1Toktoq Amasías twi' 25 ab'q'i tej ttzyet tkawin ex o kawin 29 ab'q'i tuj Jerusalén. Aju ttxu', Joadán tb'i ex ax aj Jerusalén.
2B'a'n e ela qe tb'inchb'en Amasías tuj twitz Qman, pero minti' o tb'incha tu'n tkyaqil tanmi.
3Tejtzun tokxix tipun Amasías tuj tkawb'il e kub' tb'yo'n qe xjal ma' kyoklen, aqeju e kub' b'yonte qtzan tman.
4Ex minti' e kub' tb'yo'n qe kyk'wa'l, ik tza'nx tz'ib'amaj tuj tley Moisés tej ttzaj tma'n Qman kyja': Qe mamb'aj mlay kub' kysentens tu'n kykyim tu'n tlaj kyb'inchb'en qe kyk'wa'l, ex mi qe k'wa'lb'aj tu'n tlaj kyb'inchb'en kyman, noq o'kx teylex te junjun kymel tu'n tlaj tex til.
5E ok tchmo'n Amasías kykyaqil xinaq aj Judá ex aj Benjamín ex e b'aj tpa'n ik tza'nx junjun k'loj kyiyjil, ex e ok tq'o'n qe nejenel te jun milchaq soldad ex te jun syentchaq soldad. Jawtzun ti'n jun tajlal, tzaj qe' kyi'j kykyaqil qeju otoq che japun twi' winqin ab'q'i. Tu'n tkyaqil japun ox syent mil soldad sk'o'maj qe, b'anin kyten tu'n kyxi' tuj q'oj ex at kynab'l tu'n kyajb'en qe lans ex qe maqb'il kyu'n.
6Ax ikx e tzaj ti'n jun syent mil soldad aj Israel tu'n 75 quintal saq pwaq.
7Ex ul jun t-sanjel Dios tuk'il Amasías ex xi tma'n te kyja':
—Tat rey, mi'n che'x ti'na qe soldad aj Israel tuk'ila, ex mi a'l Qman at kyuk'il aj Israel ex mi kyuk'il aj Efraín.
8Ex qa ma txi'ya ik tza'n jlu kyuk'ix qe soldad aj Israel tuk'ila, maske ma tz'ok tlajwersin tib'a tu'n tq'ojina, pero tu'n Dios kb'el ti'ja kyu'n aj q'oj, porke ate Dios at tipumal tu'n tkamb'an jun xjal ex qa tu'n tkub' ti'j, chi t-sanjel Dios.
9Xitzun tqanin Amasías te t-sanjel Dios:
—¿Titzun kb'antel ti'j 75 quintal saq pwaq ma txi nq'o'ne kye soldad aj Israel?
Xi ttzaq'we'n t-sanjel Dios:
—Jaku tzaj tq'o'n Qman mas nim teya twitz jlu.
10E eltzun tpa'n Amasías qe soldad, aqeju otoq che tzaj kyxol aj Efraín ex otoq che ul tuk'il, ex xi tma'n kye tu'n kyaj kyja. Atzun kye soldad lu tzaj kyq'oj kyi'j aj Judá, e ajtzun kyja in che q'ojl wen.
11Oktzun tipuman tib' Amasías ex e je'x ti'n qe t-soldad max tuj chq'ajlaj Atz'an tb'i, ex kub' tb'yo'n laj mil xinaq aj Seir.
12Ax ikx tzaj kytzyu'n aj Judá juntl laj mil xinaq itz'xqe, ex xi kyi'n twi' jun pik, atzun e ex kyxo'n ttxa'n xaq ex kykyaqil qe jlu paẍu'n e oka.
13Atzun qe soldad aj Israel, aqeju otoq che el tpa'n Amasías tu'n mi'n kyxi' tuk'il tuj q'oj ex otoq txi tma'n kye tu'n kyaj kyja, e ok tzoqpaj kyi'j qe tnam ate' tuj Judá, tzajx qe' kyu'n tuj tnam Samaria ex e pon max tuj tnam Bet-horón, kub' kyb'yo'n ox mil xjal ex xi kyi'n nimku ti'xti at kye xjal.
14Tejtzun tajtz meltz'aj Amasías, otoqxi txi aj b'yolte kye aj Edom, e tzaj ti'n qe tilb'ilal kydios aj Seir, ok tq'o'n te tdios, ok ten k'ulul kye ex kub' tpatun storak kywitz.
15Tzajtzun tq'oj Qman ti'j Amasías ex tzaj t-sama'n jun t-sanjel tuk'il q'malte te kyja':
—¿Tiqu'n ma tz'ok tena qanil onb'il kye qe dios te juntl nasyon, aqeju minti' ma che klet xjal kyu'n tuj tq'ab'a?
16Ex tej t-xi tma'n t-sanjel Dios ikju, tzaj ttzaq'we'n rey:
—¿Mapetzun tz'ok qq'o'ne toklena te q'olte consej weye? Mi'n q'ajta, ¿ex qatzun taja tu'n tkub' b'yo'na?
Atzunte t-sanjel Dios minti' xi tma'n txqantl yol, noq o'kx tma kyja':
—B'a'n wu'ne ma kub' t-ximan Dios tu'n tnaja tu'n, tu'n tlaj ma tb'inchaya jlu ex tu'nju minti' ma txi tnimana nyole.
17Te tib'ajxi ok ten Amasías aju rey kye aj Judá qanil tconsej kye qeju q'ol consej ate' ttxlaj, ex b'ant ti'j kyu'n tu'n t-xi kysama'n qe xjal tuk'il Joás aju tky'ajal Joacaz ex tal tchman Jehú, aju rey kye aj Israel, tu'n t-xi kyma'n te kyja': Tzaja, chitzun rey Amasías, ex e tok q'oj qu'n.
18Atzunte Joás tzaj ttzaq'we'n kyja': Aju tal ch'i'x k'ul at twi witz Líbano xi tma'n teju tze' wi'ten aju at twi witz Líbano: Q'ontza tme'jela tu'n tok te t-xu'jil nky'ajale, chi ch'i'x k'ul. Ex ik' b'et jun txkup te tjaq' k'ul tib'aj tal ch'i'x k'ul ex b'i'x b'aj naj tjaq' tqan.
19In tma'na qa o kub' kyi'j aj Edom tu'na ex tu'ntzun jlu in jaw tniman tib'a. Mas b'a'n ax tenkja tjaya. ¿Tiqu'n taja tu'n ttzaj ti'na mya b'a'n tib'aja ex kyib'aj aj Judá? Chi Joás.
20Atzunte Amasías minti' xi tb'i'n porke tu'n Dios b'ant ikju, tu'ntzun tkub' kyi'j tu'n Joás, tu'nju otoq che ok ten qanil onb'il kye qe kydios aj Edom.
21Tzajtzun Joás tu'n tok tzoqpaj q'ojlel ti'j Amasías, ex tzyet q'oj kyu'n tuj tnam Bet-semes aju tkub'sa'n tuj kytx'otx' aj Judá.
22Ex aqe aj Judá kub' kyi'j kyu'n aj Israel ex teyle junjun xi oq tja.
23Ate Amasías aju rey kye aj Judá okx presin tuj Bet-semes tu'n Joás aju rey kye aj Israel, ex te tib'ajxi xi ti'n tuj Jerusalén ex b'aj t-xitun Joás jun piẍ muro tok ti'jele tnam Jerusalén te kab' syent var tqan, tzajx qe' jatum ta' Tlamel tnam Efraín tb'i ex pon b'aj max jatum ta' Tlamel tnam Eskyin tb'i.
24Ax ikx xi ti'n tkyaqil q'an pwaq tuk'ix saq pwaq, kyuk'ix kykyaqil qe makb'il ate' tuj tja Dios, aqeju ate'toq tuj tkwent Obed-edom, kyuk'ix qe q'inumab'l ate' tuj tja rey. Ax ikx e tzyet junjun xjal ma' kyoklen tu'n, tu'n kyxi ti'n tuk'il, ex ajtzun meltz'aj tuj tnam Samaria.
25Ate Amasías aju tky'ajal Joás, aju rey kye aj Judá, o anq'intl olaj ab'q'itl tkyimlenxi Joás aju tky'ajal Joacaz aju rey kye aj Israel.
26Aju ch'intl tx'olb'ab'en ti'j Amasías, tej ttzaj qe' tkawin ex tejxi tpon b'aj, atzun tz'ib'an tuj libro jatum tz'ib'an tkyaqil tx'olb'ab'en kyi'j qe rey kye aj Judá ex kye aj Israel.
27Atxix tej tel tpa'n tib' Amasías ti'j Qman, jaw kyi'n kyib' xjal ti'j tuj Jerusalén, ex atzunte xi oq tuj tnam Laquis, ex e je'x lpe' xjal ti'j max tuj tnam lu, ex matzun kub' kyb'yo'n.
28Tzajtzun kyi'n t-ximlal tib'aj jun chej cabay ex ku'x kymaqu'n kyxol qtzan t-xe'chel tuj tnam tok tb'i Ttanmi David.
Who We AreWhat We EelieveWhat We Do
2025 by iamachristian.org,Inc All rights reserved.
