajb'il kyimni.

25Palch tnam Elam kyxol kykyaqil qe t-soldad kyimni qe, kykyaqil qe jlu tuj q'oj e kyim ex mya nimal Dios qe, ja'lo txolin kyten ti'j tmuqb'il Elam. Tej itz'xtoq qe tzaj nim kyxob'il xjal kyu'n, atzun ja'lo minti' nimb'il kye kyxol qeju o che ku'pun tuj kynajb'il kyimni. Ma che ku'pun kyxol qe xjal b'yo'n e kub'.

26Atzun ta' nasyon Mesec tuk'ix Tubal, kyuk'ix kykyaqil qe kysoldad txolin ti'j kymuqb'il tu'n, kykyaqil qe jlu mya nimal Dios qe ex tuj q'oj e kyim; tej itz'xtoq qe tzaj nim kyxob'il xjal kyu'n.

27Mya junx maqu'n qe kyuk'il qe kyimni ma' kyoklen e ten twitz tx'otx' ojtxi, aqeju q'i'nx kymakb'il in ajb'en tuj q'oj tej kyku'x tuj kynajb'il kyimni, tokx kyspad tjaq' kywi' ex kub' kycastiw tu'n tlaj kyil, tu'nju nim kyxob'il xjal tzaj kyu'n tej itz'xtoq qe.

28Ikx teya Faraón kb'ajel b'uchja kyxol qe xjal mya nimal Dios qe, ex kb'elex pale'ya kyuk'il qeju o che kyim tuj q'oj.

29Atzun ta' Edom kyuk'ix qe t-rey ex kykyaqil qe tkawb'il. Maske ten nimxix kyipumal, pero atzun ate' kyxol qe xjal o che kyim tuj q'oj, maqu'n qe kyxol qe xjal mya nimal Dios qe, kyxol qeju o che ku'pun tuj kynajb'il kyimni.

30Atzun ate' kykyaqil qe nejenel kye qe tnam ate' tuj tx'otx' tuj tb'anq'ab' q'ij kyuk'ix kykyaqil aj Sidón. E ok nimxix kyipumal ex tzaj nim kyxob'il xjal kyu'n tej itz'xtoq qe, atzun ja'lo o che ku'pun kyxol qe kyimni o che kyim tuj q'oj, ex ma tz'el kych'ixwi. Mya nimal Dios qe, maqu'n qe ex minti' nimb'il kye kyxol qeju o che ku'pun tuj kynajb'il kyimni.

31Oktzun tke'yinte Faraón qe jlu, kqeb'el tk'u'j ti'j kykyimlen kykyaqil qe t-xjalil, porke ikx te ex kyuk'ix kykyaqil qe t-soldad e kyim tuj q'oj. Aqine Dios in chin q'mante jlu.

32Tej itz'xtoq Faraón xi nq'o'ne amb'il te tu'n ttzaj nim kyxob'il xjal tu'n; kyja'tzun maqu'n kyxol qe xjal mya nimal Dios qe, kyxol qeju e kyim tuj q'oj, ax ikx qe t-soldad nimxix kyb'aj. Aqine Dios in chin q'mante jlu.