Jeremías 14 - Mam Huehuetenango New Ortography

Minti' tzaj jb'al

1Tu'nju minti' tzaj jb'al tzaj tma'n Qman te Jeremías kyja':

2In che oq' aj Judá tu'n kyb'is, minti' xjal at kytzi tlamel tnam, ma che kub' qe' xjal twitz tx'otx' tu'n kyb'is, in jaw tq'ajq'ajel kywi' aj Jerusalén tu'n ta'w k'ixk'oj.

3In che'x kysama'n kymajen q'inun q'il a'; in che'x qe jlu jatum in chmet a', ex minti' a' in knet kyu'n ex in che ajtz meltz'aj minti' a' q'i'n kyu'n tuj kyẍoq'; puro najni nno'k kynab'l, in tzaj kych'ixwi ex nno'k kymuq'an ti'j kywi' tu'n tlaj kyb'is.

4Ma che'x pax tx'otx', qe xjal aq'nal tuj kojb'il ma naj kynab'l ex nno'k kymuq'an ti'j kywi' tu'n tlaj kyb'is, tu'n tlaj minti' jb'al.

5Ax ikx qe kytxu masat tuj kojb'il in kyaj kykolin qe kyal k'itzqetoq kyul-len itz'j, tu'n tlaj minti' k'ul te kywa.

6Qe bur te tjaq' k'ul in che kub' we' kywi' qe tal witz tz'la'j kyi'j, in xi kysaqo'n jatum ta' a' ik tza'n xo'j, ex aju tb'aq' kywitz b'i'x nno'k yupj ti'j tu'n tlaj minti' k'ul te kywa.

O yolin Jeremías tuk'il Dios te kyxel xjal

7Aya Nman, maske ax qile in q'mante tu'n tkub' qsentense, ex b'inchama qi'je tu'ntzun tjaw nimsa'n tb'iya. Nimku maj minti' ma japun tyola qu'ne ex ma qo b'inchane il twitza.

8Aya oyb'il kye aj Israel, o'kx aya kolol qi'je tuj tq'ijlalil yajb'il. ¿Tiqu'n ik ttena ik tza'n jun stranjer xjal tuj tnam, ex mer ik tza'n jun b'etin xjal o'kx in ayon ti'j tu'n tkub' q'ij ex nnik' naj?

9¿Tiqu'n ik ma tz'oka ik tza'n jun xjal najni tnab'l ex ik tza'n jun soldad minti' tipun tu'n tonin? Pero aya Qdiose ex aya at qxole, kykyaqil xjal b'a'n kyu'n qa etzan qo'ye tu'na; mi'n qo kyaj tkolina, chi Jeremías.

10Atzun jlu in tma'n Qman kyi'j aj Israel: Qe xjal lu nim kygan tu'n kyb'etje'; kyja'tzun minti' in che tzaj nke'yine tuk'il tzalajb'il. Ja'lo ktzajel nna'ne kyil ex kb'el kycastiw wu'ne tu'n tlaj kyb'inchb'en mya b'a'n.

11Tzaj tma'n Qman weye: Mi'n kub'sana nwitze tu'n kyxi wonine qe xjal lu.

12Maske kub' kyyo'n we'yaj, mlayx tzaj nq'o'n nwi'ye ti'j kyqanb'etz; maske che kub' kypatun qe alumaj ex maske tzaj kyi'n twitz awal te jun oyaj te weye, mlayx nk'ame. Che najel wu'ne tu'n q'oj, tu'n we'yaj ex tu'n tx'u'j yab'il, chi Qman weye.

13Atzun weye xi ntzaq'we'ne: Aya Nman Dios, qe xjal nno'k kyq'on kyib' te t-sanjela in xi kyma'n kye xjal qa minti' tu'n ttzaj q'oj mi we'yaj; noq o'kx tu'n kyten tuj txub'txaj tuj lugar lu.

14Tzajtzun ttzaq'we'n Qman weye kyja': Qe xjal lu noq in che nik'an yol ex noqx gan in tzaj kyna'n nb'iye. Minti'we ma che tzaj nsama'n, minti'we ma tzaj nma'n kye ikju, ex minti' ma chin yoline kyuk'il. Aju in kyma'n kyeye qa at ma kyil ik tza'n tuj witzik', mya ax tok kyu'n, noq sb'ub'l jlu, noq tten kyu'n ex noq tuj kyex kynab'l ma jaw jlet jlu.

15Kyja'tzun chi Qman in tma'n kyi'j qe xjal nno'k kyq'on kyib' te t-sanjel: Minti' ma che'x nsama'ne qe xjal lu, aqeju in kyma'n qa wu'ne in che tzaj nsama'ne, ex in kyma'n qa mi'n tzaj q'oj mi we'yaj tuj tnam lu. Che kymel qe xjal lu tuj q'oj ex tu'n we'yaj.

16Ax ikx qe xjal in xi kyb'i'n kyyol qe sanjel lu, che kymel tuj q'oj ex tu'n we'yaj, kyuk'ix kyxu'jil, kyky'ajal ex kyme'jel. Qe kyximlal kyimni kukx che kyjel pale' kyuj qe cay te Jerusalén ex mi a'l jun kb'elex maqunte kye. Atzun kb'antel wu'ne kyi'j tu'ntzun tchjet kyb'inchb'en mya b'a'n.

17Q'manxa jlu kye xjal: Nne'l ta'l nwitze q'ijtl ex qonik'an ex mlayx q'ajen tu'n tlaj yajb'il xob'ajilxix ma tzaj kyi'j qe nxjalile, ex tu'nju puro kyuw k'ixb'isab'l ma tzaj kyi'j.

18Qa ma chin exe tuj kojb'il, in wile kyximlal qe kyimni otoq che kub' b'yo'n tu'n spad; qa ma chin okxe tuj tnam, in che wile qe xjal kyja' kykyim tu'n we'yaj. Tza'nx qeju ok kyq'on kyib' te t-sanjel Dios ax ikx qe pal, noq e b'etje' ex minti' el kynik' ti'j, chikuya, chi Dios te Jeremías.

Xi yolin Jeremías tuk'il Qman

19Aya Nman, ¿maj te jumajx ma che el tik'una aj Judá? ¿Mapetzun b'aj tganiya kyi'j aj Sión? ¿Tiqu'n ma qo b'aj tk'ixb'isa'na ex minti'x in qo b'anixe tu'na? In qo ayontoqe tu'n qtene tuj txub'txaj, ex minti' b'a'n ma qk'ame. In qo ayontoqe tu'n qb'anixe, ex noq o'kx xob'ajil at.

20Aya Nman, ma tz'el qnik'e ti'j qb'inchb'ene mya b'a'n ex aju mya b'a'n kyb'incha qtzan qxe'chele; ma qo b'inchane il twitza.

21Ex noq tu'n tjaw nimset tb'iya, mi'n qo el tik'una, mi'n kub' tq'o'na tch'ixwi tq'uqb'ila ma' t-xilen. Na'ntza aju yol kyaj b'ant ti'j tu'na quk'ile, ex japunx tu'na.

22¿Atpetzun jun tilb'ilal kydios xjal kyuj txqantl nasyon jaku tzaj jb'al tu'n? ¿Tu'nxpelo kya'j in tzaj jb'al? Mi'n. Tu'na in tzaj t-sama'na, aya Qmane ex Qdiose, tu'na in b'ant tkyaqil jlu; kyja'tzun o'kx ti'ja q'uql qk'u'je.