1Qe tyol Lemuel aju rey te tnam Masa, aqeju yol tzaj xnaq'tza'n te tu'n ttxu', chi kyja':
2Wal, wu'ne ul wa'line ex xi ntziyane te Dios tu'n tajb'ena te, ¿ti txqantl kxel nma'ne teya?
3Mi'n b'aj tyajana tipuna kyuk'il qe xu'j, porke tu'n kylaj qe xu'j in che el tzpet qe rey.
4Lemuel, mya b'a'n tu'n t-xi kyk'a'n qe rey ex qe kawil aju vin ex q'e'n,
5porke mya yajku tzik' tna'l ley kyu'n ex mlay txi kyb'incha'n kyi'j qe xjal meb'a ex ate' tuj b'is.
6Q'onxa q'e'n kye qe xjal ch'ix kykyim ex q'onxa vin kye qeju in che b'isun;
7e t-xi kyk'a'n tu'ntzun mi'n ttzaj kyna'n aju kymeb'yil ex aju k'ixk'oj nnik'x kyu'n.
8Yolina ti'j ju xjal mib'an yolin tu'ntzun tklet; ex kolina ti'j ju xjal mi a'l jun kolil ti'j.
9Yolina, b'inchanxa kyi'j tuj tumelxix; b'inchanxa kyi'j qe xjal meb'a ex qeju minti' ch'in at kye.
At nimb'il teju xu'j b'a'n tmod10Aju xu'j puro b'a'n tmod kyuw tu'n tknet, ex mas ma' t-xilen kywitz qe tal ab'j tb'anilxix.
11Aju tchmil nno'k qe'xix tk'u'j ti'j, ex minti' jun ti'xti atx taj te.
12In tb'incha'n b'a'n te tchmil tkyaqil q'ij tuj tanq'ib'l ex minti' in tb'incha'n mya b'a'n ti'j.
13In xi' jyol lan ex noq' lino, ex tuk'il tzalajb'il nno'k ten chmol ti'j.
14Aju xu'j lu najchaq in tzaj ti'n twa, ik tten ik tza'n qe comersyant in che'x q'il kyk'a'ẍ tuj barc najchaq.
15Na'nxtoq tkub' q'ij, in jaw we' ex in ok ten k'a'chal kye tal ex qe tmajen xu'j.
16Qa ma tz'ok tke'yin jun piẍ tx'otx', in kyaj tlaq'o'n; ex tu'nju tpwaq in tkamb'a'n ti'j taq'unb'en, in ku'x tawa'n tqan uva.
17Nno'k mastl tipun, ex tu'n tkyaqil tk'u'j in ok ten aq'nal.
18Tok tkwent ti'j tza'n tten tu'n tch'iy tk'a'ẍ, ex te qonik'an yaj in xi tkolin taq'un.
19Tu'nx in b'aj tchqo'n noq' ex in ku'tz tchmo'n.
20In onin kyi'j qe meb'a ex kyi'j qeju atx taj kye.
21Minti' in b'isun kyi'j qeju ate' tuj tja tu'n tlaj ttxa che'w, porke kykyaqil qe tok kyxb'alun pim wen.
22Tu'nx ju xu'j in che b'ant qe ttxo'w, ex puro tb'anil t-xb'alun tok.
23Aju tchmil ojtzqi'nxix kyu'n xjal ok tkub' qe' ttzi tlamel tnam kyxol qe xjal ma' kyoklen.
24In b'ant xb'alun ex k'itzb'aj tu'n, ex in xi tk'ayin kye qe comersyant.
25At tipun ex niman kyu'n xjal, ex minti' in b'aj tk'u'j ti'j ju tzul tuj q'ij nchi'j.
26At tnab'l tu'n tyolin, ex in tq'o'n xnaq'tzb'il tuk'il tk'ujlalil.
27Tok tkwent ti'j tza'n tten tu'n kyten b'a'n qeju ate' tuj tja, ex in aq'nan wen tu'n twa'n.
28Qe tal in che yolin ti'j: Puro b'a'n qtxu'ye, che chi. Ax ikx tchmil in tzalaj ti'j ex in xi tma'n te:
29At nimku xu'j puro b'a'n, ex aya mas b'a'n kywitz kykyaqil, chi tchmil te.
30Mlay qe' qk'u'j ti'j qa b'a'n jun xu'j noq tu'nju tb'anil ke'yin, porke a jlu noq te kab' q'ij in ten; atzunju xu'j b'a'n niman te Qman, atzunju b'a'n tu'n qyolin b'a'n ti'j.
31Che yoline b'a'n ti'j kywitz kykyaqil tnam xjal; ex che yoline ti'j tkyaqil tb'inchb'en b'a'n.
Who We AreWhat We EelieveWhat We Do
2025 by iamachristian.org,Inc All rights reserved.
