Cantares 5 - Mam Huehuetenango New Ortography

Aju tyol xinaq

1Ma chin okxe tuj tqan wawale, aya wanb'e, aya xu'j in chin yoline tuk'ila tu'n qmoje'. Ma tzaj wi'ne tq'olil tze' mirra ex qe perjum etzan wu'ne, ma txi nnik'b'e'ne aju ta'l kab' at wuk'ile, ex ma txi nk'a'ne ta'l twitz uva ex aju lech at wuk'ile.

Coro

Aqeye wamiwoye at nk'u'je kyi'je, che wa'ne ex che k'ane noq nik'pun kyajb'ile.

Tkyajin b'itzAju tyol xu'j

2In chin tantoqe, ex itz'xtoq wanmiye, ex o nb'iye aju xinaq k'ujla'nxix wu'ne in q'ajt ttzi tlamel ja, chi kyja': Jaqo'nkxa ja aya wanb'e, aya xu'j at nk'ujlalile ti'ja, ik ttena ik tza'n jun tal paloma minti' tpaltil. Aju nwi'ye ma tz'ak' tu'n tq'ab' che'w. Aju tq'ab' che'w in kub' qonik'an ma kub' tib'aj ttzmal nwi'ye, chi xinaq.

3Ma tz'el wi'ne nxb'alune; ¿k'okelpe nq'o'ne juntl maj? Ma che b'aj ntx'jo'ne kyi'j nqane. ¿Okpe che tz'ilixtel juntl maj wu'ne? Nchiye.

4Aju xinaq k'ujla'nxix wu'ne, oktz tq'o'n tq'ab' tuj toy' tlamel ja. Tu'n jlu tzaj putin wanmiye tu'n b'is.

5In jawtzun we'ye jaqol ja twitz ju xinaq k'ujla'nxix wu'ne. Kyi'j qe nq'ab'e ex qe tal nq'ab'e e je'l txutin ta'l mirra ex e kub' tz'aq tib'aj pasador te tlamel ja.

6Tej nb'inteye lu in yolintoq, o nna'ye mer ik tza'n ch'ixtoq nkyime.

Oktztzun njaqo'ne ja twitz ju xinaq k'ujla'nxix wu'ne, ex mi a'ltoq at ttzi ja. In ok tene jyol ti'j ex minti' knet wu'ne, tzaj ntxko'ne ex minti' in tzaj tzaq'we'ne tu'n.

7In knete kyu'n qe xq'uqil in che b'et tuj tnam; in b'aj k'ixb'isa'ne ex nim ẍil ok wi'je kyu'n; qeju in che xq'uqin ttzi tlamel tnam el kyi'n tuk'il tx'u'jb'il aju xb'alun tok te txayb'il nwitze.

8Aqeye xu'j aj Jerusalén, qa ma kyile aju xinaq k'ujla'nxix wu'ne, kytziyantze weye tu'n t-xi kyma'ne te, lu qine ch'ix nkyime tu'nju at-xix nk'ujlalile ti'j.

Coro

9¿Alkyetzun tb'anilxix nno'k tke'yina ti'j ju xinaq k'ujla'nxix tu'na, aya tb'anilxix ke'yin kywitz txqantl xu'j? ¿Alkyetzun tb'anilxix nno'k tke'yina ti'j ju xinaq k'ujla'nxix tu'na, tu'nju in tzaj tma'na tu'n t-xi qma'ne ju yol lu te?

Aju tyol xu'j

10Aju xinaq k'ujla'nxix wu'ne kyaq xjal ex in qoptz'aj twitz, mi a'l juntl in pon ke'yin ik tza'n te kyxol laj mil xinaq.

11Aju twi' mer ik tza'n q'an pwaq tb'anilxix; aju ttzmal twi' coloch, q'eq ke'yin ik tza'n ti'j jun joj.

12Qe tb'aq' twitz ik che ke'yin ik tza'n qe paloma otoq che b'aj chin tuj lech ex kyokxsa'n qe tujxix kylugaril;

13qe tq'o'tx ik che ke'yin ik tza'n tqan awal bálsamo nim tk'ok'jal. Qe ttxo'w ttzi' ik che ke'yin ik tza'n b'ech ex kyuj nne'tz tz'ujin ta'l mirra;

14qe tq'ab' mer ik tza'n jun xmulq'ab'aj q'an pwaq kyoksa'n qe tal ab'j ti'j topasio kyb'i; aju t-ximlal mer ik tza'n marfil tz'umin twitz ex kyoksa'n qe tal ab'j ti'j zafiro kyb'i;

15qe tqan mer ik tza'n tqan ja b'inchamaj ti'j ab'j mármol, kykub'sa'n kyib'aj qe kyq'uqb'il q'an pwaq kytx'otx'il; q'ancha'lxix che ke'yin ik tza'n che ke'yin qe tze' wi'ten ate' twi witz Líbano;

16aju yol nne'tz tuj ttzi' puro chi'. Tb'anilxix ju xinaq lu tuj tkyaqil.

Kyja'tzun tten aju xinaq k'ujla'nxix wu'ne ex wamiwoye, aqeye xu'j aj Jerusalén.