1Ax ikx o pon Pablo tuk'ix Silas tuj tnam Derbe ex tuj tnam Listra; atzun ta' jun okslal Timoteo tb'i, tal jun xu'j judiy ex okslal, atzun tman Timoteo griego xjal.
2Atzun kye erman tuj tnam Listra ex tuj tnam Iconio in che yolin b'a'n ti'j Timoteo.
3O tajb'e Pablo tu'n t-xi' Timoteo tuk'il; xitzun ti'n tu'n t-sircunsidarinjtz tu'n kylaj qe xjal judiy axtoq ate'; porke b'a'ntoq kyu'n kykyaqil qa griego xjal tman.
4Ex tej kyik' tuj junjun tnam, xi kyma'n kye erman tu'n tjapun kyu'n aju kyajni b'ant ti'j kyu'n apostol ex kyu'n anciano ate'toq tuj Jerusalén.
5Kyja'tzun e kyuwsanjtz qe okslal tuj kyokslab'l tuj junjun tnam, ex in chmet-xi kyb'et junjun q'ij.
Kub' tyek'un tib' jun xjal aj Macedonia twitz Pablo ik tza'n tuj witzik'6Ex e mayonjtz Pablo tu'n Xewb'aj Xjan tu'n mi'n t-xi kyma'n tyol Dios tuj tx'otx' Asia. Kyja'tzun e ik'x tuj tx'otx' Frigia ex tuj tx'otx' Galacia.
7Tejtzun kypon ttxlaj tx'otx' Misia, o kyajb'e tu'n kyxi' tuj tx'otx' Bitinia, ex minti' tkuyi Xewb'aj Xjan tu'n kyxi'.
8E ik'xtzun ttxlaj Misia, e ku'pun tuj tnam Troas.
9Ex at jun o til Pablo ik tza'n tuj witzik' te qonik'an: Lu jun xinaq aj Macedonia wa'ltoq in kub'san twitz ex in tma'n: Tik'tza tuj Macedonia ex qo tonintza, chi xjal.
10Tej tlonte Pablo jlu ik tza'n tuj witzik', ok tilil qu'ne tu'n qxi' naje tuj tx'otx' Macedonia, kub' qximane qa ax tok ate Dios in txokon qeye tu'n t-xi qpakb'a'ne tqanil kolb'il kye.
Tej tten Pablo tuk'ix Silas tuj tnam Filipos11O extzune tuj tnam Troas, o'xtzune tuj barc, aku o kanune tuj jun tal tx'otx' tmijil mar Samotracia tb'i, ex te juntl q'ij o pone tuj tnam Neápolis.
12O extzune tuj tnam Neápolis, o pone tuj tnam Filipos, aju tnam lu mas ma' toklen kywitz txqantl tnam tuj tx'otx' Macedonia, ex aj Roma qe xjal lu; ex axtzun o kyaj tene kab' q'ij.
13Ex tuj jun q'ij te ojlab'l o exe ti'jxi tnam, o pone ttzi jun nima jatum in che pon xjal na'l Dios. O kub'tzun qe'ye, ex o yoline kyuk'il xu'j aqeju otoq pon kychmon kyib'.
14At jun xu'j in b'in, Lidia tb'i, k'ayil xb'alun puro tb'anil ex wi'yilxix, aj Tiatira te xu'j lu, ex k'ulul te Dios; ex o tq'ajtza Qajaw tuj tanmi xu'j tu'n tok tq'o'n tkwent ti'j ju in tma'n Pablo.
15Tejtzun tb'yan Lidia kyuk'ix qeju ate' tuj tja, o kub'san qwitze chi kyja':
—Qa okslalxix qine ti'j Qajaw tuj kywitze, kyokxe tuj njaye, ex ax che posadiyine, chi Lidia.
Ex o kub'sanxix qwitze tu'n qkyaj tene tuk'il.
16Ex at jun q'ij kyja' qxi'ye na'l Dios, ok noj qwitze jun txin majen, at ju'ẍ tuj tanmi b'a'n q'ijin; ex nim pwaq in kykamb'a'n qe tpatrón txin tu'nju tq'ijb'il.
17Ate txin lu ok lpe' ti'j Pablo ex qi'je, in jaw tq'ajq'ajel twi', in tma'n kye xjal kyja':
—Aqeju xjal lu tmajen Dios qe, aju Dios Ma'xix Toklen, in xi kypakb'a'n kyeye aju b'e te kolb'il.
18Ex nim q'ij tma txin ikju, ex mya b'a'n ela tuj twitz Pablo; kyja'tzun ajtz tke'yin Pablo, ex xi tma'n te ju'ẍ:
—Kxel nma'ne teya tu'n tipumal Jesucrist tu'n tetza tuj tanmi txin.
Ex jurattzun etz naj ju'ẍ.
19Ex tej kyke'yinte qe tpatrón txin otoq tz'etz ju'ẍ tuj tanmi txin ex atzun q'uqltoq kyk'u'j ti'j tu'n tul kypwaq, tzyettzun Pablo kyu'n tuk'ix Silas, e je'x kyi'n tuj plas kywitz aj sanjelal;
20xitzun kyi'n kywitz qe jwes ex kyma:
—Aqeju xinaq lu judiy xjal qe, ma che jaw tilj xjal kyu'n tuj qtanmi,
21in kyma'n tu'n qb'inchante aju mya q'o'n qe tu'n qk'monte ex tu'n qb'inchante, porke aj Roma qo', che chi.
22E pontzun tilj xjal kyi'j Pablo; atzun kye jwes xi kyma'n tu'n tel sb'it'un kyxb'alun ex tu'n kyb'aj asyalin tu'n tq'ab' tze'.
23Ex kyb'ajlenxi asyalin nim, e okx kyq'o'n tuj pres, ex xi kyma'n te xq'uqil pres tu'n kyok kwentinxix.
24Tejtzun tk'monte xq'uqil pres aju orden lu, e okx tq'o'n tuj calabós max tujxi, ex okx tq'o'n kyqan tuj cepo.
25Ex te tmij aq'b'il in na'n Pablo Dios tuk'ix Silas, ex in che b'itzan te Dios; ex qe txqantl pres in che b'intoq kyi'j.
26Ex minab'en tzaj jun kyaqnajnab' nimxix, b'i'x e b'aj yukch qe t-simyentil kyja pres; ex jurat naj jaqet tkyaqil tlamel ja, ex e je'l pujl caden kyi'j kykyaqil pres.
27Ultzun tnab'l ju xq'uqil pres ex tej tke'yinte otoq che jaqet tlamel ja jatum ate' qe pres, jatz ti'n t-spad, o tajb'e tu'n tkub' tb'yon tib', tuj tnab'l qa otoq che etz oq qe pres.
28Atzunte Pablo jaw tq'ajq'ajel twi' kyuw ex tma:
—Mi'n tk'ixb'isa tib'a, lu qo'ye ato'ye qkyaqile.
29Xitzun tqanin xq'uqil pres jun ttxan tzaj, ex okx qelan max tujxi, ex kub' ẍmeje' twitz Pablo ex twitz Silas in lu'lun tu'n tchi.
30E je'tztzun ti'n, ex xi tqanin kye:
—Aqeye tat, ¿ti ok nb'incha'ye tu'n nklete?
31Xitzun kyma'n Pablo te:
—Okslama Qajaw Jesucrist, ex ok kleteltzuna, aya ex qeju ate' tuj tjaya.
32Xitzun kyma'n tyol Qajaw te ex kye kykyaqil qeju ate' tuj tja.
33Ax or te qonik'an b'aj ttx'jo'n kyk'ixb'len; ex jurat o b'yan kyuk'ix kykyaqil qeju ate' tuj tja.
34E je'xtzun ti'n tja, xi tq'o'n kywa; ex o tzalajxix kyuk'ix qeju ate' tuj tja tu'nju otoq che okslan ti'j Dios.
35Tejtzun qsqix, xi kysama'n jwes kab'e polisiy q'malte te xq'uqil pres tu'n t-xi tzoqpet Pablo tuk'ix Silas.
36Xitzun tma'n xq'uqil pres ju yol lu te Pablo:
—Ma tzaj kysama'n jwes kab'e xjal q'malte tu'n kyxi tzoqpete; kyja'tzun b'a'n tu'n kyexe ja'lo, mi'n che b'isune, chi xjal.
37Atzunte Pablo xi tma'n kye polisiy:
—Ma qo b'aj asyaline kyu'n kywitz kykyaqil xjal ex minti' qsentense tkub', ex ax aj Roma qo'ye ma qo okx q'o'ne tuj pres, ¿ja'lotzun, maj tuj ewajtzun qo elex lajo'ne kyu'n? Mlay. E kytzaj xjal lu q'il qeye tu'n qexe, chi Pablo.
38Atzun kye polisiy xi kyma'n ju yol lu kye jwes; tzajtzun kyxob'il jwes tej kyb'inte qa aj Roma qe.
39E ultzun qe jwes ex e kub'san kywitz Pablo che chi kyja':
—Kynajsame, mya b'a'n ma qb'inchaye kyi'je, che chi. Ex e je'tz kyi'n ex e kub'san kywitz tu'n kyex tuj tnam.
40Kyetzlenxitzun tuj pres, e je'x tuj tja Lidia; ex tej kyb'aj yolin kyuk'il erman, kyaj kyq'uqb'a'n Pablo kyk'u'j, ex e je'tztzun.
Who We AreWhat We EelieveWhat We Do
2025 by iamachristian.org,Inc All rights reserved.
