Mateo 19 - Mam Huehuetenango New Ortography

In tq'o'n Jesús xnaq'tzb'il tu'n mi'n tkub' tpa'n tib' xjal tuk'il t-xu'jil Marcos 10.1-12; Lucas 16.18

1Tejtzun tb'aj tma'n Jesús ju yol lu, etz tuj Galilea, xi' tuj tx'otx' Judea jlajxi nima Jordán.

2Ex nim xjal e ok lpe' ti'j, ex atzun e b'anix yab' tu'n.

3E pontzun laq'e' qe fariseo tuk'il Jesús tu'n tok tuj joyb'il ti'j kyu'n, ex xi kyma'n te:

—¿Q'o'npelo tu'n ley tu'n tex tlajo'n xinaq t-xu'jil noq tu'n tlaj jun ti'xti? Che chi.

4Xi ttzaq'we'n Jesús:

—¿B'ajxpe jaw kysch'i'ne tuj Tu'jil tej tb'ant xjal tu'n Dios t-xe tnejel, xinaq ex xu'j e kub' tb'incha'n?

5Ex tma Dios: Kyja'tzun kyjel tq'o'n xinaq tman tuk'ix ttxu', ex kmojeb'el tuk'il t-xu'jil, ex kykab'il che okel te junx.

6Kyja'tzun mya kab'e kyten, noq junx kyten; kyja'tzun, aju ok tmojb'a'n Dios, mi'n tz'el tpa'n xjal, chi Jesús kye.

7Xitzun kyma'n fariseo:

—¿Tiqu'ntzun kyaj tma'n Moisés tu'n tex tlajo'n xjal t-xu'jil ex tu'n t-xi q'ot jun u'j te xu'j jatum in tma'n qa otoq kub' kypa'n kyib'? Che chi.

8Xi tma'n Jesús kye:

—Tu'nju puro kyuw kyanmiye, kyja'tzun kyaj tma'n Moisés tu'n tex kylajo'ne kyxu'jile. Pero t-xe tnejel mya ik ttenju.

9Atzun weye kxel nma'ne kyeye, qa at jun xjal ma kub' tpa'n tib' tuk'il t-xu'jil ex qa minti' in tb'incha'n xu'j aj pajil, qatzun ma moje' xinaq tuk'il juntl xu'j, in tb'incha'n xinaq aj pajil;, chi Jesús kye.

10Xitzun kyma'n t-xnaq'tzb'en Jesús te:

—Qa ik tten tchwinqlal xinaq tuk'il t-xu'jil, maslo b'a'n tu'n mi'n tknet t-xu'jil xjal, che chi.

11Xitzun tma'n Jesús kye:

—Mya kykyaqil xjal jaku txi kyniman ju yol lu, noq o'kx qeju ma tzaj tq'o'n Dios kyoklen tu'n tjapun kyu'n.

12Tu'nju at junjun xjal minti' tumel tu'n kymoje' porke kyitz'jlenx ikju; ex at junjun in che ok kyu'n xjal ikju tu'n mi'n kymoje'; ex at junjun in che ok ikju kyu'nx kyib', minti' in che moje' noq tu'n kyajb'en tuj tkawb'il Dios in tzaj tuj kya'j. Alkye jaku b'ant jlu tu'n, b'incham, chi Jesús kye.

E kub' tky'iwla'n Jesús qe k'wa'l Marcos 10.13-16; Lucas 18.15-17

13E tzajtzun q'i'n junjun tal k'wa'l twitz Jesús tu'n tkub' tq'o'n tq'ab' tib'aj kywi' ex tu'n tna'n Dios kyi'j; atzun kye t-xnaq'tzb'en e mayet qe xjal kyu'n, aqeju e tzaj q'inte kye tal k'wa'l.

14Ex xi tma'n Jesús kye t-xnaq'tzb'en:

—Kyq'onxe amb'il kye tal k'wa'l tu'n kytzaj wuk'ile ex mi'n che'x kymayo'ne; porke aju kawb'il in tzaj tuj kya'j kyekye xjal ik kyten ik tza'n qe tal k'wa'l lu, chi Jesús.

15Kub'tzun tq'o'n tq'ab' tib'aj kywi', ex xi' tuj juntl lugar.

Jun ku'xun q'inun in yolin tuk'il Jesús Marcos 10.17-31; Lucas 18.18-30

16Ultzun jun ku'xun tuk'il Jesús ex xi tma'n te:

—Xnaq'tzal b'a'n, ¿alkye b'a'n tu'n nb'inchanteye tu'n nkamb'anteye chwinqlal te jumajx?

17Xi tma'n Jesús te:

—¿Tiqu'n in chin ok tq'o'na te b'a'n? Mi a'l jun xjal b'a'n, o'kx te Dios b'a'n. Qa taja tu'n tten tchwinqlala te jumajx, che japunx qe mandamyent tu'na.

18Xitzun tma'n ku'xun:

—¿Alkyetzun qe mandamyent?

Xi tma'n Jesús te:

—Atzun qe jlu: Mi'n che b'iyune; mi'n kyb'inchaye aj pajil; mi'n che elq'ane; mi'n che nik'ane yol ti'j juntl;

19kynimanxe kymane ex kytxuye; ex kyk'ujlame kyuk'ile ik tza'nx kyeye in kyk'ujlan kyib'e.

20Xitzun tma'n ju ku'xun te Jesús:

—Tkyaqil jlu o japun wu'ne tej matoq k'wa'lx qine. ¿Alkyetzun juntl atx taj tu'n tjapun wu'ne?

21Xitzun tma'n Jesús te:

—Qa taja tu'n toka tz'aqlxix, txi'ya, k'ayinxa tkyaqilju at teya ex q'onxa kye meb'a, ex kteltzun tq'inumab'la tuj kya'j; tzaja, ex lpe'ka wi'je.

22Tejtzun tb'inte ku'xun ju yol lu, ajtzun in b'isunxix, porke nimtoq tq'inumab'l at.

23Xitzun tma'n Jesús kye t-xnaq'tzb'en:

—Ax tok kxel nma'ne kyeye, kyuw tu'n tokx jun xjal q'inun tuj kawb'il in tzaj tuj kya'j.

24Kxel nma'ne juntl maj kyeye, mas jurat jaku tz'ex jun chej camey tuj toy' jun b'aq, twitzju tu'n tokx jun q'inun tuj tkawb'il Dios.

25Tej kyb'inte qe t-xnaq'tzb'en Jesús ju yol lu, b'i'x jaw naj kynab'l, ex kyma:

—Qa ikju ¿alkyetzun jaku klet?

26Xi tke'yin Jesús kywitz ex xi tma'n kye:

—Mlay b'ant jlu kyu'n xjal, pero te Dios tkyaqil jaku b'ant tu'n.

27Xitzun ttzaq'we'n Pedro:

—Tat, kina qo'ye, ma kyaj qq'o'ne tkyaqilju at qeye ex ma qo ok lpe'ye ti'ja. ¿Alkyetzun ktzajel q'o'n qeye?

28Xi tma'n Jesús kye:

—Ax tok kxel nma'ne kyeye, tuj tq'ijlalil ok tok tkyaqil te ak'aj, chin b'el qe'ye tuj nq'uqb'ile in qoptz'aj tu'n nkawine, aqine sk'o'maj qine tu'n Dios tu'n ntene kyuk'il xjal; ax ikx kyeye che b'el qe'ye tib'aj kab'laj q'uqb'il tu'n kykawine kyib'aj kab'laj k'loj tiyjil Israel, porke ma che ok lpe'ye wi'je.

29Ex alkye jun ma kyaj tq'o'n tja, ex qa ttzik, ex qa titz'in, ex qa tman, ex qa ttxu', ex qa t-xu'jil, ex qa tk'wa'l, ex qa ttx'otx', noq tu'n nlaje, jun syent maj ok tk'ma' t-xel, ex ok tkamb'a' tchwinqlal te jumajx.

30Ex qeju ate' te tnejel ja'lo, nimku che okel te mankb'il; ex qeju ate' te mankb'il ja'lo, nimku che okel te tnejel.