Filemón 1 - Mam Huehuetenango New Ortography

Jun q'olb'eb'l tu'n apostol Pablo te Filemón

1Aqine Pablo, pres qine tu'n tlaj Jesucrist. Ma tzul erman Timoteo wuk'ile, kyja'tzun in xi qtz'ib'ane ju u'j lu teya Filemón, at-xix qk'u'je ti'ja ex junx in aq'nana quk'ile.

2Ax ikx in xi qtz'ib'ane te qerman Apia ex te Arquipo, aju soldad junx quk'ile, ex kye kykyaqil okslal nno'k kychmon kyib' tuj tjaya.

3Awt Qman Dios tuk'ix Qajaw Jesucrist che tzaj q'onte xtalb'il kyeye ex tu'n tqe'xix kyk'u'je.

Aju tk'ujlalil Filemón ex ju tokslab'l

4Kukx in xi nq'o'ne chjonte te Dios, aju Dios in chin ajb'ene te, in xi nq'o'ne chjonte ti'ja Filemón, ex in tzaj nna'ne tuj nna'j Diose,

5porke in nb'i'ne at tk'ujlalila ti'j Qajaw Jesús, ex kyi'j kykyaqil okslal, ex at tokslab'la ti'j Qajaw Jesús.

6Chin kub'sale twitz Dios kyi'j qeju ma che okslan tu'nju ma txi tchik'b'a'na tokslab'la kye; chin kub'sale kyi'j tu'n telxix kynik' ti'j t-xtalb'il Dios ma tzaj tq'o'n qe noq tu'n Jesucrist.

7Porke tu'nju tk'ujlalila erman, ma qo tzalaje nim ex ma qe'xix qk'u'je, porke ma q'uqb'anjtz kyk'u'j okslal tu'na.

In kub'san Pablo ti'j Onésimo, aju tmajen Filemón

8Kyja'tzun maske at woklene tu'n Crist tu'n t-xi nma'ne alkye tu'n tb'inchanteya,

9pero tu'nju at nk'ujlalile ti'ja, mas b'a'n chin kub'sale twitza, porke aqine Pablo tij xjal qine, ex presin qine ja'lo tu'n tlaj Jesucrist.

10Chin kub'sale twitza ti'j nk'wa'le Onésimo, aju ma tz'ok te nk'wa'le tuj okslab'l tuj presb'il weye.

11Ojtxi minti'xix ajb'en Onésimo teya, atzun ja'lo at tajb'en teya ax ikx weye.

12K'ajeltzun nsama'ne tuk'ila; k'momtzuna mer ik tza'n ax qine ok chin tk'ma'ya.

13Ma wajb'eye tu'n tten Onésimo junx wuk'ile, tu'n tajb'en weye te t-xela tuj presb'il weye, porke pres qine tu'n tlaj tqanil kolb'il,

14pero mi'n waje tu'n nb'inchanteye qa na'nxtoq nyoline tuk'ila, ex mi'n waje tu'n ttzaj tq'o'na jun xtalb'il weye lajwers, noq o'kx waje tu'n ttzaj tq'o'na tu'n tkyaqil tk'u'ja.

15B'alo tu'n jlu el tpa'n tib' Onésimo ti'ja kab' q'ij, tu'n tajtl tuk'ila tu'n tten te jumajx.

16Ok tpontl tuk'ila, mlay tentl ik tza'n jun majen tk'ayin tib', noq o'kx tu'n tten ik tza'n jun erman k'ujla'n tu'na. Porke mas at toklen ja'lo twitz jun majen. At-xix nk'u'je ti'j, ex atzun teya mas at-xix tk'u'ja ti'j. Mya noq o'kx at tk'u'ja ti'j Onésimo tu'nju tmajena, pero ikx tu'nju okslal ti'j Qajaw.

17Qatzun tuk'ila qine tuj twitza, k'moma Onésimo ik tza'n ax qine.

18Ex qa at mya b'a'n ma tb'incha teya, ex qa at tk'as tuk'ila, q'ontza tuj nkwente.

19Aqine Pablo ma kub' ntz'ib'ane jlu tu'n nq'ab'e, aqine chin chjolte k'as; maske ikx teya nim tk'asa wuk'ile, jaku b'ant tu'n t-xi nma'ne tu'n toka te nmajene, pero mlay txi nma'ne.

20Kyja'tzun erman, kuchiwt tu'n tb'inchanteya jun xtalb'il weye, tu'nju okslala ti'j Qajaw; q'uqb'ama nk'u'je tu'nju okslal qo' ti'j Crist.

21Kyja'tzun ma txi ntz'ib'ane jlu teya tu'nju q'uql nk'u'je ti'j qa kxel tnimana nyole, ex b'a'n wu'ne mas ok tb'incha'ya twitzju ma txi nma'ne teya.

22Ax ikx at juntl tu'n t-xi nma'ne teya, b'inchama tten nposadiye; porke q'uql nk'u'je ti'j Dios ok chin pole juntl maj kyuk'ile noq tu'n kyna'j Diose.

Jun q'olb'eb'l tu'n Pablo te b'ajsb'il yol

23In xi q'olb'e'na tu'n Epafras, junx ta' wuk'ile tuj pres tu'n tlaj Jesucrist.

24Ax ikx in xi q'olb'e'na tu'n Marcos, ex tu'n Aristarco, ex tu'n Demas, ex tu'n Lucas, aqeju junx in che aq'nan wuk'ile.

25Awt t-xtalb'il Qajaw Jesucrist ten tuj kyanmiye. Ikxwitju.