Levítico 6 - Mam Huehuetenango New Ortography

Qe chojb'il ti'j sb'ub'l

1Tzaj yolin Qman tuk'il Moisés ex tma kyja':

2Qa at jun xjal ma b'inchan il nwitze tu'nju otoq kub' t-sb'u'n jun tuk'il ti'j jun ti'xti otoq kyaj oqxenan te, ex qa ma tz'el telq'a'n jun ti'xti te, ex qa otoq tz'el ti'n jun ti'xti lajwers te,

3ex qa ma tz'ok noj ti'j jun ti'xti otoq kyaj tz'aq ex qa ma kub' tewan, ex qa ma txi tma'n tzqan Dios ex noq tten tu'n, ex qa ma b'ant juntl mya b'a'n tu'n, aju in b'ant kyu'n xjal,

4at til ti'j jlu. Kyja'tzun il ti'j tu'n taj tq'o'n aju otoq tz'el telq'a'n, ex qa aju otoq tz'el ti'n lajwers, ex qa aju otoq kyaj oqxenan te, ex qa aju ti'xti otoq tz'ok noj ti'j,

5ex qa aju otoq txi tma'n tzqan Dios ti'j ex noq tten tu'n. Ok t-xi tq'o'n chojb'il til, il ti'j tu'n taj tq'o'n tkyaqil te tajwil, ex mya o'kx jlu; ax ikx kxel tq'o'n tjwe'yin tib'aj twi ti'xti otoq tz'el telq'a'n.

6Aju chojb'il ktzajel tq'o'n weye; kyxol qe t-ẍne'l k'eletz ti'n jun tman ẍne'l minti' tpaltil, ex aya k'okel malonte te jte' twi', ex kxel ti'n tuk'il pal te jun chojb'il ti'j til.

7Kchjeteltzun til xjal tu'n pal nwitze, noq alkyexku il otoq tb'incha, ex knajseteltzun til.

Qe ley kyi'j qe chojb'il patun in che kub'

8Tzaj yolin Qman tuk'il Moisés ex tma:

9Q'manxa te Aarón ex kye tky'ajal aju ley kyi'j qe chojb'il patun in che kub': Aju alumaj kxel q'ot te chojb'il, tuj enter qonik'an il ti'j tu'n tkyaj kyq'o'n tib'aj xq'a'l tkub'sa'n tib'aj altar, okxi tjawil q'ij, ex il ti'j tu'n mi'n tyupj q'aq'.

10Atzunte pal k'okel tq'o'n t-xb'alun tuk'ix tcalsonsiy b'animaj ti'j noq' lino; ex ktzajel ti'n ttza'jil alumaj, aju otoq kub' tz'e'y tib'aj altar, ex kb'el tq'o'n ttxlaj altar.

11Te tib'ajxi k'elel tch'expu'n t-xb'alun ex k'elex ti'n tza'j tuj jun lugar saq ti'jxi campament.

12Mi'nx ku'x yupit q'aq' in k'ant tib'aj altar. Tkyaqil prim kb'el tq'o'n pal si' tib'aj, ex kb'el tq'o'n pal alumaj patun in kub' tib'aj q'aq', ax ikx kb'el tpatun tib'aj altar kysebyil qe chojb'il te mojb'ab'l tib'il wuk'ile.

13Kukx kk'antel q'aq' tib'aj altar. Mi'nx ku'x yupit.

Qe ley kyi'j qe oyaj ti'j twitz awal

14Atzun qe ley lu kyi'j qe oyaj ti'j twitz awal: Aqe pal che tzajel oyinte nwitze, twitz altar.

15Ex atzun jun kye ktzajel ti'n jun yub' arin tuk'ix ch'in aseyt, junx tuk'il tkyaqil storak otoq pon q'i'n te oyaj, ex kb'el tpatun tib'aj altar, te jun oyaj kukx tu'n ttzaj na't xjal ti'j, jun oyaj patun in kub' at tk'ok'jal in chin tzalaje ti'j.

16Ex atzunju kjel ten ti'j oyaj lu kxel twa'n Aarón kyuk'ix qe tky'ajal, ex mi'n txi kyq'o'n t-samel tuj tu'n tjaw mal tk'u'j. Atzun che wa'l ti'j tuj jun lugar xjansamaj, ttxa'n tpe'n ja xb'alun te mojb'ab'l tib'il.

17Mi'n b'aj kytzq'ajsa'n tuk'il t-samel tuj tu'n tjaw mal tk'u'j. O txi nq'o'ne ch'in kye kyi'j oyaj patun in che kub' in tzaj q'o'n weye. Ex a jlu xjanxix ik tza'nx qe chojb'il ti'j il ex ti'j kypaltil xjal.

18Kykyaqil qe xinaq tiyjil Aarón che ul itz'j te tib'ajxi, at kyoklen tu'n kywa'n ti'j oyaj in kub' patit te weye, ex a jlu jun ley kukx ktel te jumajx. Noq alkyexku jun ti'xti ma tz'ok takl kyi'j qe oyaj lu, b'i'x kxjansetel.

Aju kyoyaj pal kxel kyq'o'n

19Tzaj yolin Qman tuk'il Moisés ex tma:

20Atzun qe toyaj Aarón jlu, ex qe kyoyaj tiyjil, aju tu'n ttzaj kyq'o'n weye ok kyxjanset tu'n kyok te pal: Kab'e libr arin mas tb'anil, te oyaj ti'j twitz awal; mij kxel kyq'o'n te prim ex mijtl te qale; aju oyaj lu tkyaqil q'ij kxel kyq'o'n.

21Il ti'j tu'n tb'aj kyb'incha'n oyaj lu tuj jun sartén, otoq b'aj xyoq'it wen tuk'il aseyt, ex ktzajeltzun kyq'o'n paẍu'majtl, te jun oyaj at tk'ok'jal in chin tzalaje ti'j.

22Iktzun ktemb'il tu'nju tnejel pal tiyjil Aarón, aju kxjansetel tu'n tok te t-xel Aarón; a jlu jun ley wu'ne kukx ktel, ex aju oyaj lu b'i'x kb'el patit te jumajx.

23Tkyaqil kyoyaj qe pal ti'j twitz awal b'i'x che b'el patit te jumajx; mi jun b'a'n tu'n t-xi wa'nte te.

Qe ley kyi'j qe chojb'il il

24Tzaj yolin Qman tuk'il Moisés ex tma:

25Q'manxa te Aarón ex kye qe tky'ajal aju ley kyi'j qe chojb'il il: Il ti'j tu'n tkub' kyb'yo'n alumaj kxel q'ot te chojb'il nwitze tujx lugar jatum in che kub' b'yet qe alumaj patun in che kub'; aju chojb'il lu xjanxix te.

26Aju pal kxel q'onte chojb'il il, b'a'n tu'n tchyo'n ti'j, ex il ti'j tu'n t-xi tchyo'n tuj jun lugar xjan ttxa'n tpe'n ja xb'alun te mojb'al tib'il.

27Noq alkyexku jun ti'xti k'okel takl ti'j tchib'jal alumaj lu, b'i'x kxjansetel, ex qa ma tz'ok tx'itj ch'in chik' ti'j jun xb'alun, b'a'n tu'n tjatz tx'jo'n ti'j tuj jun lugar xjan.

28Qa tx'otx' ttx'otx'il k'il jatum kjawix txket ta'l chib'j te oyaj lu, il ti'j b'i'x kb'el pa't k'il; qatzun q'an k'uxb'il ttx'otx'il k'il, o'kxtzun tu'n tb'aj jaqut twitz ex tu'n ttx'jet tu'n a'.

29Aju chojb'il il xjanxix te. O'kx qe pal kyuk'ix qe kyky'ajal b'a'n tu'n kychyo'n ti'j.

30Ex mlay txi kychyo'n jun alumaj in xi q'it tchk'el tuj ja xb'alun te mojb'ab'l tib'il tu'n tnajset il. Aju chojb'il lu, il ti'j tu'n tokx patit tuj q'aq'.