Números 10 - Mam Huehuetenango New Ortography

Qe chun saq pwaq kytx'otx'il

1Tzaj yolin Qman tuk'il Moisés ex tma:

2B'inchan b'aja kab'e chun saq pwaq kytx'otx'il, tx'ino'n tu'n martiy, tu'n tajb'en te chmob'l xjal, ex k'okel q'ajtzet te jun techal tu'n kyik' laq'e' xjal.

3Ok kyok q'ajtzet kykab'il chun, kykyaqil xjal k'okel kychmon kyib' twitza ttzi ja xb'alun te mojb'ab'l tib'il.

4Qatzun junx chun ma tz'ok q'ajtzet, o'kxtzun kye nejenel kye junjun k'loj kyiyjil aj Israel k'okel kychmon kyib' tuk'ila.

5Oktzun kyok q'ajtzet tnejel maj chun ch'in kyxol tq'ajq'ajel, kb'eltzun b'e kyu'n xjal kykub' tuj tumlal tjawitz q'ij,

6ex ok kyok q'ajtza'n tkab'in maj chun, kb'eltzun b'e kyu'n qeju kykub' tuj tumlal tnayaj q'ij. Ok kyok q'ajtzet chun ch'in kyxol tq'ajq'ajel, atzun techal tu'n tkub' b'e kyu'n xjal.

7Atzun ok kyok q'ajtzet chun ma' kyxol tq'ajq'ajel, atzun techal tu'n tok kychmon kyib' kykyaqil xjal.

8Tuj kykwent pal, aqeju tky'ajal Aarón, tu'n kyok q'ajtzet chun. Aju ley lu kyjel ten kyuk'ile te jumajx ex wiqinwiq kyjel kyma'ne kye kyk'wa'le.

9Ex qa ma che ul aj q'oj q'ojlel kyi'je tuj kytanmiye, k'okel kyq'ajtza'ne chun ex che jawil sch'i'ne nim, tu'n kyexe q'ojlel kyuk'il, tu'ntzun kytzaj nna'ne, aqine kymane ex Kydiose; ex che kletele wu'ne kywitz aj q'oj kyi'je.

10Ex kyq'ajtza'n oke chun kyuj q'ij te tzalajb'il, kyuj ninq'ij, ex kyuj q'ij ok kytzaj ke'yin ak'aj xjaw, ex ok t-xi kyq'o'ne kyoyaje patun in kub' ex ju chojb'il te mojb'ab'l tib'il, tu'ntzun kytzaj nna'ne. Aqine Kymane ex Kydiose, chi Qman te Moisés.

E ik' aj Israel t-xe witz Sinaí

11Tuj winqin tajlal tkab'in xjaw te tkab'in ab'q'i, jaw laq'e' muj tib'aj ja xb'alun jatum k'u'n tley Dios,

12ex kub'tzun b'e kyu'n aj Israel. E ik' tuj tzqij tx'otx' Sinaí ex atzun o we' muj tuj tzqij tx'otx' Parán.

13Atzun tnejel maj e b'et ik tza'nx otoq tzaj tma'n Qman te Moisés:

14Tnejelxix nejni qe soldad aj Judá tuk'il kybander q'i'n; aju nejenel kyxol soldad lu, atzun Naasón aju tky'ajal Aminadab,

15atzun nejenel kyxol soldad tiyjil Isacar, atzun Natanael aju tky'ajal Zuar,

16ex aju nejenel kyxol soldad tiyjil Zabulón, atzun Eliab aju tky'ajal Helón.

17Tejtzun tb'aj kyko'pin ja xb'alun te mojb'ab'l tib'il, aqe tiyjil Gersón ex tiyjil Merari e je'x iqante te ex kub' b'e kyu'n.

18Lepchix e je'x soldad tiyjil Rubén, tuk'ix kybander q'i'n, ex aju nejenel kyxol, atzun Elisur aju tky'ajal Sedeur;

19aju nejenel kyxol soldad tiyjil Simeón, atzun Selumiel aju tky'ajal Zurisadai,

20ex aju nejenel kyxol soldad tiyjil Gad, atzun Eliasaf aju tky'ajal Deuel.

21Lepchix e je'x qe tiyjil Coat, q'i'n qe makb'il xjan kyu'n. Ok in che pon tuj jun lugar, ya otoq jaw b'incha'n ja xb'alun te mojb'ab'l tib'il.

22Ex aqeju lepchix kyi'j, atzun qe soldad tiyjil Efraín, tuk'ix kybander q'i'n, ex aju nejenel kyxol, atzun Elisama aju tky'ajal Amiud;

23aju nejenel kyxol soldad tiyjil Manasés, atzun Gamaliel aju tky'ajal Pedasur,

24ex aju nejenel kyxol soldad tiyjil Benjamín, atzun Abidán aju tky'ajal Gedeoni.

25Te mankb'ilxitzun e je'x lpe' qe soldad tiyjil Dan, tuk'ix kybander q'i'n, ex aju nejenel kyxol, atzun Ahiezer aju tky'ajal Amisadai;

26aju nejenel kyxol soldad tiyjil Azer, atzun Pagiel aju tky'ajal Ocrán,

27ex aju nejenel kyxol soldad tiyjil Neftalí, atzun Ahira aju tky'ajal Enán.

28Kyja'tzun e tenb'a qe soldad aj Israel tej kyb'et.

Xi ttxko'n Moisés tb'alk tu'n t-xi' kyuk'il

29At jun q'ij xi tma'n Moisés te Hobab aju tb'alk, aju tky'ajal Reuel, aju aj Madián ex tji' Moisés, ex chi kyja':

—Ma qo'x qeye tuj tx'otx' o tzaj ttziyan Qman tu'n ttzaj tq'o'n qeye. Qo' quk'ile ex b'a'n ktela qu'ne, porke ma tzaj ttziyan Qman tu'n tb'inchante b'a'n kye aj Israel.

30Atzunte Hobab xi ttzaq'we'n:

—Mlay chinxe kyuk'ile, noq o'kx chin ajel meltz'aje tuj ntx'otx'e jatum ate' qe xjal at nxilene kyuk'il.

31Atzunte Moisés xi tma'n te:

—Mi'n tz'aja, ojtzqi'n qe lugar tu'na jatum b'a'n tu'n qkub' ten tuj tzqij tx'otx', ex jaku tz'ajb'ena yek'ul b'e qeye.

32Qa ma txi'ya quk'ile, jaku tz'oka te tajlal qu'ne ti'j tkyaqilju b'a'n tzul tq'o'n Qman qeye.

33Kyja'tzun tten e ik' t-xe witz te Qman ex e b'et ox q'ij. Aju kax k'ub'l tley Dios nejnitoq kywitz, in jyon ti'j jun lugar jatum tu'n kyojlan.

34Te q'ijl, ok ttzyet kyb'e, in b'et muj te Qman kyib'aj.

35Ex oktzun tik' kyi'n kax, in xi tma'n Moisés kyja':

We'ktza Nman. E kyel sputj qe aj q'oj ti'ja, ex e kyel oq qeju in che ik'un teya.

36Ex ok tpon kax jatum tu'n tkub' ten, in xi tma'n Moisés kyja':

Tajtza ja'lo Nman kyuk'il kykyaqil k'loj aj Israel mib'an kyajlanjtz.