1Ik' oq David tuj lugar Naiot aju ta' tuj tkwent tnam Ramá, ex xi' ma jatum ta' Jonatán tu'n t-xi tma'n te:
—¿Titzun ma nb'inchaye? ¿Alkye il ma b'ant wu'ne? ¿Alkye wile ma nb'inchaye twitz tmana tu'nju in jyonxix wi'je tu'n nkub' tb'yo'n?
2Atzunte Jonatán xi ttzaq'we'n:
—¿Tiqu'n in ximana ti'j ikju? Mlayx kub' b'yo'na tu'n, ex qa at jun in kub' t-ximan nmane il ti'j in tzaj tma'n weye maske ma' t-xilen ex maske ch'in, ex mlay tb'incha qa na'nxtoq ttzaj tma'n weye. ¿Tza'ntzun tten tu'n tkub' ewan jlu nwitze tu'n nmane? Mlay b'ant ikju, chi Jonatán.
3Atzunte David xi tma'n:
—Ya b'a'n tu'n tmana qa b'a'n qten tuk'ila, ex milo taj tu'n tb'inteya, ex qa ma tb'iya jakulo tzaj tb'isa. Ex twitz Qman Dios ex twitza kxel nma'ne jun nyole axix tok, qa noq ch'intl taj tu'n nkub' b'yo'ne tu'n, chi David.
4Xitzun tqanin Jonatán te David:
—¿Alkye onb'il taja tu'n nb'inchanteye teya?
5Atzunte David xi ttzaq'we'n:
—B'intza: Nchi'j ik'set ninq'ij ti'j juntl ak'aj xjaw ma tzaj ke'yin, ex il ti'j tu'n nkub' qe'ye wa'l tuk'il rey. Ex q'ontza amb'il weye tu'n t-xi wewan wib'e tuj kojb'il te kab'e q'ij, ex max tu'n t-xi nyek'un wib'e ka'jxi te qale.
6Qatzun ma chin tzaj qanine tu'n tmana, b'ix txi tma'na te: Ma tzaj tqanin David amb'il weye tu'n t-xi' tuj Belén aju ttanmi, ex kykyaqil qeju at kyxilen tuk'il che ik'sal ninq'ij ma chixin, ex kxel kyq'o'n chojb'il te Qman ik tza'n in b'ant kyu'n tkyaqil ab'q'i, chikuya txi tma'na te.
7B'a'n qa chi, mi'ntzun chin b'isune, qatzun ma jaw q'ojl, atzun k'elel tnik'a ti'j tmana qa ma kub' t-ximan tu'n nkub' b'yo'ne tu'n.
8Kyja'tzun b'inchama xtalb'il lu weye, porke b'a'n tu'na aqine ajb'el teya ex twitz Qman o kyaj b'ant ti'j jun qyol. Qatzun aqine at wile, mejor chin tb'yonkuya. Mya il ti'j tu'n nxi ti'na twitz tmana, chi David.
9Atzunte Jonatán xi ttzaq'we'n:
—Mi'n ximana ti'j ikju. Qa ma nb'iye jun yol qa in ximan nmane tu'n tb'inchante jun mya b'a'n ti'ja, kxel nma'ne teya.
10Xitzun tqanin David te Jonatán:
—¿Alkye kpol q'malte tqanil weye qa mya tuj tx'u'jb'il ktzajel ttzaq'we'n tmana?
11Atzunte Jonatán xi ttzaq'we'n:
—Qo' wuk'ile tuj kojb'il.
E je'xtzun kykab'il tuj kojb'il,
12ex atzun xi tma'n Jonatán te David:
—Kxel nma'ne teya jun nyole axix tok twitz Qman aju Qdios aj Israel qo'; nchi'j ex qa ka'j, ax or lu ok tb'iya wu'ne aju t-ximb'etz nmane. Qa b'a'n t-ximb'etz ti'ja kxe'ltzun nsama'ne tqanil tuk'ila;
13qatzun at jun t-ximb'etz mya b'a'n ti'ja ex qa mi'n ma pon tqanil wu'ne tuk'ila, awttzun Qman tzaj q'onte ncastiwoye kyuwxix tu'n tlaj jlu, ex tu'n tlaj minti' otoq chin onine ti'ja tu'n ttzoqpaja tuj cheb'a; awttzun Qman onin teya ik tza'n o tz'onin ti'j nmane.
14Atzun ja'lo, akux itz' qine, b'inchama xtalb'il weye ik tza'nx ju xtalb'il in tk'mo'na te Qman. Ex qatzun otoq chin kyime,
15-16kuchiwt kukx tu'n tten tk'ujlalila kyi'j qeju ate' tuj njaye. Che okxwit qe aj q'oj ti'ja tuj malb'il tu'n Qman ti'j kyb'inchb'en, ex awt Qman kub' yupan kye te jumajx, chi Jonatán. Kyja'tzun tten kyaj b'ant ti'j jun tyol Jonatán tuk'il David,
17ex tu'nju at nimxix tk'ujlalil Jonatán ti'j David, xi tma'n juntl maj te tu'n ttzaj tma'n jun yol axix tok, porke k'ujla'ntoq David tu'n ik tza'nx in tk'ujlan tib'.
18Ax ikx xi tma'ntl Jonatán te:
—Nchi'j ik'set ninq'ij ti'j juntl ak'aj xjaw ma tzaj ke'yin, ex tu'nju mi a'l kb'el qe' tuj tq'uqb'ila, atzun k'elel nik'b'aj ti'ja qa mi a'la.
19Ex tuj toxin q'ij juratx ku'tz naja tu'n tula tuj lugar jatum xi tewan tib'a ik tza'n b'aj jun maj, ex b'ix kub' tena ttxlaj ab'j Ezel tb'i.
20Kxel nxo'ne ox plech tumlal ab'j lu, mer ik tza'n at jun in chin xo'ne ti'j,
21ex kxel nma'ne te nmajene tu'n t-xi' jyol kye qe plech. Qa ma txi nma'ne te: Aqeju plech ate' tajtz ti'jtziya, q'intza qe, qa nchiye, b'a'ntzun tu'n tetza ex tu'n ttzaja tuj tzalajb'il, porke minti' jun ti'xti kb'ajel ti'ja. Twitz Qman in xi nkyuwsa'ne jlu teya.
22Qatzun ma txi nma'ne te nmajene: Qe plech ma che kub' ma ti'jxiya, qa nchiye, b'i'xtzun kub' b'e tu'na ex atzun taj Qman tu'n tik'a.
23Atzun ti'j ju yol ma kyaj b'ant ti'j qu'n, ate Qman k'okel te testiw qi'j te jumajx, chi Jonatán.
24Xi'tzun David ewal tib' tuj kojb'il. Ex tej tul kanun tnejel q'ij ninq'ij, kub' qe' rey ti'j mes tu'n twa'n.
25Atzun kub' qe' tuj lugar twitz tkajonil ja ik tza'nxix in b'ant tu'n, atzunte Jonatán kub' qe' ti'j juntl pak' ttxa'n mes twitz rey, ex atzunte Abner kub' qe' ttxlaj Saúl. Atzun tuj tq'uqb'il David minti' xjal kub' qe'.
26Tuj q'ij lu misikyer jun yol tma Saúl, tu'nju kub' t-ximan qa otoq tzik' David tib'aj tley Moisés ex na'nxtoq t-xi tb'inchan tib'.
27Ex tuj tkab'in q'ij ninq'ij, minti'x pon David tu'n tkub' qe' tuj tq'uqb'il. Xitzun tqanin Saúl te Jonatán aju tky'ajal:
—¿Tiqu'n minti' ul tky'ajal Isaí wa'l ew ax ikx ja'lo?
28Atzunte Jonatán xi ttzaq'we'n:
—Tzaj tqanin David tu'n t-xi nq'o'ne amb'il te tu'n txi' tuj Belén, ex il ti'j,
29ex tma kyja': Q'ontza amb'il weye tu'n nxi'ye, ex qeju at nxilene kyuk'il in che ik'san ninq'ij tuj qtanmiye, ex ma tzul tqanil tu'n jun ntzike tu'n nxi'ye; kyja'tzun b'inchama xtalb'il, q'ontza amb'il weye tu'n nxi'ye visitaril kye qe wermaniye, chi David. Kyja'tzun mi a'l ma tzul tu'n twa'n tuk'ila Tat Rey, chi Jonatán.
30Tzajtzun tq'oj Saúl ti'j Jonatán ex xi tma'n te:
—Aya Jonatán tal jun xu'j mya b'a'n. Baqa minti' b'a'n wu'ne qa jumajx ma tz'ok tamiwin tib'a tuk'il tk'wa'l Isaí tu'n tel tch'ixwiya ex tu'n tel tch'ixwi ttxu'ya.
31Ex qa kukx tten tk'wa'l Isaí tzalu twitz tx'otx' mya segur ktela, ax ikx ju toklena te rey. Kyja'tzun, samanxa qe xjal jyolte te ex kyi'ntze tzalu wuk'ile, ex il ti'j tu'n tkyim, chi Saúl.
32Atzunte Jonatán xi tqanin te Saúl aju tman:
—¿Tiqu'n il ti'j tu'n tkyim? ¿Ti ma tb'incha?
33Jawtzun ti'n Saúl ju tlans tu'n tok t-xayu'n ti'j Jonatán.
Atzun el tnik' Jonatán ti'j qa otoq kub' t-ximan tman tu'n tkub' David tu'n.
34Jawtzun we' Jonatán ti'j mes in q'ojl wen ex minti' o wa'n ti'j wab'j tuj tkab'in q'ij te ninq'ij, tu'nju otoq tzaj nim tb'is ti'j David, tu'nju otoq tz'ok ik'le'n tu'n tman.
35Tujtzun juntl q'ij te prim, xi' Jonatán ma tuj kojb'il tuj or b'animaj ti'j tuk'il David, tuk'ix jun ku'xun xi' tuk'il,
36ex xi tma'n te:
—Txi qelina jyol kye qe plech ok t-xi nxo'ne.
Xitzun qelan ju ku'xun ex ok ten Jonatán xo'lte jun plech tu'ntzun tkub' tz'aq najchaq twitz ju ku'xun.
37Tej tpon ku'xun tuj lugar jatum otoq kub' tz'aq plech, xi sch'in Jonatán ti'j:
—Aju plech mas leq'ch ma kub' tz'aq ti'jxiya.
38Xi sch'in juntl maj ti'j tmajen:
—Tz'ok tililx tqana, qelinxa, mi'n kub' we'ya.
Jawtzun ti'n ku'xun qe plech ex ul ti'n tuk'il tpatrón,
39ex minti' el tnik' ti'j jlu, porke o'kx te Jonatán ex David otoq b'ant ti'j techal lu kyu'n.
40Xitzun tq'o'n Jonatán qe tub'l te ku'xun ex xi tma'n te tu'n taj ti'n ma tuj tnam.
41Tejtzun tajtz ku'xun, jaw we' David ti'jxi ju b'yuj ab'j ex kub' ẍmeje' ox maj twitz Jonatán ex max pon takl tib'aj twitz twitz tx'otx'. Eltzun kytz'ub'an kywitz ex e ok ten oq'el kykab'il, ex mas nim o tz'oq' te David.
42Te mankb'il xi tma'n Jonatán te David:
—Q'onkuya b'e, mi'n b'isuna, porke aju yol o b'ant ti'j qu'n qkab'il, a Qman o tz'ok te testiw ti'j, ex o txi qqanin te tu'n tten qxol te jumajx ex tu'n tten kymojb'ab'l kyib' qe tiyjila kyuk'il qeju weye wiyjil, chi Jonatán.
Kub'tzun b'e tu'n David, atzunte Jonatán ajtz tu'n tul tuj tnam.
Who We AreWhat We EelieveWhat We Do
2025 by iamachristian.org,Inc All rights reserved.
