Isaías 11 - Mam Huehuetenango New Ortography

Aju tiyjil Isaí k'okel te rey tu'n kyten xjal tuj txub'txaj ex tu'n t-xi b'inchet kyi'j

1Kyxol tiyjil Isaí kjawil jlet jun rey tu'n tok te t-xel David. Ik tten jlu ik tza'n jun tze' in jaw tx'emit, o'kx ttronkil in kyaj ten ex ti'j tronk in tzaj jlet t-xul.

2Kukx ktel T-xew Qman tuk'il tiyjil David ex kxel tq'o'n tojtzqib'l tu'n tel tnik' ti'j tkyaqil; kxel tq'o'n tnab'l ex tipumal, k'elel tnik' ti'j tajb'il Qman ex knimal te.

3Ktzalajel ok tniman te Qman; mlay che ok xjal tuj xjel tu'n noq tu'nju ok tke'yinte alkye kyten xjal, ex mlay b'ant kyi'j xjal noq tu'nju in tb'i'n.

4Tuj tumelxix kxel tb'incha'n kyi'j qe xjal minti' kyipun ex kxel tb'incha'n kyi'j qe meb'a xjal ate' tuj tkyaqil twitz tx'otx'. Aju tyol ik k'okel ik tza'n jun tze' tu'n tkub' kycastiw xjal najl twitz tx'otx', ex tu'n t-xew nne'tz tuj ttzi' che kymel qe xjal b'inchal mya b'a'n.

5Tuj tumelxix kkawil kyib'aj xjal ex axix tok tyol.

6Qe xo'j ex qe tal ẍne'l che najal junx tuj tzalajb'il, qe tigr ex qe tal chip junx che b'el b'une', qe tal tor ex qe b'alun junx che wa'l ex qe tal k'wa'l che pastoril kyi'j.

7Qe vac ex qe ttxu' oso junx che wa'l, ex junx che b'el b'une' qe kyal. Aju b'alun k'ul kxel twa'n ik tza'n te wakẍ.

8Jaku che schan tal ne' ttzi' tjul lob'aj b'a'n b'iyun, ex jaku ku'x kyq'o'n kyq'ab' tuj tq'u' q'anti' ex minti' kb'ajel kyi'j.

9Tuj tkyaqil twi witz xjan aju etzan tu'n Qman, minti' jun kb'inchal jun mya b'a'n ti'j juntl, porke ik tza'n a' in noj mar tu'n, ax ikxtzun kykyaqil xjal twitz tx'otx' k'elel kynik' ti'j Qman.

10Tuj tq'ijlalil tzul ktzajel jun tiyjil Isaí ex k'okel te jun techal kye kykyaqil xjal; che jyol qe nasyon ti'j ex tb'anilxix k'okel tnajb'il.

Che ajetz meltz'aj juntl maj qe xjal otoq che'x q'i'n najchaq

11Tuj tq'ijlalil tzul kxel tyek'un Qman juntl maj tipumal tu'n kykolpet qe xjal etzan tu'n, aqeju otoq che kyaj ten tuj Asiria, tuj Egipto, tuj Patros, tuj Etiopía, tuj Elam, tuj Sinar, tuj Hamat ex kyuj qe tx'otx' ate' ttzi mar, ex tu'n kyajtz ti'n juntl maj.

12Kjawil twab'an jun techal kye qe nasyon ex che okel tchmo'n qe aj Israel, aqeju otoq che'x q'i'n kyuj tnam najchaq, ex che tzajel tchmo'n qe xjal aj Judá kysputin kyib' tuj tkyaqil pak' ttxa'npun tx'otx'.

13Kb'ajel tlo'ch kyk'u'j aj Efraín ex che najel qe aj q'oj kyi'j aj Judá; mlay tzajtl tlo'ch kyk'u'j aj Efraín kyi'j aj Judá ex mlay che q'ojintl aj Judá kyi'j aj Efraín.

14Kykab'il che xe'l tuj telex q'ij tu'n kyok tzoqpaj kyi'j aj Filisteo tuj mlaj tx'otx'; kykab'il che elel q'inte kyq'inumab'l qe xjal ate' tuj tjawitz q'ij. Kb'el kyi'j aj Edom ex aj Moab kyu'n, ex qe aj Amón che kyjel ten tjaq' kykawb'il.

15K'ajel tzqij tq'ab' mar aju at tuj Egipto, kxel tnuqpi'n tq'ab' tib'aj nima Éufrates, ktzajel t-xupin jun kyq'iq' xob'ajilxix, ex te wuq pa'n k'elel nima tu'n, ex mi'n tz'el kyi'n kyxajab' ok kyik'x tuj a'.

16Oktzun kyajtz meltz'aj qe xjal otoq che kyaj ten tuj Asiria, aqeju etzan tu'n Qman, knetel jun b'e ma'xix twitz kyu'n, ik tza'nx tej kyetz qe aj Israel tuj Egipto.