2 Samuel 15 - Mam Huehuetenango New Ortography

Jaw ti'n tib' Absalón tu'n tq'ojin ti'j David

1Tej tel ch'intl q'ij, knet jun carwaj tu'n Absalón, aju in ajb'en tuj q'oj, kyuk'ix qe chej, ex b'ant kyten 50 xinaq tu'n kykub' nej twitz.

2Primx in jaw we' Absalón tu'n t-xi' web'il ttzi b'e ttzi tlamel tnam, ex ok tpon jun xjal tu'n tb'ant ti'j jun tq'oj tu'n rey, in xi txko'n tu'n Absalón ex in xi qanin te alkye tnam otoq tzaj. Qatzun ma tma xjal: Ax kyiyjil jun k'loj aj Israel we qin, qa chi,

3ex in xi tma'n Absalón te: Ax tok, aju in tb'incha'na puro b'a'n ex tuj ttxolil ta', ex mi jun jaku tzaj b'inchante ti'ja tuk'il rey.

4Ex in xi tma'ntl: Noqwit aqine jwes te tnam lu tu'n kyul wuk'ile kykyaqil qeju at kyq'oj, jaku txi nb'incha'ne kyi'j.

5Ax ikx, ok in pon laq'e' jun xjal q'olb'elte, in xi tnuqpi'n tq'ab', ex in tzaj tchle'n ex nne'l ttz'ub'an twitz ju xjal.

6Iktzun tten o tb'incha Absalón kyuk'il kykyaqil xjal aj Israel in che'x tuk'il rey tu'n ttzaj b'incha'n kyi'j tu'n, ex kyja'tzun tten kub' ti'j kynab'l aj Israel tu'n Absalón tu'n kyok lpe' ti'j.

7Tb'ajlenxi kyaje ab'q'i, xi tma'n Absalón te rey:

—In chin kub'sane twitza Tat Rey, tu'n ttzaj tq'o'na amb'il weye tu'n nxi'ye tuj tnam Hebrón, tu'ntzun tjapun wu'ne aju xi ntziyane te Qman.

8Tej najltoq qine tuj tnam Gesur tuj tx'otx' Siria, xi ntziyane te Qman kyja': Qa ma chin aj q'i'ne tu'n Qman tu'n npone juntl maj tuj tnam Jerusalén, oktzun chin k'ulule te tuj tnam Hebrón, nchiye xi nma'ne.

9—B'a'n tu'n t-xi'ya tuk'il tzalajb'il, chi rey xi ttzaq'we'n.

Xi'tzun Absalón tuj tnam Hebrón.

10Ex ax tyemp lu, xi t-sama'n Absalón junjun t-sanjel kyxol kykyaqil k'loj kyiyjil aj Israel tu'n t-xi kyma'n kye: Ok kyb'inteye ok tq'ajt chun, b'i'x kymaye kyja': Ma tz'ok q'o'n Absalón te rey tuj tnam Hebrón, che chikuye.

11Ax ikx tzaj ttxko'n Absalón kab' syent xinaq aj Jerusalén, ex qe xinaq lu e je'x noq yalnix ti'j kyximb'etz, ex minti'toq b'a'n kyu'n aju t-ximb'etz Absalón.

12Tej kyxi tq'o'n Absalón qe chojb'il, xi tma'n tu'n t-xi txokb'aj Ahitofel aju aj Gilo; aju xjal lu a jun kyuk'il qeju in che q'on tconsej David. O ttxok Absalón ju xjal lu tu'n tten te tuk'il. Kyja'tzun tten okxix tipun t-ximb'etz Absalón tu'n tel q'i'n David te rey, ex in chmet-xi kyb'aj qeju e ok lpe' ti'j.

Ex oq David tuj Jerusalén

13Pon jun sanjel q'malte te David qa otoq txi kyq'on kyib' aj Israel tuj tkwent Absalón.

14Xitzun tma'n David kye kykyaqil qeju at kyoklen ttxlaj ex ate'toq tuk'il tuj tnam Jerusalén:

—Qo el oq b'i'x ja'lo, ex qa mi'n xqo el oq, mlay qo tzoqpaj twitz Absalón. Qo', chux qe'ye, mya yaj jaku qo ul knet tu'n tzalu, ex jaku qo b'aj k'ixb'isa'n tu'n, ax ikx jaku che b'aj naj kykyaqil xjal ate' tuj tnam tu'n, tu'n spad, chi David.

15Atzun kye xi kytzaq'we'n te rey:

—Bay qeye Tat Rey, noq b'anin qtene tu'n qb'inchanteye noq alkyex ktzajel tma'na qeye.

16Kyja'tzun tten ex rey tuj tnam, kyuk'ix kykyaqil qeju ate' tuj tja, noq o'kx e kyaj tq'o'n laj t-xu'jil tu'n kykwentin tja.

17Texlenxi rey kyuk'ix kykyaqil qe xjal e je'x lpe' ti'j, ax e kub' we' tuj jun ja tkub' max ttxa'n tnam.

18Kykyaqil qeju at kyoklen tuj tkawb'il e kub' ten ttxlaj, atzun qe aj Cereteo ex qe aj peleteo, aqeju otoq che ok q'o'n te xq'uqil tja rey, e kub' nej twitz kyuk'ix qaq syent aj Geteo otoq che tzaj lpe' ti'j max tuj tnam Gat.

19Ex xi tma'n rey te Itai aju aj Gat:

—¿Tiqu'n tuk'ixa ma tzaj quk'ile? Mas b'a'n tu'n taj meltz'aja ex tu'n tkyaj tena tuk'il ju ak'aj rey, porke aya jun stranjer xjal qxole, noq etz oqa tuj ttanmiya tej tula tzalu.

20Malpe ew tzula, ¿tza'ntzun tten tu'n t-xi nma'ne teya tu'n t-xi'ya wuk'ile? Weye minti' b'a'n wu'ne jatum chin xe'le. Mas b'a'n tu'n taj meltz'aja ex tu'n kyxi ti'na qe t-xjalila tuk'ila. Awt Qman ky'iwlante teya ex kukxwit ten tuk'ila te jumajx.

21Atzunte Itai xi ttzaq'we'n te rey:

—Aqine ajb'el teya kxel nma'ne jun yol axix tok twitz Qman ex twitza, aya Tat Rey, noq ja'x jatum ktela, ax ikx weye axtzun chin tele, qa tu'n qanq'in ex qa tu'n qkyim.

22—Qa ikju qo'na quk'ile, chi David xi ttzaq'we'n.

Kyja'tzun tten xi' Itai tuk'il David, junx kyuk'il kykyaqil qe xinaq in che b'et tuk'il, ex kyuk'ix qeju ate' tuj tja.

23Kykyaqil qe xjal e kyaj ten tuj tnam, nimxix o che oq' tej kyke'yinte kyja' kyik'x tuj tqan xaq Cedrón qe xjal ate' tuk'il David, ex tuk'ix te rey ik'x tuj; ex kykyaqil xjal e kub' nej twitz rey tu'n kyxi' tuj b'e in pon tuj lugar minti' kynajb'il xjal tuj.

24Tuk'ix Sadoc ex kyuk'ix qe aj Leví q'ilte kax k'ub'l tley Dios e ok lpe', ex kub' kyq'o'n ju kax twitz tx'otx'. Tejtzun kyetz b'aj kykyaqil xjal tuj tnam, tuk'ix te Abiatar xi' kyuk'il.

25Atzunte rey xi tma'n te Sadoc:

—Q'i'n aja juntl maj tuj tnam aju kax k'ub'l tley Dios. Qa ma nkamb'aye xtalb'il te Qman, oklo chin ajetz meltz'aje juntl maj, ex oklo wila'ye ju kax ex ju lugar jatum tkub'sa'n.

26Qatzun ma tma Qman: Minti' in chin tzalaje ti'ja, qa chi, ex lu qine lu, b'a'n tu'n tb'inchante wi'je noq alkye b'a'n tuj twitz.

27Ax ikx xi tma'n rey te pal Sadoc:

—Aya k'okel ke'yinte ti kb'ajel. B'a'n tu'n kyaj meltz'aje tuj txub'txaj tuj tnam tuk'ix Abiatar ex kyuk'ix kab'e kyky'ajale; aya Sadoc tuk'ix ju tky'ajala Ahimaas, ex Abiatar tuk'ix Jonatán aju tky'ajal.

28Atzun weye ax chin kyjel tene kytxlaj qe xajb'il a' tuj lugar minti' kynajb'il xjal tuj, max okxi tpon jun tqanil kyu'ne wuk'ile, chi David.

29Atzunte Sadoc tuk'ix Abiatar ajtz kyi'n ju kax k'ub'l tley Dios tu'n tpon juntl maj tuj Jerusalén, ex ax e kyaj ten.

30Atzunte David kyja' jax twi witz Olivos minti' t-xajab' tok ex in oq', ex potzin ti'j twi' te jun yek'b'il ti'j tb'is. Ax ikx kykyaqil qe xjal ate' tuk'il, potzin ti'j kywi' ex in che oq' qe tej kyjax.

31Tej tpon tqanil tuk'il David qa a jun Ahitofel kyxol qeju otoq moje' kyyol tuk'il Absalón tu'n tel q'i'n David te rey, ok ten David kub'sal twitz Qman tu'n tb'aj ttzaksan t-ximb'etz Ahitofel.

32Tejtzun tjapun David max twi witz jatum in che'x aj xjal k'ulul te Dios, etz jun xjal kanul ti'j, Husai tb'i ex kyiyjil aj Arquitas; sb'it'umaj t-xb'alun tok ti'j, ex tjax tx'otx' tuj twi' te jun techal ti'j tb'is.

33Xitzun tma'n David te:

—Qa ma txi'ya wuk'ile, k'okela mer ik tza'n jun iqtz te weye.

34Qatzun ma tz'aj meltz'aja juntl maj tuj Jerusalén tu'n t-xi tma'na te Absalón kyja': Tat Rey, aqine tmajena jaku chin ajb'ene teya, ik tza'n ẍin ajb'ene te tmana nej, qa chiya, jakutzun tz'onina wi'je tu'n tb'aj tzakset t-ximb'etz Ahitofel.

35Ex lu qe pal Sadoc ex Abiatar jaku che onin tuk'ila. Kyja'tzun q'manxa kye tkyaqilju k'okel tb'i'na tuj tja rey.

36Lu Ahimaas aju tky'ajal pal Sadoc, tuk'ix Jonatán aju tky'ajal pal Abiatar, a jun qe ate' ma chixin, kyja'tzun samantza qe xjal lu tu'n nb'inteye kye ti'j tkyaqil tqanil ok kyb'iye, chi David te Husai.

37Atzunte Husai aju tamiw David, pon tuj Jerusalén tuj or tej matoq nno'kx Absalón tuj tnam.