Jueces 3 - Mam Huehuetenango New Ortography

Qe tnam xjal ax e kyaj ten tuj tx'otx' Canaán

1Atzun qe tnam jlu e kyaj tq'o'n Qman tuj tx'otx' tu'ntzun kyok tq'o'n aj Israel tuj malb'il, aqeju na'nxtoq kyitz'j tej tok q'oj ti'j tx'otx' Canaán tu'n ttzyet.

2E kyaj tq'o'n Qman qe tnam lu tu'ntzun tb'ant kyq'ojin qeju b'ajxtoq che ten tuj q'oj.

3E kyaj ten jwe' nejenel kye aj Filisteo, kyuk'ix kykyaqil aj Canaán, aj Sidón ex aj Heveo. Qe aj Heveo atzun najltoq qe kywi' qe witz Líbano, xi'ynix twi witz Baal-hermón ex ponin b'aj max jatum in xi' b'e tu'n tpon tuj tnam Hamat.

4Ex kyi'jtzun qe xjal lu, tu'n kyok aj Israel tuj malb'il tu'n Qman tu'ntzun tel tnik' ti'j qa tu'n t-xi kyniman qe tmandamyent aju otoq txi tq'o'n Moisés kye kyxe'chel.

5Kyja'tzun tten e najan aj Israel kyxol qe xjal lu: Qe aj Canaán, qe aj Heteo, qe aj Amorreo, qe aj Ferezeo, qe aj Heveo ex qe aj Jebuseo,

6ex atzun qe kyky'ajal ex qe kyme'jel aj Israel e jaw moje' kyuk'il kyky'ajal ex kyme'jel qe xjal najlqe kyuj qe tnam lu. Ax ikx e ok ten aj Israel k'ulul kywitz qe kydios xjal lu.

E klet aj Israel tu'n Otoniel tuj tq'ab' Cusan-risataim

7Aju kyb'inchb'en aj Israel mya b'a'n e'la tuj twitz Qman, porke ik' tna'l Qman Dios kyu'n, ex e k'ulun kywitz tilb'ilal Baal ex tilb'ilal Astarté.

8Tu'ntzun jlu tzaj tq'oj Qman kyi'j ex e je'x tq'o'n tuj tq'ab' Cusan-risataim aju rey te Mesopotamia. Wajxaq ab'q'i o che ajb'en aj Israel te Cusan-risataim.

9Tejtzun kyok ten kub'sal kywitz te Qman, jawtzun t-sk'o'n Qman jun klol kye, Otoniel tb'i, aju tky'ajal Cenaz; ate Cenaz titz'in Caleb.

10Tzaj q'o'n tipumal Otoniel tu'n T-xew Qman, ex ok te nejenel kyxol aj Israel, xi'tzun tuj q'oj ex tzaj q'o'n Cusan-risataim tuj tq'ab' tu'n Qman, ex kub' ti'j tu'n.

11Tb'ajlenxi jlu o che ten aj Israel tuj txub'txaj 40 ab'q'i. Te tib'ajxi kyimtzun Otoniel.

E klet aj Israel tu'n Aod tuj kyq'ab' aj Moab

12E oktzun ten aj Israel juntl maj b'inchal mya b'a'n twitz Qman; kyja'tzun xi tq'o'n Qman tipumal Eglón aju rey kye aj Moab tu'n tq'ojin kyi'j aj Israel.

13O b'ant ti'j jun tyol Eglón kyuk'il aj Amón ex kyuk'il aj Amalec, e ok tzoqpaj kyi'j aj Israel, ex tzyet kyu'n aju tnam tok tb'i Tqan Xa'j.

14Wajxaqlaj ab'q'i e ajb'en aj Israel te rey Eglón.

15Tejtzun kyok ten kub'sal kywitz te Qman, jawtzun t-sk'o'n Qman jun klolte kye, Aod tb'i, aju tky'ajal Gera ex tiyjil Benjamín, ex tu'n tnayaj Aod b'a'n tz'aq'nan.

At jun q'ij xi kysama'n aj Israel Aod q'olte chojenj te rey Eglón.

16Otoq b'aj tb'incha'n Aod jun spad te kab'e pak' ttzi', te mey var tqan, ex ok tk'alo'n tk'u'j tujxi tkapiẍay tuj tb'anq'ab',

17ex xi'tzun q'olte chojenj tuk'il rey Eglón. Ate Eglón puro gord wen.

18T-xilenxi tq'o'n Aod chojenj te rey Eglón, etztzun kyuk'il qe tuk'il uk'in,

19ex tej tpon tuj lugar jatum ate' qe tilb'ilal nno'k kydiosin xjal, aju tkub'sa'n niqayin ttxlaj lugar Gilgal, aj meltz'aj Aod juntl maj jatum ta'toq rey Eglón ex xi tma'n te kyja':

—At jun tqanil q'i'n wu'ne te teya, Tat Rey, ex aju tqanil lu tuj ewaj kxel nma'ne teya.

Xitzun tma'n rey kye qe xjal in che ajb'entoq ttxlaj tu'n mi'n kyq'ajt, ex tu'n kyex txa'n pe'n.

20Tejtzun tkyaj ten Aod junx te tuk'il Eglón, q'uqltoq Eglón tuj jun tal ja jatum in ojlan tu'n ta'w kyaq, pon laq'e' Aod ttxlaj ex xi tma'n te kyja':

—Aju tqanil q'i'n wu'ne te teya, tu'n Dios ma tzaj tma'n.

Tejtzun tb'inte Eglón jlu, jawtzun we' tuj tq'uqb'il.

21Jatztzun ti'n Aod t-spad tu'n tnayaj, aju k'alontoq tk'u'j tuj tb'anq'ab', ex xi t-xayu'n tuj tk'u'j Eglón.

22Kyuwxix xi t-xayu'n wen, mya o'kx te spad okx b'aj, ax ikx tuk'ix tqan spad xi b'aj, ex minti' kyaj malekj spad tu'nju puro gord te Eglón, ex minti' etz ti'n Aod spad tuj tk'u'j Eglón.

23Te tib'ajxi etz tlamo'n Aod qe tlamel ja ex b'i'x kyaj tq'o'n kyal.

24Tej otoq tz'ex Aod, e pontzun qe xjal in che ajb'entoq ttxlaj rey, ex tej tkyil lamo'ntoq ja, kub' kyximan qa txa'l te rey otoq txi', ex kyja'tzun otoq tz'etz tlamo'n ja jatum in ojlantoq tu'n ta'w kyaq.

25Ex tu'nju nim tuj e ayon, tzajtzun kyb'is tej kyke'yinte mixtoq tu'n tetz rey. Tzajtzun kyi'n tal ja, ex tejtzun tjaqet ja kyu'n, o kyil lu kypatrón palch tkub' twitz tx'otx' kyimnitoq.

26Akux in che ayontoq qe xjal lu, ate Aod otoq tz'el oq, ex texlenxi tuj lugar jatum ate' qe tilb'ilal nno'k kydiosin xjal, pon tklon tib' tuj lugar Seirat.

27Tejtzun tpon tuj lugar lu, ok tq'ajtza'n jun chun tuj tiwitz tx'otx' kye aj Efraín te txokb'il kye aj Israel, ex kykyaqiltzun ul kychmon kyib' tuk'il, ex e ok lpe' ti'j tej kyku'tz tk'u'j witz.

28Xi tma'n Aod kye:

—Che lpeke wi'je porke ate Qman ktzajel q'onte qe aj q'oj qi'j tuj qq'ab', aqeju aj Moab.

E oktzun lpe' ti'j, e tzyet qe lugar kyu'n jatum ate' qe xajb'il a' te nima Jordán, ex mi jun ik'x kytzoqpi'n tu'n tik'x jlajxi.

29Tuj tyemp lu kub' kyb'yo'n laj mil xinaq aj Moab, kykyaqil qe jlu at nim kyipun ex kyuw kyk'u'j tuj q'oj, ex mi jun kye o kyaj anq'in.

30Kyja'tzun tten o kub' kyi'j aj Moab kyu'n aj Israel. Te tib'ajxi jlu o che ten aj Israel tuj txub'txaj 80 ab'q'i.

E klet aj Israel tu'n Samgar tuj kyq'ab' aj Filisteo

31Aju juntl nejenel ok te tib'ajxi Aod, atzun Samgar aju tky'ajal Anat. Kub' tb'yo'n Samgar qaq syent aj Filisteo tu'n jun puy. Ax ikx te o che klet aj Israel tu'n.